Danyɛlɛ 11:1-45
11 “Lo ɔnɔnyi wa ntondo w’ɛlɔmbwɛlɔ ka Dariyo+ ose Mediya, dimi lakemala dia mbokeketsha ndo mbosha wolo.*
2 Kɛnɛ kayangami kotɛ wonya ɔnɛ kekɔ mɛtɛ:
“Eenda, nkumi ya dikanga nkina 3 yayemala* dikambo dia Pɛrɛsiya ndo ka 4 ayɔmɔtshanya lokema la ɛngɔnyi ndeka nkina tshɛ. Ndo lam’ayondonga la wolo l’ekimanyielo ka ɛngɔnyi ande, nde ayonyiya ɛngɔ tshɛ dia ndɔsha diolelo dia Ngirika.+
3 “Nkumekanga ka wolo ayemala ndo ayolɛ la lowandji l’efula+ ndo ayosalaka oko walangande.
4 Koko lam’ayondemala, diolelo diande diayɔɔkɔ ndo diayokahanyema otsha le mpɛpɛ 4 y’olongo,+ koko aha le tokanula tande ndo aha oko la lowandji lakandolɛka; nɛ dia diolelo diande diayokundɔma ko diayotshɔ le anto akina koko aha le wɔ.
5 “Nkumekanga ka sidɛ ayonga la wolo, mbuta ate owandji ande ɔmɔtshi; koko ɔmɔtshi ayowɔlɛndja ndo ayolɛ la lowandji l’efula, ndeka wolo w’ɛlɔmbwɛlɔ ka onto ɔsɔ.
6 “L’ɔkɔngɔ wa ɛnɔnyi ɛmɔtshi, vɔ wayodja sheke ndo ɔna womoto laki nkumekanga ka sidɛ ayotshɔ le nkumekanga ka nɔrdɛ la oyango wa tookana dimɛna. Koko ɔna womoto akɔ hatotshikala la wolo wa lonya lande; ndo nkumekanga kɛsɔ hatemala oyadi lonya lande; ndo ɔna womoto akɔ ayokimɔma nde la wanɛ wayowɔtɔla ndo ɔnɛ lakasale dia nde mbotɔ ndo ɔnɛ lasala dia nde monga la wolo lo tena sɔ.
7 Ndo onto ɔmɔtshi oma lo dimɔnga di’edio ande ayemala lo dihole diande, ko nde ayoya le asɔlayi ndo ayoya dia ndjɔlɔsha ngele ya nkumekanga ka nɔrdɛ ndo ayowalɔsha ko ayɔlɛndja.
8 Ndo kaamɛ la tozambizambi tawɔ, la dikishi diawɔ dia mbolo, la diangɔ diawɔ dia nɛmɔ* dia mfɛsa ndo dia paonyi ndo la mfumbe, nde ayoya lo Edjibito. L’edja ka ɛnɔnyi ɛmɔtshi, nde ayangana etale la nkumekanga ka nɔrdɛ,
9 ɔnɛ layoya ndjɔlɔsha diolelo dia nkumekanga ka sidɛ, koko ayokalola lo wodja ande hita.
10 “Lo kɛnɛ kendana la anande w’apami, vɔ wayoyalɔngɔsɔla dia ndɔ ta ndo wayotshumana olui wa woke w’asɔlayi efula. Nde mɛtɛ ayotshɔ otsha la ntondo ndo ayombɔ lo wodja w’otondo oko elola. Koko nde ayokalola ndo ayɔlɔsha ta lo mboka k’otondo polo lo longele lande.
11 “Nkumekanga ka sidɛ ayodunganɛ la nkɛlɛ, ayotomba ko ayotɔlɔ la nde, mbuta ate nkumekanga ka nɔrdɛ; ndo nde ayosanganya leemba la woke l’anto, koko leemba lakɔ layokimɔma lo anya wa nkumekanga kɛsɔ.
12 Ko leemba lakɔ layɛmbama. Otema ande wayoyadiya ndo nde ayɔkɔsha nunu akumi; koko nde hatokamba la wolo wayonga la nde.
