Amɔsɛ 7:1-17
7 Nkum’Olongo Nkumadiɔndjɔ Jehowa akamɛnya dui nɛ: Eenda, nde akatome olui w’akata w’ɛndjɔ etena kakatatɛ ntomba diononɛ di’ekomelo.* Ɔsɔ aki diononɛ di’ekomelo l’ɔkɔngɔ wa vɔ nkamba adiyo wa laka nkumekanga.
2 Lam’akashidiya olui ɔsɔ ndɛ tombatomba dia lo wodja, dimi lakate nte: “Nkum’Olongo Nkumadiɔndjɔ Jehowa le, lam’alangayɛ, dimanyiyawɔ!+ Ngande wakoka Jakɔbɔ ntshikala la lɔsɛnɔ?* Nɛ dia nde ekɔ wɔdu!”+
3 Ɔnkɔnɛ, Jehowa akanyomenda* dui sɔ.+ Jehowa akate ate: “Diɔ hadiotosalema.”
4 Nkum’Olongo Nkumadiɔndjɔ Jehowa akamɛnya dui nɛ: Eenda, Nkum’Olongo Nkumadiɔndjɔ Jehowa akelɛ dilanya lo nkamba la dja. Yɔ yakonya nkushi ya weke y’angunda ndo yakatshumbe ɛtshi ka nkɛtɛ.
5 Oma laasɔ, dimi lakate nte: “Nkum’Olongo Nkumadiɔndjɔ Jehowa le, lam’alangayɛ, shimba+ dui sɔ. Ngande wakoka Jakɔbɔ ntshikala la lɔsɛnɔ?* Nɛ dia nde ekɔ wɔdu!”+
6 Ɔnkɔnɛ, Jehowa akanyomenda* dui sɔ.+ Nkum’Olongo Nkumadiɔndjɔ Jehowa akate ate: “Diɔ lawɔ nto hadiotosalema.”
7 Kɛnɛ kakandamɛnya tɔ kɛnɛ: Eenda, Jehowa akemala lo ehele kakasalema la ɔkɔdi wa wɛdikelo,* ndo ɔkɔdi wa wɛdikelo waki lo lonya lande.
8 Oma laasɔ, Jehowa akamimbola ate: “Kakɔna kɛnayɛ na Amɔsɛ?” Ko dimi lakate nte: “Ɔkɔdi wa wɛdikelo.” Oma laasɔ, Jehowa akate ate: “Dimi lambodja ɔkɔdi wa wɛdikelo l’atei wa wodja ami w’Isariyɛlɛ. Dimi hantowadimanyiya+ nto.
9 Ahole wa la diko w’Isaka+ wayoyala tɔngɔ to, ndo ahole w’ekila w’Isariyɛlɛ wayolanyema;+ ndo dimi layɔlɔsha luudu la Jɛrɔbɔama la lokuwa la ta.”+
10 Amaziya omvutshi wa la Bɛtɛlɛ+ akatomɛ Jɛrɔbɔama+ nkumekanga k’Isariyɛlɛ dui nɛ ate: “Amɔsɛ ekɔ lo mbidja sheke l’atei wa luudu l’Isariyɛlɛ+ dia kɔlɔsha. Wodja hawoyokoka mbikikɛ ɛtɛkɛta ande tshɛ.+
11 Nɛ dia Amɔsɛ ekɔ lo mbuta ate: ‘Jɛrɔbɔama ayovɔ la lokuwa la ta ndo ndooko onyake Isariyɛlɛ ayotshɔ lo lɔhɔmbɔ oma lo wodja awɔ.’”+
12 Ko Amaziya akatɛ Amɔsɛ ate: “Wɛ ɔmɛnyi wa waɛnɛlɔ le, tshɔka, lawɔ etale otsha lo wodja wa Juda, tokondja mapa* lɛkɔ ndo wɛ mbeyaka tota prɔfɛsiya+ lɛkɔ.
13 Koko wɛ hayohomba mbuta prɔfɛsiya la Bɛtɛlɛ,+ nɛ dia tɔ kekɔ tɛmpɛlɔ k’ekila ka nkumekanga+ ndo luudu la diolelo.”
14 Oma laasɔ, Amɔsɛ akakadimola Amaziya ate: “Dimi komonga omvutshi kana ɔna omvutshi; koko laki olami wa dongalonga,+ ndo lakakokɛka esongo wa lokumu watɔ elowa wa fingo.*
15 Koko Jehowa akaminya oma lɛnɛ akamalamaka dongalonga ndo Jehowa akambutɛ ate: ‘Tshɔka, tote wodja ami w’Isariyɛlɛ+ prɔfɛsiya.’
16 Laasɔ kakianɛ, hokamɛ ɔtɛkɛta wa Jehowa: ‘Wɛ ekɔ lo mbuta wate: “Totake prɔfɛsiya lo dikambo di’Isariyɛlɛ,+ ndo tosambishake+ lo dikambo dia luudu la Isaka.”
17 Ɔnkɔnɛ Jehowa kata ate: “Wadɛyɛ ayonga numba lo osomba ndo wayodiaka anayɛ w’apami la anayɛ wa wamoto la lokuwa la ta. Wodja ayɛ wayokahanyema la ɔkɔdi wa yɛdikɔ ndo wɛmɛ ayovɔ lo wodja wa mindo. Ndooko onyake, Isariyɛlɛ ayotshɔ lo lɔhɔmbɔ oma lo wodja awɔ.”’”+
Nɔtɛ ka l'ɛse ka dikatshi
^ Mbuta ate lo Ngɔndɔ ka ntondo ndo ka hende.
^ Tshɛk., “memala?”
^ Kana “akanyange lo.”
^ Tshɛk., “memala?”
^ Kana “akanyange lo.”
^ Kana “ɔkɔdi wele la dive kana lowolo kana diwomba dialɛndalɛnda.”
^ Tshɛk., “tole mapa.”
^ Kana “laki omamudi w’elowa wa fingo w’oma l’osongo wa lokumu.”
