Danyɛlɛ 5:1-31
5 Nkumekanga Bɛlɛshaza+ akasale fɛtɛ ka woke dikambo dia ɛlɔhɛ ande kinunu (1 000) ndo nde akanɔka wanu la ntondo kawɔ.+
2 Lam’akandadjɔ wanu, Bɛlɛshaza akadjanga dia tela akɔhɔ wa paonyi ndo wa mfɛsa wakatɔsa Nɛbukadinɛza ka she oma lo tɛmpɛlɔ ka la Jɛrusalɛma,+ dia nkumekanga nde la ɛlɔhɛ ande, eseka ande ndo wadiɛnde w’eseka nnɔ lɔkɔ.
3 Ko wakela akɔhɔ wa paonyi wakawatɔsa oma lo tɛmpɛlɔ ka luudu la Nzambi la Jɛrusalɛma, ko nkumekanga nde la ɛlɔhɛ ande, eseka ndo wadiɛnde w’eseka wakanɔ lɔkɔ.
4 Vɔ wakanɔ wanu ndo wakatombola tozambizambi ta paonyi ndo ta mfɛsa, ta nkonga, ta mbolo, t’esongo ndo ta ave.
5 Ko etena kakɔ mpita ya lonya l’onto yakɛnama ndo yakatatɛ mfunda lo ehele ka luudu la nkumekanga mbɛlanɛ la ekundji ka tala, ndo nkumekanga akakoke mɛna ɔkɔngɔ wa lonya lakɔ etena kakalafundaka.
6 Ko elungi ka nkumekanga kakakasɔ* ndo tokanyi tande takawokiya wɔma, ko lokende lande lakayɛkayɛka+ ndo adwe ande wakatatɛ nsakana.
7 Nkumekanga akate la dui dia wolo dia vɔ mbelɛ asaki w’awolo, ase Kaladiya* ndo ambeyi w’akambo wa tɔɔtɔ.+ Nkumekanga akatɛ ase tomba wa la Babilɔna ate: “Onto tshɛ layadia efundelo ɛnɛ ko mbutɛmi kitshimudi yawɔ wayowɔlɔtsha dihɔndɔ di’ebelabela, shɛnɛtɛ ya paonyi lo nkingo+ kande ndo nde ayolɛ oko onto la 3 lo diolelo.”+
8 Ko ase tomba tshɛ waki nkumekanga wakɔtɔ, koko vɔ komonga la akoka wa mbadia efundelo akɔ kana mbewoya nkumekanga+ kitshimudi yawɔ.
9 Ko nkumekanga Bɛlɛshaza akoke wɔma efula ndo elungi kande kakakasɔ; ndo ɛlɔhɛ ande wakatshimbe wɔɔngɔ.+
10 Lo ndjela kɛnɛ kakate nkumekanga ndo ɛlɔhɛ ande, wadi aki nkumekanga akɔtɔ lo luudu lɛnɛ akawasalaka dambo. Wadi aki nkumekanga akate ate: “Nkumekanga le, olombake pondjo. Tetawɔke dia tokanyi tayɛ kokiya wɔma ndo tetawɔke dia elungi kayɛ nkasɔ.
11 Ekɔ onto* ɔmɔtshi lo diolelo diayɛ lele la nyuma ka nzambi y’ekila. Lo nshi ya shɔ, osase ndo shɛnɔdi ndo lomba lele oko lomba la waa nzambi laki le nde.+ Nkumekanga Nɛbukadinɛza ka shɔ akɔɔsɔnɛ owandji wa ɛlɔmbɛdi wasala awui wa maji, asaki w’awolo, ase Kaladiya* ndo ambeyi w’akambo wa tɔɔtɔ;+ nkumekanga le, shɔ akasale ngasɔ.
12 Nɛ dia Danyɛlɛ, ɔnɛ lele nkumekanga akawɔlɛ Bɛlɛtɛshaza+ aki la nyuma ka laande ndo ewo ndo shɛnɔdi ya mbisha kitshimudi ya alɔ, dia nembetshiya ɛkɛla ndo dia nkandola akambo wa ehekesa.*+ Ɔnkɔnɛ, etawɔ dia vɔ mbelɛ Danyɛlɛ ko nde ayoyokotɛ kitshimudi.”
13 Ko wakatoya la Danyɛlɛ la ntondo ka nkumekanga. Nkumekanga akambola Danyɛlɛ ate: “Onde wɛ kele Danyɛlɛ, mfumbe k’oma la Juda+ ɔnɛ lele papa, nkumekanga, akaye la nde oma la Juda?+
14 Dimi lakoke wata lo dikambo diayɛ dia nyuma ka waa nzambi kekɔ le yɛ+ ndo dia osase, shɛnɔdi ndo lomba la laande lekɔ le yɛ.+
15 Wakela ase tomba ndo asaki w’awolo la ntondo kami dia ndjadia efundelo ɛnɛ ndo mbewoyami kitshimudi yawɔ, koko vɔ bu la akoka wa mbuta kitshimudi ya losango+ lakɔ.
