2 Nkumi ya dikanga 8:1-29
8 Elisha akatɛ womoto lakanga ɔna lakandolola*+ ate: “Onɛɛ, tshɔka wɛ l’ase luudu layɛ kele nyotodjasɛ oko angɛndangɛnda lɛnɛ tshɛ akokanyu mbidjasɛ, nɛ dia Jehowa ambewoya ndjala+ ka kasha ndo tɔ kayoya lo wodja l’edja k’ɛnɔnyi 7.”
2 Ko womoto akɔ akonɛɛ ndo akasale kɛnɛ kakawotɛ okambi wa Nzambi ka mɛtɛ. Nde akatshu l’ase luudu lande, ko akatodjasɛ l’ɛtshi ka nkɛtɛ k’ase Filistiya+ l’edja k’ɛnɔnyi 7.
3 L’ekomelo k’ɛnɔnyi 7, womoto akɔ akonɛɛ oma l’ɛtshi ka nkɛtɛ k’ase Filistiya ko akakalola ndo akatshu tɔsɛngasɛnga nkumekanga dikambo dia luudu lande ndo dia ekambɔ kande.
4 L’etena kakɔ, nkumekanga akasawolaka la Ngɛhazi okimanyedi w’okambi wa Nzambi ka mɛtɛ, ata ate: “Lam’alangayɛ, ɔnkɔndɔlɛ akambo tshɛ wa weke wambosala Elisha.”+
5 Etena kakandakɔndɔlɛka nkumekanga woho wakandolola+ odo, womoto lakanga ɔna lakandolola akaye le nkumekanga, awɔsɛngasɛnga dikambo dia luudu lande ndo dia ekambɔ+ kande. Ko Ngɛhazi akate ate: “Nkumɛmi nkumekanga le, womoto akɔ nde ɔnɛ ndo ɔnande lakolola Elisha nde ɔnɛ.”
6 Ko nkumekanga akambola womoto akɔ ndo womoto akɔ akɔɔkɔndɔlɛ ɔkɔndɔ akɔ. Oma laasɔ, nkumekanga akatɛ ɔnɛnɛ ɔmɔtshi ate: “Kaloyande diangɔ diande tshɛ ndo diangɔ tshɛ di’oma lo ekambɔ kande ntatɛ lushi lakandonɛɛ polo kakianɛ.”
7 Elisha akakome la Damasɛkɛ+ etena kaki Bɛnɛ-Hadada+ nkumekanga ka Suriya la hemɔ. Ko wakatowotɛ ɔnɛ: “Okambi wa Nzambi ka mɛtɛ+ amboya lanɛ.”
8 Ko nkumekanga akatɛ Hazaɛlɛ+ ate: “Ɔsa woshasha kele tshɔka tɛnane la okambi wa Nzambi ka mɛtɛ.+ Tombole Jehowa kanyi lo tshimbo yande wate: ‘Onde hemɔ kami kɛnɛ kayɔkɔnɔ?’”
9 Hazaɛlɛ akatshu tɛnana la nde ndo akɔshi woshasha, weho tshɛ wa diangɔ di’amɛna dia la Damasɛkɛ, eshikɔ wa kamɛlɔ 40. Nde akakome, ko akemala la ntondo kande ndo akate ate: “Ɔnayɛ Bɛnɛ-Hadada, nkumekanga ka Suriya kontomi le yɛ dia ndjokombola ɔnɛ: ‘Onde hemɔ kami kɛnɛ kayɔkɔnɔ?’”
10 Elisha akookadimola ate: “Tshɔka towote wate: ‘Wɛ ayɔkɔnɔ ndooko onyake,’ koko Jehowa ambɔmɛnya dia nde ayovɔ ndooko onyake.”+
