Amɔsɛ 9:1-15
9 Dimi lakɛnyi Jehowa+ emadi laadiko dia elambwelo, ndo nde akate ate: “Kɔmɔla ɔtɛ w’ekundji, ko kɛnɛ kele l’ɛse kayosukasuka. Hemboladiɔ lo ɛtɛ, ko dimi layodiaka atshikadi awɔ la lokuwa la ta. Ndooko onto layolawɔ layoka, ndo ndooko layohemba ndjahandja layotondoya.+
2 Naka vɔ ntshima Diombo* dia ndjashɛ,Lonya lami layowaɔsa oma lɛkɔ;Ndo naka vɔ mbidɛ l’olongo,Dimi layowaholoya oma lɛkɔ.
3 Ndo naka vɔ ndjashɛ lo shɔdi ya Karamɛlɛ,Dimi layowayanga ndo layowaɔsa+ oma lɛkɔ.
Naka vɔ ndjashɛ oma lo washo ami l’ɛse ka ndjale,Dimi layodjangɛ oloyi dia mbalumata lɛkɔ.
4 Naka atunyi awɔ mbatɔla lo lɔhɔmbɔ,Dimi layodjangɛ lokuwa la ta, ko lɔ layowadiaka+ lɛkɔ;Dimi layoshikikɛ washo ami le wɔ lo kɔlɔ, koko aha lo dimɛna.+
5 Nɛ dia Nkum’Olongo Nkumadiɔndjɔ, Jehowa kanga lolembelembe kele Ɔnɛ latonandaka wodja,*Ko vɔ ndɛlɔ,+ ndo wanɛ tshɛ wadjasɛ lɔkɔ wayosala otanda;+Ndo vɔ tshɛ wayodɛ oko Nilɛ,Ndo wayokitakita oko Nilɛ ka l’Edjibito.+
6 ‘Ɔnɛ laka dibandola diande l’olongoNdo lashikikɛ kɛnɛ kakandake* laadiko dia nkɛtɛ;Ɔnɛ latshumanya ashi wa ndjale,Dia mbahongola laadiko dia nkɛtɛ+Jehowa kele lokombo+ lande.’
7 Jehowa kata ate: ‘Ase Isariyɛlɛ le, onde nyu bu oko ana w’aseka Kusha le mi?
Onde dimi kotondja Isariyɛlɛ oma lo wodja w’Edjibito,+Ase Filistiya oma la Kɛrɛtɛ,+ ndo ase Suriya oma la Kirɛ?’+
8 ‘Eenda, washo wa Nkum’Olongo Nkumadiɔndjɔ Jehowa wekɔ lo menda diolelo dia pɛkato,Nde ayodishila oshiki oma lo wodja.+
Koko dimi hantolanya luudu la Jakɔbɔ+ tshɛ lo tshɛ,’ mbata Jehowa.
9 ‘Nɛ dia eenda, dimi lambodja didjango,Ndo dimi layoyonga luudu l’Isariyɛlɛ l’atei wa wedja+ tshɛ,Oko watoyongaka onto djongɔ,Ko ndooko lɔwɔkɔ layɔkɔ la nkɛtɛ.
10 Wanɛ tshɛ wasala pɛkato l’atei w’anto ami wayovɔ la lokuwa la ta,Wanɛ wata vate: “Mpokoso hatosukana ndo hatokoma le so.”’
11 ‘Lushi lɔsɔ, dimi layonyiya tshombotombo* ya Davidɛ+ yakanyukɔ,Dimi layɔlɔngɔsɔla ɛlɔngɛ,*Ndo layɔlɔngɔsɔla ahole wakayalana;Dimi layoyika nto oko lo nshi y’edjedja,+
12 Dia vɔ mbɔsa kɛnɛ katshikala la Ɛdɔmɛ,+Ndo wedja tshɛ wele lokombo lami lakelamɛ lɛkɔ,’ mbata Jehowa, ɔnɛ lasala dui sɔ.
13 Jehowa kata ate: ‘Eenda, nshi yekɔ lo ndjaye,Yele ɔnɛ lafusa ayohomana la ominyi,Ndo omamudi w’elowa la ɔmɛmbi wa ntɔngɔ;+Akona wayɔlɔsha wanu wa mpɛ,+Ndo tokonakona tshɛ tayowakɛdia.*+
14 Dimi layokaloya wodja ami Isariyɛlɛ+ wakandama mfumbe,Ndo vɔ wayonyomoka esomba wakalanyema, ko wayodjasɛ lɔkɔ;+Vɔ wayokamba dikambɔ dia vinyɔ, ko wayɔnɔ wanu+ w’oma lɔkɔ,Ndo wayosala tojardɛ, ko wayɔlɛ elowa+ w’oma lɔkɔ.’
15 ‘Dimi layowaonɛ lo wodja awɔ,Ndo vɔ hawotokundɔma ntoOma lo wodja awɔ wakamawasha,’+ mbata Jehowa Nzambi kayɛ.”
Nɔtɛ ka l'ɛse ka dikatshi
^ Kana “Sheɔlɛ,” mbuta ate odimu a pɛngando. Enda Elembetshielo.
^ Kana “nkɛtɛ.”
^ Kana “nsambe k’obolonga; luudu l’eombelo.”
^ Kana “luudu la dipɛma; hiombo.”
^ Kana “ɛlɔngɛ ayɔ.”
^ Tshɛk., “tayɔlɛlɔ.”