13 “Ko nkumekanga ka nɔrdɛ ayokalola ndo ayotshumanya olui a woke w’anto ndeka wa ntondo; ndo l’ekomelo ka tena, l’ɔkɔngɔ wa ɛnɔnyi ɛmɔtshi, nde mɛtɛ ayoya la leemba la woke la asɔlayi ndo la diangɔ efula.
14 Lo tena sɔ, anto efula wayemala dia ndɔsha nkumekanga ka sidɛ.
“Ndo anto wa ngala* w’oma l’atei w’anto ayɛ wayɔtɔlama vɔ la wɔ dia tosala la wolo dia ɛnɛlɔ kɛmɔtshi kotshama; koko vɔ wayotakana.
15 “Ko nkumekanga ka nɔrdɛ ayoya ndo ayoka lokombo l’odingelo, ko ayɔsa osomba wodingami la mpele. Ndo anya* wa sidɛ hawotemala kaamɛ ndo apami ande wakasɔnama; ndo vɔ hawotonga la wolo wa memala.
16 Ɔnɛ layaye dia ndjɔɔlɔsha ayosala kɛnɛ kalangande ndo ndooko onto layemala la ntondo kande. Nde ayemala lo wodja wa Ɔlɛngɛlɔ*+ ndo dikoka dia nshila oshiki diayonga lo lonya lande.
17 Nde ayɛdiya elungi kande* dia ndja la wolo tshɛ wa diolelo diande ndo diokanelo dia popo diayosalema kaamɛ la nde; ndo nde ayosala akambo lo yoho yalowana. Lo kɛnɛ kendana la ɔna womoto laki wamato, wayowoshande dia nde mbolanya. Ko ɔna womoto akɔ hatemala ndo nde hatotetemala monga onto ande.
18 Nkumekanga kakɔ ayokadimola elungi kande otsha lo ngelo ya l’omamu w’ashi ndo ayɔsa efula. Ndo kɔmanda kɛmɔtshi ayosala dia lɔtɛngɔ l’oma le nde nkomɛ lo dikambo diande, ko lɔtɛngɔ lande halotonga nto. Nde ayolikaloya otsha le onto akɔ.
19 Oma laasɔ, nde ayɛdiya elungi kande otsha lo ngele ya wodja ande hita ndo nde ayotakana, ko nde ayɔkɔ ndo nde hatotanema nto.
20 “Lo dihole diande kayonga ɔnɛ lasala dia ɔkɔngɔdi* mbeteta lo diolelo dia diambo di’otondo, koko lo nshi ngana tsho nde ayɔkwama kaanga mbele aha lo nkɛlɛ kana lo ta.
21 “Ndo lo dihole diande kayonga onto ɔmɔtshi lɔnywama* ndo hawotowosha lɔnɛnɛ la diolelo; ko nde ayɔtɔ lo etena ka lotui tshitshi* ko ayɔsa diolelo oma lo lokeso.
22 Ko anya* wa elola wayonyɛma tshɛ l’ɔtɛ ande ndo vɔ wayɔkwama; oko wayonga Ɔnɔmbɔdi+ wa sheke.+
23 L’ɔtɛ wa sheke yayowodja la nde, nde ayosala lokeso ndo ayonɛɛ ndo ayoyala la wolo lo tshimbo ya wodja wa tshitshɛ.
24 Lo etena ka lotui tshitshi,* nde ayotshɔ lo tenyi dioleki ɔngɔnyi* dia lo prɔvɛnsɛ ndo ayosala kɛnɛ kaki kosala washe ndo washɛwɔ. Diangɔ dia dimbo ndo dia lɔkɔsɔla ndo lomombo mbayondokahanya l’atei awɔ; ndo nde ayodja toseke dia ndɔsha ahole wodingami la mpele, koko paka etena 1 keto.
25 “Ko nde ayotshumanya wolo ande ndo otema ande dia ndɔsha nkumekanga ka sidɛ la olui wa woke wa asɔlayi ndo nkumekanga ka sidɛ ayoyalɔngɔsɔla dia ndɔ ta la shakasaka ya leemba la asɔlayi wa wolo. Ko nde hatemala, nɛ dia wayowɔtwɛ toseke.
