Akambo w’ase Lɛwi 3:1-17
3 “‘Naka onto ambolanga nambola olambo w’osanga*+ ndo naka nde ambolanga nkimɔ ngɔmbɛ, oyadi k’omi kana ka wadi, kete nde pombaka nkimɔ nyama kaha la ɛkɔmɔ la ntondo ka Jehowa.
2 Nde kahɛ lonya lande laadiko di’ɔtɛ wa nyama kande k’olambo, ko tɔ kayodiakema la soko dia luudu la dipɛma l’esanganelo ndo ana w’apami w’Arɔna wele ɛlɔmbɛdi kawɔmɔngɛ dikila lo wedi akɔ tshɛ wa elambwelo.
3 Nde kakimɔ etenyi kɛmɔtshi k’olambo w’osanga oko olambo watshumbama lo dja dikambo dia Jehowa:+ Wata+ wakomba ɛsɔhi, wata tshɛ wadinga mbo y’etema,
4 ndo awondo akɔ 2 la wata wa lɔkɔ wele suke la lokende. Nde kanya ndo okombɔ w’ovɔ kaamɛ la awondo.+
5 Ana w’apami w’Arɔna kawoditshumbe lo elambwelo laadiko di’olambo wa lotshumba wele laadiko dia nkunyi yele lo dja.+ Ɔsɔ ekɔ olambo watshumbama lo dja wele l’opumu wa dimɛna* le Jehowa.+
6 “‘Naka onto ambolanga nambola Jehowa ɔkɔkɔ kana mbudi dikambo di’olambo w’osanga, kete nde kakimɔ nyama k’omi kana ka wadi kaha la ɛkɔmɔ.+
7 Naka nde ambela ɔsɔngɔ w’ɔkɔkɔ w’omi oko olambo, kete nde kaye la wɔ la ntondo ka Jehowa.
8 Nde kahɛ lonya lande l’ɔtɛ wa nyama kande k’olambo, ko tɔ kayodiakema la ntondo ka luudu la dipɛma l’esanganelo. Ana w’apami w’Arɔna kawɔmɔngɛ dikila diatɔ lo wedi akɔ tshɛ wa elambwelo.
9 Nde kakimɔ wata w’oma lo nyama k’olambo w’osanga oko olambo watshumbama lo dja dikambo dia Jehowa.+ Nde kanya wela w’otondo wa wata wele suke la weka wa l’ɔkɔngɔ, wata wakomba ɛsɔhi, wata tshɛ wadinga mbo y’etema,
10 ndo awondo akɔ 2 kaamɛ la wata wele lɔkɔ wele suke la lokende. Nde kanya ndo okombɔ w’ovɔ kaamɛ la awondo.+
11 Ɔlɔmbɛdi kaditshumbe lo elambwelo oko mbo ya ndɛ,* olambo watshumbama lo dja dikambo dia Jehowa.+
12 “‘Naka onto ambolanga nambola mbudi, kete nde kaye la tɔ la ntondo ka Jehowa.
13 Nde kahɛ lonya lande l’ɔtɛ atɔ, ko tɔ kayodiakema la ntondo ka luudu la dipɛma l’esanganelo. Ana w’apami w’Arɔna kawɔmɔngɛ dikila diatɔ lo wedi akɔ tshɛ wa elambwelo.
14 Etenyi kayondokimɔ oko olambo ande watshumbama lo dja dikambo dia Jehowa ele wata wakomba ɛsɔhi, wata tshɛ wadinga mbo y’etema,+
15 ndo awondo akɔ 2 kaamɛ la wata wa lɔkɔ wele suke la lokende. Nde kanya ndo okombɔ w’ovɔ kaamɛ la awondo.
16 Ɔlɔmbɛdi kaditshumbe lo elambwelo oko mbo ya ndɛ,* olambo watshumbama lo dja dia monga l’opumu wa dimɛna.* Wata tshɛ wekɔ waki Jehowa.+
17 “‘Ɔnɛ ele didjango dia pondjo le nɔnga yanyu lo ahole tshɛ wayonyodjasɛka: Hanyohombe ndɛ weho tshɛ wa wata kana weho tshɛ wa dikila.’”+
Nɔtɛ ka l'ɛse ka dikatshi
^ Kana “woshasha w’olambo wa wɔladi.”
^ Kana “wangɛnyangɛnya; walɛndja otema.” Tshɛk., “watutadia.”
^ Tshɛk., “mapa,” mbuta ate yema yaki Nzambi ya l’olambo w’osanga.
^ Tshɛk., “mapa,” mbuta ate yema yaki Nzambi ya l’olambo w’osanga.
^ Kana “wangɛnyangɛnya; walɛndja otema.” Tshɛk., “watutadia.”
