Danyɛlɛ 8:1-27
8 Lo ɔnɔnyi wa 3 wa lowandji la nkumekanga Bɛlɛshaza,+ dimi Danyɛlɛ lakɛnyi ɛnɛlɔ kɛmɔtshi l’ɔkɔngɔ wa kɛnɛ kakamɛnyi ntondo.+
2 Dimi lakɛnyi ɛnɛlɔ kakɔ ndo lam’akamendaka, dimi laki la Shushana*+ dihole di’eshamelo* diele lo prɔvɛnsɛ ka Elama;+ dimi lakɛnyi ɛnɛlɔ kakɔ ndo dimi laki l’omamu w’ashi wa Ulai.
3 Lam’akamedia washo, mɛnyi ko ɔkɔkɔ w’omi+ wemadi la ntondo ka ashi akɔ ndo vɔ waki la nseke 2.+ Nseke yakɔ 2 yaki etale koko lɔmɔtshi lakaleke lokina otale ndo lɔnɛ lakaleke otale lakayotomba l’ɔkɔngɔ.+
4 Dimi lakɛnyi ɔkɔkɔ akɔ w’omi akɔmɔla otsha lo owɛstɛ ndo otsha lo nɔrdɛ ndo otsha lo sidɛ, ko ndooko nyama ka l’okonda kakakoke memala la ntondo kawɔ ndo ndooko onto lakakoke mbitsha oma lo wolo*+ awɔ. Vɔ wakasalaka kɛnɛ kakawalangaka ndo wakayadiya.
5 Dimi lakatetemalaka menda, mɛnyi ko wombe a mbudi+ wayaye oma lo owɛstɛ* wayakindola laadiko dia nkɛtɛ aha la nsakanya nkɛtɛ. Mbudi kakɔ kaki la loseke la diambo lam’asa washo+ atɔ.
6 Tɔ kakayayaka oya le ɔkɔkɔ w’omi waki la nseke 2 wakamɛnyi wemadi la ntondo ka ashi; tɔ kakayalawɔka oya le wɔ la odudu w’efula.
7 Dimi lakakiɛnyi kayasukana la ɔkɔkɔ w’omi ndo tɔ kaki la nkɛlɛ efula otsha le wɔ. Tɔ kakakɔmɔla ɔkɔkɔ w’omi ndo kakɔɔkɔla nseke yawɔ 2, ko ɔkɔkɔ akɔ komonga la wolo wa memala la ntondo katɔ. Tɔ kakakɔsha ɔkɔkɔ w’omi lo nkɛtɛ ndo kakɔhɔtshahɔtsha ko ndooko lakakoke mbotsha oma lo wolo* atɔ.
8 Oma laasɔ, wombe a mbudi wakayadiya efula, koko kam’akawonge la wolo, loseke la woke lakɔɔkɔ; ko nseke 4 ya diambo yakatombe lo dihole dialɔ otsha lo mpɛpɛ 4 y’olongo.+
9 Oma lo loseke lɔmɔtshi l’atei ayɔ mbakatombe loseke lokina la tshitshɛ ndo lɔ lakole otale efula otsha lo sidɛ ndo otsha lo ɛstɛ* ndo otsha lo Ɔlɛngɛlɔ.*+
10 Lɔ lakole otale efula polo ndo lɔ nkoma le alembe wa l’olongo ndo lɔ lakakɔsha alembe amɔtshi ndo tɔɔtɔ tɔmɔtshi la nkɛtɛ, ko lɔ lakatihɔtshahɔtsha.
11 Lɔ lakayadiya polo lo ndɔshana la Owandji wa alembe ndo wakɔɔkɔsɔla olambo wa tena tshɛ ndo dihole diakashikikɛma dikambo dia tɛmpɛlɔ kande k’ekila diakakashema.+
12 Ndo alembe amɔtshi wakakimɔma kaamɛ ndo olambo wa tena tshɛ l’ɔtɛ wa kɔlɔ; ndo lɔ lakatetemala mbikasha mɛtɛ la nkɛtɛ ndo lɔ lakasalaka akambo ko lakatondoyaka.
13 Ko dimi lakoke okilami ɔmɔtshi atɛkɛta, ndo okilami okina akatɛ ɔnɛ lakatɛkɛtaka ate: “Polo l’etena kakɔna kayotetemala+ ɛnɛlɔ ka olambo wa tena tshɛ ndo ka kɔlɔ keela elanyelo mbetɛ ndo dihole di’ekila ndo alembe diangɔ dia mpɔtshahɔtsha?”
