Amɔsɛ 6:1-14
6 “Mananu le wanɛ wele lo Siɔna wayaɛkɛ le wɔ vɔamɛ,*Le wanɛ wayaoka lo ekokelo lo dikona dia Samariya,+Anto wa lokumu wa lo wodja woleki lokumu,Wanɛ wele oma le wɔ mbakatombe luudu l’Isariyɛlɛ!
2 Nyete otsha la Kalinɛ ndo nyende.
Oma lɛkɔ, nyotshu otsha la Hamatɛ+ ka woke,Ndo nyoholɔ otsha la Ngata k’ase Filistiya.
Onde vɔ ndeka waolelo* anɛ,Kana onde ɛtshi kawɔ ka nkɛtɛ ndeka kanyu woke?
3 Onde nyambonya lushi la mpokoso+ oma lo timba tanyuNdo nyambodja ɛlɔmbwɛlɔ* k’awui wa ngala+ lɔkɔ?
4 Vɔ ndala lo mbeto y’ewanga,+ ndo vɔ nsembɔ lo nkɔsa y’etale ya tefutefu,+Walɛ ɛkɔkɔ wa waomi w’oma lo dongalonga ndo ɛsɔngɔ wa ngɔmbɛ wa wata;+
5 Vɔ tondjaka nkembo la shashimoya dia mbɔtɔnganyiya la wendjo wa lɔsɛsɛ,*+Ndo oko Davidɛ, vɔ salaka dihomɔ dia mishiki;+
6 Vɔ nɔɔka wanu lo akɔhɔ wa weke+Ndo vɔ ndjashinolaka bisɔ dioleki amɛna.
Koko vɔ hawodje yimba* lo mpokoso ka Yɔsɛfu.+
7 Ɔnkɔnɛ, vɔ wayonga anto wa ntondo l’atei wa wanɛ wayotshɔ lo lɔhɔmbɔ,+Ndo edjwelo ka wanɛ wosembemadi kayokomɛ.
8 ‘Nkum’Olongo Nkumadiɔndjɔ Jehowa akatshibe le nde ndamɛ,’*+ mbata Jehowa Nzambi kanga lolembelembe ate:‘“Dimi tonaka otako wa Jakɔbɔ,+Dimi petshaka totshoto+ tande tele la mpele dia wolo,Ndo layosembola lonya laadiko di’osomba ndo kɛnɛ koludi lɔkɔ.+
9 “‘“Ndo naka apami 10 ntshikala lo luudu 1, vɔ lawɔ wayovɔ.
10 Owotɔ* ɔmɔtshi ayoya ndjowatondja ko ayowatshumba ɔtɔi ɔtɔi. Nde ayotondja weka awɔ oma lo luudu. Oma laasɔ, nde ayotɛ ɔnɛ tshɛ lele lo mvudu ya l’etei ka luudu ate: ‘Onde onto okina ekɔ kaamɛ la yɛ?’ Ko nde ayokadimola ate: ‘Ndooko onto!’ Oma laasɔ, nde ayota ate: ‘Ɔlama! Nɛ dia ɔnɛ bu etena ka nyimola lokombo la Jehowa.’”
11 Nɛ dia Jehowa ekɔ lo mbidjanga,+Nde ayohandjola luudu la woke vwa,Ndo luudu la tshitshɛ tɛtshi tɛtshi.+
12 Onde mfalasa ndawɔka laadiko dia dive,Kana onde vɔ fusaka la ngɔmbɛ lɔkɔ?
Nɛ dia nyu nyakakadimola losembwe osongo wa lɔlɛngɔ,Ndo elowa wa losembwe ololo.+
13 Nyu ngɛnangɛnaka lo kɛnɛ kele anyanya,Ndo nyu mbutaka ɔnɛ: “Onde sho komonga la wolo* lo nkudu kaso hita?”+
14 Diakɔ diele luudu l’Isariyɛlɛ le, dimi layela wodja+ ɔmɔtshi dia nyɔlɔsha,’ mbata Jehowa kanga lolembelembe,‘Ndo vɔ wayonyɔhɛnyahɛnya oma la Lɛbɔ-Hamatɛ*+ polo lo Okidi w’ashi* wa Araba.’”
Nɔtɛ ka l'ɛse ka dikatshi
^ Kana “wamboyakoka.”
^ Mɛnamaka dia ɔsɔ mendanaka la diolelo dia Juda ndo dia Isariyɛlɛ.
^ Tshɛk,. “edjaselo.”
^ Kana “ehomahoma k’eshinga.”
^ Tshɛk., “hawotate hemɔ.”
^ Kana “le anima ande.”
^ Tshɛk., “Ɔnango she.”
^ Tshɛk., “kondjaɔsɛ nseke.”
^ Kana “mbɔtwɛlɔ ka Hamatɛ.”
^ Enda Elembetshielo.
