Danyɛlɛ 1:1-21
1 Lo ɔnɔnyi wa 3 w’ɛlɔmbwɛlɔ ka Jɛhɔyakima+ nkumekanga ka Juda, Nɛbukadinɛza nkumekanga ka Babilɔna akaye la Jɛrusalɛma ko akayidinge.+
2 Ko Jehowa akakimɔ Jɛhɔyakima nkumekanga ka Juda lo anya ande,+ kaamɛ la diangɔ dimɔtshi dia lo luudu* la Nzambi ka mɛtɛ, ko nde akaditɔlɛ lo wodja wa Shinara*+ lo luudu* la jambizambi yande. Nde akakitsha diangɔ diakɔ lo eombelo ka jambizambi yande.+
3 Ko nkumekanga akadjangɛ Ashɛpɛnazɛ owandji wa ɛnɛnɛ ande wa laka nkumekanga dia mbela ase Isariyɛlɛ* amɔtshi, mbidja ndo aseka owandji ndo aseka ɛlɔhɛ.+
4 Vɔ wakahombe monga ɛlɔngɔlɔngɔ* waha la ɛkɔmɔ, wele la ɛnamelo ka dimɛna, wele la lomba, ewo ndo shɛnɔdi,+ ndo wele la akoka wa nkamba lo luudu la nkumekanga. Nde akahombe mbaetsha ofundelo ndo ɔtɛkɛta w’ase Kaladiya.
5 Ndo nto, nkumekanga akaafundɛ mbo ya ndɛ ya lushi la lushi oma lo diangɔ di’amɛna diakalɛka nkumekanga ndo wanu wakandanɔka. Vɔ wakahombe ndowanyema* l’edja ka ɛnɔnyi 3, ndo l’ekomelo k’etena kɛsɔ vɔ wakahombe mbɔtɔ l’olimu wa nkumekanga.
6 L’atei awɔ mbaki ana amɔtshi w’oma lo dioho* dia Juda: Danyɛlɛ,*+ Hananiya,* Mishaɛlɛ* ndo Azariya.*+
7 Ko owandji w’ɛnɛnɛ wa laka nkumekanga akawaɔlɛ nkombo;* nde akɔlɛ Danyɛlɛ ɔnɛ Bɛlɛtɛshaza,+ Hananiya ɔnɛ Shadrakɛ, Mishaɛlɛ ɔnɛ Meshakɛ ndo Azariya ɔnɛ Abɛdɛ-Nɛngɔ.+
8 Koko Danyɛlɛ akɔshi yɛdikɔ l’otema ande dia nde hatoyadja mindo la diangɔ di’amɛna diakalɛka nkumekanga kana la wanu wakandanɔka. Ɔnkɔnɛ, nde akalɔmbɛ owandji w’ɛnɛnɛ wa laka nkumekanga lotshungɔ diaha nde ndjadja mindo lo yoho shɔ.
9 Ko Nzambi ka mɛtɛ akasale dia Danyɛlɛ mpomɔ lokolo l’ɔlɔ ndo mbokama kɛtshi+ le owandji w’ɛnɛnɛ wa laka nkumekanga.
10 Koko owandji w’ɛnɛnɛ wa laka nkumekanga akatɛ Danyɛlɛ ate: “Dimi mbokaka nkumɛmi nkumekanga wɔma, ɔnɛ lakanyofundɛ kɛnɛ kahombanyu ndɛ ndo nnɔ. Kakɔna kayotomba naka nde nyɛna la ɛnamelo ka kɔlɔ efula oleki ɛlɔngɔlɔngɔ* ekina wa lo lɔlɔnga lanyu? Nyu nyayɔmɛndja* onongo la ntondo ka nkumekanga.”
11 Koko Danyɛlɛ akatɛ olami wakasɔnama oma le owandji w’ɛnɛnɛ wa laka nkumekanga dia namaka Danyɛlɛ, Hananiya, Mishaɛlɛ ndo Azariya ate:
12 “Lam’alangayɛ, hemba ekambi ayɛ l’edja ka nshi 10, ndo watoshake akatshikatshi dia ndɛka la ashi ato dia nɔka;
13 kele koyɛdike ɛnamelo kaso la ɛnamelo ka ɛlɔngɔlɔngɔ* walɛ diangɔ di’amɛna dialɛ nkumekanga, oma laasɔ, koyosale ekambi ayɛ lo ndjela kɛnɛ kayoyɛna.”
14 Ko nde aketawɔ kanyi yawɔ ndo akaahembe l’edja ka nshi 10.
15 L’ekomelo ka nshi 10, ɛnamelo kawɔ kaki dimɛna efula ndo waki la alemba w’amɛna* oleki ɛlɔngɔlɔngɔ* ekina tshɛ wakalɛka diangɔ di’amɛna diakalɛka nkumekanga.
16 Ɔnkɔnɛ, olami akanyaka diangɔ diawɔ di’amɛna diakalɛka nkumekanga ndo wanu awɔ ko akawashaka akatshikatshi.
17 Ko Nzambi ka mɛtɛ akasha ɛlɔngɔlɔngɔ* 4 ɛsɔ ewo ndo shɛnɔdi lo weho tshɛ w’ofundelo ndo lomba; ndo Danyɛlɛ akalongola yimba lo weho tshɛ wa waɛnɛlɔ ndo alɔ.+
18 L’ekomelo k’etena kakashikikɛ nkumekanga dia mbaela,+ owandji w’ɛnɛnɛ wa laka nkumekanga akawaela la ntondo ka Nɛbukadinɛza.
19 Etena kakatɛkɛta nkumekanga la wɔ, ndooko ɔtɔi l’atei wa olui awɔ laki oko Danyɛlɛ, Hananiya, Mishaɛlɛ ndo Azariya;+ ko vɔ wakatetemala nkamba la ntondo ka nkumekanga.
20 Lo akambo tshɛ walɔmba lomba ndo yimba wakawambolaka nkumekanga, nde akaatane dia vɔ ndeka mbala 10 ɛlɔmbɛdi tshɛ wakasalaka awui wa maji ndo asaki w’awolo+ tshɛ waki lo diolelo diande di’otondo.
21 Ko Danyɛlɛ akatshikala lɛkɔ polo l’ɔnɔnyi wa ntondo w’ɛlɔmbwɛlɔ ka nkumekanga Kurɔ.+
Nɔtɛ ka l'ɛse ka dikatshi
^ Kana “tɛmpɛlɔ.”
^ Mbuta ate Babilɔna.
^ Kana “tɛmpɛlɔ.”
^ Tshɛk., “ana wa Isariyɛlɛ.”
^ Tshɛk., “ana.”
^ Kana ondo “ndeshama.”
^ Kitshimudi ate: “Jehowa ambokimanyiya.”
^ Ondo kitshimudi ate: “Akɔna ele oko Nzambi?”
^ Kitshimudi ate: “Jehowa amboka kɛtshi.”
^ Tshɛk., “ana w’apami.”
^ Kitshimudi ate: “Nzambi kele Shushi yami.”
^ Mbuta ate nkombo y’ase Babilɔna.
^ Tshɛk., “nyayɛndja ɔtɛ ami.”
^ Tshɛk., “ana.”
^ Tshɛk., “ana.”
^ Tshɛk., “wata w’emunyi.”
^ Tshɛk., “ana.”
^ Tshɛk., “ana.”