26 Ndo wanɛ walɛ diangɔ diande di’amɛna mbayela ɛkwɛlɔ kande.
“Asɔlayi ande wayohandjɔ* vwa ndo edo w’efula kawɔ wayokalema kala kala.
27 “Lo kɛnɛ kendana la nkumi ya dikanga 2 shɔ, etema awɔ wayɛlɛ dia nsala kɛnɛ kele kɔlɔ ndo vɔ wayodjasɛ lo mɛsa 1 watanɛ kashi lam’asawɔ. Koko ndooko dui diayolowana, nɛ dia ekomelo kekɔ dikambo dia etena kakashikikɛma.+
28 “Ko nde ayokalola lo wodja ande la lokema la diangɔ ndo otema ande wayɔlɔshana la sheke y’ekila. Nde ayosala akambo lo yoho yalowana ko ayokalola otsha lo wodja ande.
29 “Lo etena kakashikikɛma, nde ayokalola ndo ayoya dia ndjɔlɔsha sidɛ. Koko etena kɛsɔ hatonga oko wakidiɔ ntondo,
30 nɛ dia masuwa w’oma la Kitimɛ+ wayoya dia ndjɔɔlɔsha ndo nde ayoshama nsɔnyi.
“Nde ayokalola ko ayohongola nkɛlɛ* otsha le sheke+ y’ekila ndo ayosala akambo lo yoho yalowana; ndo nde ayokalola ko ayodja yimba le wanɛ wasɛka sheke y’ekila.
31 Ko anya* wayemala, wayoya oma le nde; vɔ wayɔnyɔla tɛmpɛlɔ k’ekila,+ longele ndo wayonya olambo wa tena tshɛ.+
“Vɔ wayokitsha ɛngɔ ka wɔnɔnyi katonga elanyelo.+
32 “Ko wanɛ wasala akambo lo yoho ya kɔlɔ dia ndɔsha sheke yakɔ, nde ayowalɔmbɔla otsha lo wetshelo w’ɛtɔlɔki lo tshimbo ya ɛtɛkɛta wa lokeso.* Koko anto weya Nzambi kawɔ wayɔlɛndja ndo wayosala akambo lo yoho yalowana.
33 Ndo wanɛ wele la shɛnɔdi+ l’atei w’anto wayosha anto efula yimba. Ndo vɔ wayotakana la lokuwa la ta ndo la loombe la dja, la lɔhɔmbɔ ndo la wombelo wa diangɔ l’edja ka nshi mɔtshi.
34 Koko lam’ayowotakana, vɔ wayokimanyiyama yema ndo efula wayowayela lo tshimbo ya ɛtɛkɛta w’ɔsɛlɔ.*
35 Anto amɔtshi wele la shɛnɔdi wayotakana, dia nkamba olimu wa wɛdiɛlɔ l’ɔtɛ awɔ ndo dia nsala osolelo ndo wodjelo wa pudipudi+ polo lo etena k’ekomelo; nɛ dia tɔ kekekɔ dikambo dia etena kakashikikɛma.
36 “Nkumekanga ayosala oko walangande ndo nde ayoyadiya ndo ayoyatombola la diko dia jambizambi tshɛ; ndo nde ayɔtɛkɛta akambo wa diambo otsha le Nzambi ka waa nzambi.+ Nde ayotondoya polo lam’ayokoma nkɛlɛ l’ekomelo; nɛ dia kɛnɛ kamboshikikɛma pombaka salema.
37 Nde hatɔlɛnya Nzambi ka washe; ndo nde hatɔlɛnya nsaki ka wamato ndo hatɔlɛnya jambizambi nkina tshɛ, koko nde ayoyadiya laadiko dia tshɛ.