14 Ko nde akambutɛ ate: “Polo ndo akɔlɔ la pindju nunu pende la nkama shato (2 300); ndo dihole di’ekila diayokaloyama mɛtɛ woho wakidiɔ.”
15 Dimi Danyɛlɛ lam’akamendaka ɛnɛlɔ kakɔ ndo lam’akamayangaka dia kishihodia, mbala kakɔ ɔtɔi dimi lakɛnyi ɔnɛ lakɛnama dia nde ekɔ onto emadi la ntondo kami.
16 Ko dimi lakoke dui dia onto l’atei wa Ulai,+ ko nde akawelɛ ate: “Ngabriyɛlɛ,+ sala dia onto ongo nshihodia kɛnɛ kakandɛnyi.”+
17 Ko nde akaye suke la dihole diakamemala, koko lam’akandaye, dimi lakoke wɔma efula ko lakakɔ ekukumadi. Nde akambutɛ ate: “Ɔna onto, eya dia ɛnɛlɔ kɛnɛ kekɔ dikambo dia etena k’ekomelo.”+
18 Koko etena kakandatɛkɛtaka la mi, laketama ekukumadi ndo lakalale djɔ ya baku. Ko nde akamunanda ndo akamemadia lo dihole diakamemala.+
19 Ko nde akate ate: “Dimi layanga nsala dia wɛ mbeya kɛnɛ kayosalema lo etenyi k’ekomelo ka nkɛlɛ, nɛ dia tɔ kekɔ dikambo dia etena k’ekomelo+ kakashikikɛma.
20 “Ɔkɔkɔ w’omi wele la nseke 2 wakayɛnyi wekɔ didjidji dia nkumi ya dikanga ya Mediya la Pɛrɛsiya.+
21 Mbudi k’omi kele la wɛɔsa efula, ekɔ didjidji dia nkumekanga ka Ngirika;+ ndo loseke la woke laki lam’asa washo atɔ, lekɔ didjidji dia nkumekanga ka ntondo.+
22 Lo kɛnɛ kendana la loseke lakɔɔkɔ ko nseke 4 ndjotomba lo dihole dialɔ,+ waolelo 4 w’oma lo wodja ande wayotomba, koko hawotonga la wolo oko nde.
23 “Lo etenyi k’ekomelo ka waolelo awɔ, lam’ayokoma etsha w’atshi wa kɔlɔ lo kondoko yawɔ,* nkumekanga kɛnama dia nde ekɔ la djawudi kashihodia ɛtɛkɛta wahokɛma* ayotomba.
24 Wolo ande wayonga efula, koko aha oma lo wolo ande hita. Nde ayolanya lo yɛdikɔ y’efula* ndo nde ayotondoya ndo ayosala akambo lo yoho yalowana. Nde ayolanya akanga wa wolo ndo wodja wokengami la ekilami.+
25 La mayɛlɛ ande, nde ayokamba la lokeso dia ntondoya; ndo nde ayoyadiya lo otema ande; lo etena ka lotui tshitshi,* nde ayodiaka anto efula. Nde ayemala dia ndɔsha ndo Owandji w’ewandji, koko nde ayɔkwama aha la lonya l’onto.
26 “Kɛnɛ kakatama lo ɛnɛlɔ lo dikambo dia akɔlɔ la pindju kekɔ mɛtɛ, koko wɛ pombaka nama ɛnɛlɔ kɛnɛ sheke, nɛ dia tɔ mendanaka la etena keke nshi efula la ntondo oma ko kakianɛ.”*+
27 Koko dimi Danyɛlɛ lakalɛmbɛ efula ndo lakatate hemɔ l’edja ka nshi mɔtshi.+ Oma laasɔ, dimi laketɔ ndo lakakambe olimu+ wa nkumekanga; koko dimi lakahandjɔ wɔɔngɔ la kɛnɛ kakamɛnyi ndo ndooko onto lakakoke kishihodia.+
Nɔtɛ ka l'ɛse ka dikatshi
^ Kana “Susa.”
^ Kana “luudu l’owandji; longele.”
^ Tshɛk., “lonya.”
^ Kana “ɛɔtwɛlɔ ka wonya.”
^ Tshɛk., “lonya.”
^ Kana “ehotwelo ka wonya.”
^ Kana “Olangala.”
^ Kana “nkoma l’ekomelo kawɔ.”
^ Kana “wele la diewo lo awui woshɛmi.”
^ Kana “ayela elanyelo ka diambo.”
^ Kana ondo “aha la mpɛmɔla.”
^ Kana “nshi yayaye.”