16 Koko dimi lakoke wata lo dikambo diayɛ dia wɛ ekɔ la akoka wa mbisha kitshimudi+ ndo wa nkandola akambo wa ehekesa.* Ɔnkɔnɛ, naka wɛ ekɔ la akoka wa mbadia efundelo ɛnɛ ndo mbewoyami kitshimudi yawɔ, kete wayokɔlɔtsha dihɔndɔ di’ebelabela, shɛnɛtɛ ya paonyi lo nkingo ndo wɛ ayolɛ oko onto la 3 lo diolelo.”+
17 Ko Danyɛlɛ akakadimola nkumekanga ate: “Wɛ mbeyaka nama weshasha ayɛ ndo mbisha anto akina elambo ayɛ. Koko, dimi layanga mbadiɛ nkumekanga efundelo akɔ ndo layanga mbeewoya kitshimudi yawɔ.
18 Nkumekanga le, Nzambi Kaheme-Tshɛ akasha Nɛbukadinɛza shɔ diolelo ndo woke woke ndo kɛnɛmɔ ndo lɔnɛnɛ.+
19 L’ɔtɛ wa woke woke wakandawosha, anto tshɛ, wedja tshɛ, elui w’ɛtɛkɛta tshɛ wakasakaka lokomba la wɔma la ntondo kande.+ Onto tshɛ lakandalangaka ndjaka kana ntshika la lɔsɛnɔ, nde akadiakaka kana akatshikaka la lɔsɛnɔ, ndo onto tshɛ lakandalangaka nde akadiyaka kana akakitshakitshaka.+
20 Koko etena kakayala otema ande la otako ndo kakandayala la ɔtɛ wolo, polo lo nde nsala akambo la lotamanya,+ wakooholoya oma lo kiti kande ka diolelo ndo wakɔkɔsɔla kɛnɛmɔ kande.
21 Nde akatshanyema oma l’atei w’anto ndo otema ande wakayala oko otema wa nyama ndo nde akatodjasɛ kaamɛ la mponda ya l’okonda. Wakawosha adiyo dia nde ndɛka oko ngɔmbɛ ndo demba diande diakalɔyamaka la lɔpɔpɔ l’oma l’olongo polo ndo lam’akandayeya dia Nzambi Kaheme-Tshɛ kele Omboledi lo diolelo di’anto ndo nde kitshaka onto tshɛ lalangande+ laadiko diadiɔ.
22 “Koko wɛ ɔnande Bɛlɛshaza, wɛ kondjakitshakitsha lo otema ayɛ kaanga mbakayeye akambo asɔ tshɛ.
23 Koko, wɛ akayadiya dia ndɔshana la Nkumadiɔndjɔ k’olongo,+ ko wɛ akatshi dia vɔ kela akɔhɔ w’oma lo luudu lande.+ Ko wɛ la ɛlɔhɛ ayɛ, eseka ayɛ ndo wadiɛyɛ w’eseka nyakanwɛ wanu lɔkɔ ndo nyakatombodi tozambizambi ta mfɛsa ndo ta paonyi, ta nkonga, ta mbolo, t’esongo ndo ta ave, tozambizambi tahɛnyi ndooko ɛngɔ,+ tahoke ndooko ɛngɔ ndo taheye ndooko ɛngɔ. Koko wɛ hatombodi Nzambi ɔnɛ lele lomu+ layɛ ndo mboka yayɛ tshɛ yekɔ lo anya ande.
24 Ɔnkɔnɛ, lonya lakatomami oma le nde, ko efundelo ɛnɛ wakafundami.+
25 Efundelo wakafundami vɔ ɛnɛ: MƐNƐ, MƐNƐ, TƐKƐLƐ ndo PARASINA.
26 “Kitshimudi ya ɛtɛkɛta akɔ yɔ nyɛ: MƐNƐ: Nzambi ambadia nshi ya diolelo diayɛ ndo ambodikonya l’ekomelo.+
27 “TƐKƐLƐ: Wɛ ambɛdikama wotsho lo kilɔ ko ambotanema osadi saa.
28 “PƐRƐSƐ: Diolelo diayɛ diambokahanyema ndo diambokimɔma le ase Mediya la Pɛrɛsiya.”+
29 Ko Bɛlɛshaza akadjanga ndo wakalɔtsha Danyɛlɛ dihɔndɔ di’ebelabela ndo wakɔlɔtsha shɛnɛtɛ ya paonyi lo nkingo; ndo wakade ombeka lo dikambo diande, dia nde aya onto la 3 lo diolelo.+
30 Ko otsho akɔ, Bɛlɛshaza nkumekanga k’ose Kaladiya akadiakema.+
31 Ko Dariyo+ di’ose Mediya akɔshi diolelo; nde aki la ɛnɔnyi oko 62.
Nɔtɛ ka l'ɛse ka dikatshi
^ Kana “ɛnamelo ka nkumekanga kakatshikitana.”
^ Mbuta ate olui w’anto waki la diewo efula lo awui wa diendja ndo wa tɔɔtɔ.
^ Mbuta ate olui w’anto waki la diewo efula lo awui wa diendja ndo wa tɔɔtɔ.
^ Kana “pami kele la akoka.”
^ Tshɛk., “nsunola toshunyi.”
^ Tshɛk., “nsunola toshunyi.”