38 Koko lo dihole dia nsala ngasɔ,* nde ayosha lotombo le jambizambi ya ngele; jambizambi yaki washe kombeya mbayondosha lotombo l’ekimanyielo ka paonyi la mfɛsa ndo mbɔkɔ y’akɛsɔ la diangɔ di’amɛna.*
39 Nde ayosala akambo lo yoho yalowana dia ndɔsha ngele yoleki nyingama la mpele, kaamɛ la* jambizambi y’ase wedja. Nde ayokimɔ lotombo l’efula le wanɛ wawosha kɛnɛmɔ* ndo nde ayosala dia vɔ mbolɛ l’atei w’anto efula; ndo nde ayatola* nkɛtɛ lo oshinga ɔmɔtshi.
40 “Lo etena k’ekomelo, nkumekanga ka sidɛ ayɔlɔshana la nde la otshindjiyelo* ndo dia mbɔlɔsha, nkumekanga ka nɔrdɛ ayoya esadi eto la pusupusu, la ambahemi wa mfalasa ndo la masuwa efula; nde ayɔtɔ lo wedja ndo ayombɔ lo wodja w’otondo oko elola.
41 Nde ayɔtɔ ndo lo wodja wa Ɔlɛngɛlɔ*+ ndo wedja efula wayotakana. Koko wɛnɛ wayohandɔ oma lo anya ande vɔ ɛnɛ: Ɛdɔmɛ la Mɔaba ndo etenyi koleki ohomba ka ase Amɔna.
42 Nde ayotetemala nsembola lonya lande dia ndɔsha wedja; ndo lo kɛnɛ kendana la wodja wa Edjibito, vɔ hawotohandɔ.
43 Ndo nde ayolɛ laadiko dia diangɔ dia nɛmɔ dioshɛmi dia paonyi ndo dia mfɛsa ndo laadiko dia diangɔ di’amɛna* tshɛ dia lo Edjibito. Ndo ase Libiya la ase Etiyɔpiya wayoyela lokolo lande.*
44 “Koko nkumu y’oma lo ɛstɛ* ndo y’oma lo nɔrdɛ yayowohandjola wɔɔngɔ, ko nde ayotomba la nkɛlɛ k’efula dia toshila oshiki ndo dia tolanya anto efula.
45 Ko nde ayohika mvudu yande y’apɛma ya lowandji* lam’asa ndjale ka woke la dikona di’ekila dia Ɔlɛngɛlɔ;*+ ndo nde ayokoma lo ekomelo kande ko ndooko onto layowokimanyiya.
Nɔtɛ ka l'ɛse ka dikatshi
^ Kana “ndo oko longele le nde.”
^ Kana “yayonɛɛ.”
^ Kana “dia oshinga wolo.”
^ Kana “ana wa apami waki apɔtwanyi.”
^ Kana “asɔlayi.”
^ Kana “Olangala.”
^ Kana “ayoyashikikɛ.”
^ “Ɔkɔngɔdi,” ondo ɔnɛ lafutshanya mikanda. Kana “owandji w’olimu.”
^ Kana “lahetshama.”
^ Kana ondo “aha la ɔhɛmwɛlɔ.”
^ Kana “asɔlayi.”
^ Kana ondo “aha la ɔhɛmwɛlɔ.”
^ Tshɛk., “wata.”
^ Kana “wayɛmbama la elola.”
^ Kana “ayɔtɔlɔnganya odudu ande.”
^ Kana “asɔlayi.”
^ Kana “ɛtɛkɛta wangɛnyangɛnya atoyi; awui wele bu mɛtɛ.”
^ Kana “ɛtɛkɛta wangɛnyangɛnya atoyi; awui wele bu mɛtɛ.”
^ Kana “lo dihole diande.”
^ Kana “di’oshinga wolo.”
^ Kana “ayokimanyiyama oma le.”
^ Kana “ayokahanya.”
^ Kana ondo “le onto tshɛ leyande.”
^ Kana “ayɔkɔmana nseke la nde.”
^ Kana “Olangala.”
^ Kana “di’oshinga wolo.”
^ Kana “wayowoyela.”
^ Kana “ehotwelo ka wonya.”
^ Kana “luudu la nkumekanga.”
^ Kana “Olangala.”