2 Nkumi ya dikanga 9:1-37
9 Oma laasɔ, omvutshi Elisha akelɛ ɔna omvutshi ɔmɔtshi ko akawotɛ ate: “Keleka ahɔndɔ ayɛ lo lokende kele ɔsa ɔlɔndɔ w’esɔ yema esadi, tshɔka otsha la Ramɔta-Ngiliyadɛ.+
2 Lam’ayoyokoma lɛkɔ, koyange Jehu+ ɔna Jɛhɔshafata ɔna Nimishi. Kɔtɔ ko wɛ mbonya oma l’atei w’anango ndo kotshu la nde lo luudu loleki l’etei.
3 Oma laasɔ, kɔshi ɔlɔndɔ w’esɔ ko wɛ mbotɛ l’ɔtɛ ndo wɛ mbuta wate: ‘Jehowa kata ate: “Dimi lambokokita esɔ dia wɛ monga nkumekanga k’Isariyɛlɛ.”’+ L’ɔkɔngɔ wa laasɔ, kodihole lokuke ko wɛ ndawɔ aha la ntshimbatshimba.”
4 Ɔnkɔnɛ okimanyedi w’omvutshi akatshu otsha la Ramɔta-Ngiliyadɛ.
5 Lam’akandakome, ewandji w’asɔlayi wakadjasɛ lɛkɔ. Nde akate ate: “Owandji le, lekɔ la losango lakiyɛ.” Jehu akambola ate: “Akɔna l’atei aso?” Nde akate ate: “Losango lakiyɛ, owandji.”
6 Ko Jehu akonɛɛ ndo akɔtɔ lo luudu. Ko okimanyedi akɔ akawotɛ esɔ l’ɔtɛ ndo akawotɛ ate: “Jehowa Nzambi k’Isariyɛlɛ kata ate: ‘Dimi lambokokita esɔ dia wɛ monga nkumekanga k’Isariyɛlɛ,+ wodja wa Jehowa.
7 Wɛ pombaka ndjaka ase luudu la nkumɛyɛ Ahaba ndo dimi layɔsɔmbɔya dikila di’ekambi ami amvutshi ndo dikila di’ekambi tshɛ wa Jehowa wakavu lo anya wa Jezabɛlɛ.+
8 Ko luudu l’otondo la Ahaba layoshila oshiki, ndo dimi layomana apami tshɛ* wa laka Ahaba, mbidja ndo ɔnɛ laha la ekimanyielo ndo lele wɔdu lo Isariyɛlɛ.+
9 Dimi layetɛ luudu la Ahaba oko luudu la Jɛrɔbɔama+ ɔna Nebatɛ ndo oko luudu la Baasha+ ɔna Ahidja.
10 Lo dikambo dia Jezabɛlɛ, mfɔ yayowɔlɛ lo ɛtshi ka nkɛtɛ ka Jezɛrɛlɛ+ ndo ndooko onto layowokundɛ.’” Kam’akandate ngasɔ, nde akadihola lokuke, ko akalawɔ.+
11 Lam’akakalola Jehu le ekambi wa nkumɛnde, vɔ wakawombola vate: “Onde lengo tshɛ ki? Lande na kakaye pami ka dadi kengo le yɛ?” Nde akaakadimola ate: “Nyu mbeyaka woho w’onto wende ndo woho w’awui watɛkɛtande.”
12 Koko vɔ wakate vate: “Kashi! Lam’alangayɛ, otote.” Ko nde akate ate: “Nganɛ la nganɛ kakandambute, ndo nde akakotshisha ate: ‘Jehowa kata ate: “Dimi lambokokita esɔ dia wɛ monga nkumekanga k’Isariyɛlɛ.”’”+
13 Ko onto l’onto l’atei awɔ akɔshi dihɔndɔ diande esadi esadi, akadialɛ l’ɛse kande lo edelo,+ ko vɔ wakade dimama ndo wakate vate: “Jehu aya nkumekanga!”+
14 Oma laasɔ, Jehu+ ɔna Jɛhɔshafata ɔna Nimishi akɔtwɛ Jɛhɔrama sheke.
Jɛhɔrama akalamaka Ramɔta-Ngiliyadɛ+ nde l’ase Isariyɛlɛ tshɛ l’ɔtɛ wa Hazaɛlɛ+ nkumekanga ka Suriya.
