Filɛmɔna 1:1-25
1 Dimi Pɔɔlɔ lele ose lokanu+ lo dikambo dia Kristo Yeso lekɔ kaamɛ la ɔnangɛso Timɔte+ ndo lambofundɛ Filɛmɔna, osekaso okambi wa ngandji,
2 ndo kadiyɛso Apiya ndo Arakipo+ lele osekaso ɔsɔlayi ndo etshumanelo kasangana lo luudu+ layɛ nte:
3 Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!
4 Dimi mbokaka Nzambi kami losaka tena tshɛ lam’akodjami lo alɔmbɛlɔ+ ami,
5 oko watetemalami mboka nsango yendana la mbetawɔ kayɛ ndo ngandji kokayɛ* Nkumadiɔndjɔ Yeso ndo ekilami tshɛ.
6 Dimi lekɔ lo nɔmba dia mbetawɔ kosangiyɛ l’anto akina kotshutshuya dia wɛ mbeya ɛngɔ tshɛ k’ɔlɔlɔ kele la so lo tshimbo ya Kristo.
7 Nɛ dia dimi laki la ɔngɛnɔngɛnɔ w’efula ndo lakakeketshama lam’akamoke dia ngandji kayɛ, nɛ dia etema* w’ekilami wambosalangana lo tshimbo yayɛ, ɔnalengo.
8 Diakɔ diele, kaanga mbemi la lotshungɔ l’efula la kodjangɛ lo lokombo la Kristo dia wɛ nsala kɛnɛ kele ɔlɔlɔ,
9 dimi nangaka kolaka l’ɔtɛ wa ngandji kele la yɛ ndo lo mɛna dia lekɔ woho wemi, dimi Pɔɔlɔ, osombe w’onto, ɛɛ, lele kakianɛ lo lokanu dikambo dia Kristo Yeso.
10 Dimi lambokɔsɛngasɛnga lo dikambo dia Ɔnɛsimo+ lele ɔnami hita layami tshondo ya she+ etena kemi lo lokanu.*
11 Ntondo nde aki onto l’anyanya le yɛ, koko kakianɛ nde aya ohomba le yɛ ndo le mi.
12 Dimi lambookaloya oya le yɛ, eelo, nde akɔ lele tshondo y’otema ami.*
13 Dimi lotolanga ntshikala la nde lanɛ dia nde kimanyiyakami lo dihole diayɛ etena kemi lo lokanu dikambo dia lokumu l’ɔlɔlɔ.+
14 Koko dimi haalange nsala ndooko dui aha la lolango layɛ, dia wɛ nsala ɔlɔlɔ la lolango+ layɛ hita, koko aha lotshutshuya.
15 Ondo l’ɔtɛ wa dikambo sɔ mbakandakakitɔna la yɛ lo tshanda mɔtshi* dia nde ndjokalola le yɛ lo pondjo,
16 aha nto oko mfumbe,+ koko oko onto loleki mfumbe, mbuta ate oko ɔnangɛso la ngandji+ djekoleko le mi, kete hoke le yɛ, wɛ lele la nde la diɔtɔnganelo lo demba ndo lo Nkumadiɔndjɔ!
17 Ɔnkɔnɛ, naka wɛ mbɔsakami oko ɔngɛnyi ayɛ, kete longolande dimɛna woho wotoyonongola.
18 Ndo nto, naka nde akakosalɛ kɔlɔ kɛmɔtshi kana nde nkolama ɛngɔ kayɛ kɛmɔtshi, dja dikambo sɔ l’ɔtɛ ami.
19 Dimi Pɔɔlɔ lambokofundɛ dimɛ nte: Layoyofuta kɛnɛ tshɛ kokolaminde, ndo tohɛke dia wɛ ekɔ la dibasa diami dia tshondo yayɛ wɛmɛ.
20 Ɔnalengo le, dimi nongamɛka dia nongola ekimanyielo kɛnɛ oma le yɛ l’ɔtɛ wa Nkumadiɔndjɔ: Osalanganya otema ami* l’ɔtɛ wa Kristo.
21 Lekɔ l’eshikikelo dia wɛ ayokitanyiya. Ɔnkɔnɛ lekɔ lo kofundɛ leya dia wɛ ayosala oleki ndo kɛnɛ kotshimi.
22 Koko l’etena kakɔ kaamɛ, ɔnɔngɔsɔlɛ mpango, nɛ dia lekɔ l’elongamelo dia l’ekimanyielo k’alɔmbɛlɔ anyu, dimi layokimɔma dia nkalola le nyu.*+
23 Epafrasɛ+ osekami la lo lokanu lele kaamɛ la Kristo Yeso akotomɛ mɔyɔ,
24 ndo Makɔ, Aristarako,+ Dɛmasɛ+ la Luka+ wanɛ wele asekami wa l’olimu wakotomɛ mɔyɔ.
25 Ɔlɔlɔ waheyama mbɛdika wa Nkumadiɔndjɔ Yeso Kristo wayale la yimba yakɛnɛmɔlanyu!
Nɔtɛ ka l'ɛse ka dikatshi
^ Kana “kele la yɛ otsha le.”
^ Kana “ngandji k’efula.”
^ Tshɛk., “lo ɛkɔdi.”
^ Kana “ngandji kami k’efula.”
^ Tshɛk., “wonya 1 wa ntango.”
^ Kana “ngandji kami k’efula.”
^ Kana “layotshungɔma dia nkalola le nyu.”