11 Nde akatetemala mbeenda tɛɛ polo ndo nde oka nsɔnyi. Oma laasɔ, okambi wa Nzambi ka mɛtɛ akalele.
12 Hazaɛlɛ akawombola ate: “Lande na kalela nkumɛmi?” Nde akakadimola ate: “Nɛ dia dimi mbeyaka kɔlɔ kayoyosalɛ ase Isariyɛlɛ.+ Wɛ ayotshumba ahole awɔ wodingami la mpele, wɛ ayodiaka apami awɔ wa wolo la lokuwa la ta, ayatshatsha anawɔ ndo wɛ ayata akundju wa wamato awɔ wele la waemi.”+
13 Hazaɛlɛ akate ate: “Ngande wakoka okambi ayɛ wele fiɔfɔ y’anyanya nsala dui dia ngasɔ?” Koko Elisha akate ate: “Jehowa ambɔmɛnya dia wɛ ayonga nkumekanga ka Suriya.”+
14 Oma laasɔ, nde akamɔ oma lale Elisha ko akakalola otsha le nkumɛnde, ko nkumɛnde akatowombola ate: “Elisha akandakote?” Nde akakadimola ate: “Nde akambute dia wɛ ayɔkɔnɔ ndooko onyake.”+
15 Koko la wedi a pindju, Hazaɛlɛ akɔshi olangitshi, akoodindja lo ashi, ko akafɛ* nkumekanga lo elungi polo nde mvɔ.+ Ko Hazaɛlɛ akayala nkumekanga lo dihole diande.+
16 L’ɔnɔnyi wa 5 w’ɛlɔmbwɛlɔ ka Jɛhɔrama+ ɔna Ahaba nkumekanga k’Isariyɛlɛ, etena kaki Jɛhɔshafata nkumekanga ka Juda, Jɛhɔrama+ ɔna Jɛhɔshafata nkumekanga ka Juda akayala nkumekanga.
17 Nde aki l’ɛnɔnyi 32 lam’akandayala nkumekanga ndo nde akolɛ l’edja k’ɛnɔnyi 8 la Jɛrusalɛma.
18 Nde akakɛndakɛndaka lo mboka ka nkumi ya dikanga y’Isariyɛlɛ,+ oko wakasalaka ase luudu la Ahaba,+ nɛ dia ɔna aki Ahaba akayonga wadɛnde,+ ndo nde akasalaka kɛnɛ kaki kɔlɔ lo washo wa Jehowa.+
19 Koko Jehowa konanga ndanya Juda l’ɔtɛ wa okambi ande Davidɛ,+ nɛ dia nde akoolake dia mbosha nde l’anande tala+ pondjo pondjo.
20 Lo nshi yande mbakatɔmbɔkwɛ ase Ɛdɔmɛ ase Juda+ ko vɔ ndjasɔnɛ nkumekanga.+
21 Ko Jɛhɔrama akatenyanya otsha la Zaira kaamɛ la pusupusu yande tshɛ ndo nde akonɛɛ l’otsho, ko akalɛndja ase Ɛdɔmɛ wakoodinge ndo ɛnɔmbɔdi wa pusupusu. Ko asɔlayi wakalawɔ otsha lo mvudu yawɔ y’apɛma.
22 Koko ase Ɛdɔmɛ wakatetemala tɔmbɔkwɛ ase Juda polo ndo ɛlɔ. Ase Libina+ vɔ lawɔ wakatɔmbɔkɔ l’etena kɛsɔ.
23 Etenyi kekina k’ɔkɔndɔ wa Jɛhɔrama ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?
24 Oma laasɔ, Jɛhɔrama aketama dia momuya kaamɛ la watshɛnde, ndo wakookundɛ lale watshɛnde l’Osomba wa Davidɛ,+ ko Ahaziya+ akayala nkumekanga lo dihole diande.
25 L’ɔnɔnyi wa 12 w’ɛlɔmbwɛlɔ ka Jɛhɔrama ɔna Ahaba nkumekanga k’Isariyɛlɛ, Ahaziya ɔna Jɛhɔrama nkumekanga ka Juda akayala nkumekanga.+
26 Ahaziya aki l’ɛnɔnyi 22 lam’akandayala nkumekanga, ndo nde akolɛ ɔnɔnyi 1 la Jɛrusalɛma. Nyango lokombo lande Ataliya,+ okana* wa Omiri+ nkumekanga k’Isariyɛlɛ.
27 Nde akakɛndakɛndaka lo mboka k’ase luudu la Ahaba+ ndo akasalaka kɛnɛ kaki kɔlɔ lo washo wa Jehowa, oko ase luudu la Ahaba, nɛ dia nde aki okilo w’ase luudu la Ahaba.+
28 Ko nde akatshu kaamɛ la Jɛhɔrama ɔna Ahaba dia tɔlɔsha Hazaɛlɛ nkumekanga ka Suriya la Ramɔta-Ngiliyadɛ,+ koko ase Suriya wakahomuya Jɛhɔrama.+
29 Ɔnkɔnɛ, nkumekanga Jɛhɔrama akakalola la Jezɛrɛlɛ+ dia tɔkɔnɔ mpota kakoohomuya ase Suriya la Rama etena kakandalɔka la Hazaɛlɛ nkumekanga ka Suriya.+ Ahaziya ɔna Jɛhɔrama nkumekanga ka Juda akaholɔ otsha la Jezɛrɛlɛ dia tenda Jɛhɔrama ɔna Ahaba, nɛ dia nde akahomɔ mpota.*
Nɔtɛ ka l'ɛse ka dikatshi
^ Kana “lakayala la lɔsɛnɔ nto.”
^ Kana “akakitsha.”
^ Tshɛk., “ɔna womoto.”
^ Kana “nde aki la hemɔ.”