15 L’ɔkɔngɔ diko, nkumekanga Jɛhɔrama akakalola otsha la Jezɛrɛlɛ+ dia mpota kakoohomuya ase Suriya lam’akandalɔsha Hazaɛlɛ nkumekanga ka Suriya+ tɔkɔnɔ lɛkɔ.
Ko Jehu akate ate: “Naka nyalanga,* tanyetawɔke di’onto ɔmɔtshi ndawɔ oma l’osomba dia nde ntshɔ tota dui nɛ la Jezɛrɛlɛ.”
16 Oma laasɔ, Jehu akadɛ lo pusupusu kande, ko akatshu otsha la Jezɛrɛlɛ, nɛ dia Jɛhɔrama aketama lɛkɔ, ele la mpota ndo Ahaziya nkumekanga ka Juda akaholɔ lɛkɔ dia tenda Jɛhɔrama.
17 Etena kakemala djamu lo tshoto ya la Jezɛrɛlɛ, nde akɛnyi olui w’anto waki Jehu wayaye. Mbala kakɔ ɔtɔi nde akate ate: “Lekɔ lo mɛna olui w’anto.” Jɛhɔrama akate ate: “Ɔsa ombahemi wa mfalasa ɔmɔtshi kele tomande atohomane la wɔ ndo atombole ate: ‘Onde lo ki kambonyoya?’”
18 Ko ombahemi wa mfalasa ɔmɔtshi akatshu tohomana la nde ndo akate ate: “Nkumekanga kata ate: ‘Onde lo ki kambonyoya?’” Koko Jehu akate ate: “Kasayɛ la ‘ki’? Eta l’ɔkɔngɔ ami!”
Ko djamu akate ate: “Ɔkɛndji akakomi le wɔ, koko nde hakalola.”
19 Ɔnkɔnɛ, nde akatome ombahemi wa mfalasa wa 2 ko nde akatota lam’akandakome le wɔ ate: “Nkumekanga kata ate: ‘Onde lo ki kambonyoya?’” Koko Jehu akate ate: “Kasayɛ la ‘ki’? Eta l’ɔkɔngɔ ami!”
20 Oma laasɔ, djamu akate ate: “Nde akakomi le wɔ, koko hakalola ndo ekɔ oko Jehu okana* wa Nimishi kayakɛndjakɛndja, nɛ dia nde kɛndjakɛndjaka oko kanga dadi.”
21 Jɛhɔrama akate ate: “Nyokeleke pusupusu!” Ko wakakeleka pusupusu kande ka ta ndo Jɛhɔrama nkumekanga k’Isariyɛlɛ nde la Ahaziya+ nkumekanga ka Juda wakatshu, onto l’onto lo pusupusu kande ka ta dia tohomana la Jehu. Vɔ wakahomana la nde lo ɛtshi ka nkɛtɛ ka Nabɔta+ ose Jezɛrɛlɛ.
22 Kam’akɛnyi Jɛhɔrama Jehu, nde akate ate: “Jehu, onde lo ki kamboyoya?” Koko nde akate ate: “Ki kakɔna kakoka monga edja tshɛ keke kinumba ka nyɔ Jezabɛlɛ+ ndo efula k’awui ande wa dɔka?”+
23 Mbala kakɔ ɔtɔi, Jɛhɔrama akakadimola pusupusu kande, ko akalawɔ ndo nde akatɛ Ahaziya ate: “Ahaziya le, tambokesama!”
24 Jehu akakimɛ ota ande lo lonya, akatshieta Jɛhɔrama lam’asa ahɛka ande, ko dikuwa diakatonda doyi diande, ko nde akakɔ lo pusupusu kande ka ta.
25 Oma laasɔ, nde akatɛ Bidikarɛ laki owandji ande w’asɔlayi ate: “Ɔsande kele kashande lo ekambɔ ka Nabɔta ose Jezɛrɛlɛ.+ Wɛ mbohɔka dia dimi la yɛ takatatshɔka kaamɛ laadiko dia mfalasa l’ɔkɔngɔ wa Ahaba wa she lam’akate Jehowa ndamɛ lo dikambo diande+ ate:
26 ‘Jehowa kata ate: “Lo mɛtɛ, oko wakamɛnyi dikila dia Nabɔta+ ndo dikila di’anande loyi, dimi layokofuta+ paka lo ɛtshi ka nkɛtɛ kɛnɛ,” mbata Jehowa.’ Ɔnkɔnɛ, ɔsande kele kashande lo ɛtshi ka nkɛtɛ kakɔ, lo ndjela ɔtɛkɛta wa Jehowa.”+
27 Kam’akɛnyi Ahaziya+ nkumekanga ka Juda kɛnɛ kakatombe, nde akalawɔ lo mboka k’otsha lo luudu la ekambɔ. (L’ɔkɔngɔ diko, Jehu akayooyela ko akate ate: “Nyɔɔkɔmɔlɛ ndo nde! Ko vɔ wakɔɔkɔmɔla lo pusupusu lam’akandatadɛka otsha la Ngura kele suke la Ibɛlɛamɛ.+ Koko nde akatetemala ndawɔ otsha la Mengido, ko akatovɔ lɛkɔ.
28 Ko ekambi ande wakawɛmbɛ lo pusupusu otsha la Jɛrusalɛma ndo wakatookundɛ lo diombo diande lale watshɛnde l’Osomba wa Davidɛ.+
29 L’ɔnɔnyi wa 11 w’ɛlɔmbwɛlɔ ka Jɛhɔrama ɔna Ahaba mbakayala Ahaziya+ nkumekanga ka Juda.)
30 Lam’akakome Jehu la Jezɛrɛlɛ,+ Jezabɛlɛ+ akoke dui sɔ. Ɔnkɔnɛ nde akakite tile lo washo ndo akalɛngɛ ɔtɛ ande, ko nde akalengɛka lo didishi.
31 Lam’akɔtɔ Jehu oma la soko, Jezabɛlɛ akate ate: “Onde awui waketshi dimɛna le Zimiri, ondjaki wa nkumɛnde?”+
32 Nde akedia washo otsha lo didishi ko akate ate: “Akɔna ele lo wedi ami? Akɔna?”+ Mbala kakɔ ɔtɔi, ɛnɛnɛ 2 kana 3 wakawende.
33 Nde akate ate: “Nyowoke la nkɛtɛ!” Ko vɔ wakawokɛ la nkɛtɛ ndo yema ya dikila diande diakatamɛ lo ehele ndo lo mfalasa, ko nde akɔɔhɔtshahɔtsha.
34 L’ɔkɔngɔ wa laasɔ, nde akɔtɔ, akale ndo akanɔ. Oma laasɔ, nde akate ate: “Lam’alanganyu, nyende dikambo dia womoto lakadjama mananu ɔnɛ ndo nyookundɛ. Kaa ɔna nkumekanga kende.”+
35 Koko lam’akawatshu dia tookundɛ, vɔ wakatane paka lowako lande, akaka ande la awambo ande.+
36 Lam’akawakalola ndo lam’akawawotɛ, nde akate ate: “Dui sɔ diambokotsha ɔtɛkɛta wa Jehowa+ wakandate lo tshimbo y’okambi ande Elidja ose Tishibɛ ate: ‘Mfɔ yayɔlɛ emunyi wa Jezabɛlɛ lo ɛtshi ka nkɛtɛ ka Jezɛrɛlɛ.+
37 Ndo odo wa Jezabɛlɛ wayonga oko tumi lo ekambɔ ka lo ɛtshi ka nkɛtɛ ka Jezɛrɛlɛ, diaha vɔ ndjota vate: “Jezabɛlɛ nde ɔnɛ.”’”
Nɔtɛ ka l'ɛse ka dikatshi
^ Tshɛk., “onto tshɛ lanɔ wanyi lo ehele.” Etelo ka lo Hɛbɛru ka diɔnyɔ kendana la apami.
^ Kana “anima anyu walanga.”
^ Tshɛk., “ɔna pami.”
