Jɔɛlɛ 1:1-20
1 Ɔtɛkɛta wa Jehowa wakaye le Jɔɛlɛ,* ɔna Petuɛlɛ ɔnɛ:
2 “Nyu dikumanyi, nyohokame dui nɛ,Ndo nyu wanɛ tshɛ wadjasɛ lo wodja,* nyodje yimba.
Onde dui dimɔtshi dia nganɛ diambosalemaka lo nshi yanyuKana lo nshi ya watshɛnyu?+
3 Nyotee ananyu dui sɔ,Ndo ananyu kawotee anawɔ dui sɔ,Ndo anawɔ kawotee lɔlɔnga layela.
4 Kɛnɛ kakatshike akata w’ɛndjɔ walanya, akata w’ɛndjɔ wele elui elui wakale;+Kɛnɛ kakatshike akata w’ɛndjɔ wele elui elui, akata w’ɛndjɔ wele bu la nsala wakale;Ndo kɛnɛ kakatshike akata w’ɛndjɔ wele bu la nsala, akata w’ɛndjɔ washila oshiki wakale.+
5 Nyemɔ, nyu ambidjɔki wa wanu+ ndo nyolele!
Nyolele, nyu anɔshi wa wanu tshɛ,Nɛ dia wambonya wanu wa mpɛ oma lo enyɔ+ anyu.
6 Nɛ dia wodja ɔmɔtshi wa wolo ndo waheyama lofulo+ wamboya lo wodja ami.
Wanyu awɔ wekɔ wanyu wa ntambwɛ,+ ndo manga yawɔ yekɔ ya ntambwɛ.
7 Vɔ wambolanya ɔkɔdi ami wa vinyɔ ndo wambotshika osongo ami wa fingo ehekele keto,Wambowaowola tshɛ lo tshɛ, ko wambowakasha,Wambotshika ntahe yawɔ wɛma oto.
8 Lela oko watosalaka osekaseka w’emuma* wɔlɔtshi dikotoL’ɔtɛ w’otshuki* ande wa lo nshi yande y’osekaseka.
9 Olambo wa ntɔngɔ+ ndo olambo wa lotɛ+ wamboshila lo luudu la Jehowa;Ɛlɔmbɛdi, ekambi wa Jehowa wekɔ l’otanda.
10 Ekambɔ kambolanyema, nkɛtɛ yekɔ l’otanda;+Nɛ dia ntɔngɔ yambolanyema, wanu w’eyoyo wamboma, esɔ kakashile.+
11 Akambi wa dikambɔ wamboshama nsɔnyi, akambi wa dikambɔ dia vinyɔ wekɔ lo ndela,L’ɔtɛ w’eponga l’asami;Nɛ dia diangɔ dia dinela diambolanyema.
12 Ɔkɔdi wa vinyɔ wamboma,Osongo wa fingo wambɔlɛngɛ.
Osongo wa pɔmɛgranatɛ, toko ndo osongo wa pɔmɛ,Esongo tshɛ wa l’ekambɔ wamboma;+Nɛ dia ɔngɛnɔngɛnɔ wambokadimɔ nsɔnyi l’atei w’anto.
13 Nyɔlɔtɛ akoto* ndo nyosale otanda,* nyu ɛlɔmbɛdi;Nyolele, nyu ekambi wa lo elambwelo.+
Nyɔtɔ kele nyolale lo akoto, nyu ekambi wa Nzambi kami;Nɛ dia olambo wa ntɔngɔ+ ndo olambo wa lotɛ+ wamboshila lo luudu la Nzambi kanyu.
14 Nyewoya* dia anto nkila mbo ya ndɛ; nyewoya losanganya la laande.+
Nyotshumanya dikumanyi kaamɛ l’anto tshɛ wa lo wodja,Lo luudu la Jehowa Nzambi+ kanyu, ndo nyolelee Jehowa dia nyanga ekimanyielo.
15 Mananu kayale dikambo dia lushi lakɔ!
Nɛ dia lushi la Jehowa laya suke,+Ndo lɔ layoya oko elanyelo k’oma le Kanga-Wolo-Tshɛ!
16 Onde mbo ya ndɛ yatanyɛma oma lo washo aso,Ndo ɔngɛnɔngɛnɔ la ɔlɔ oma lo luudu la Nzambi kaso?
17 Ntɔngɔ* yambɔnyɔnyala l’ɛse ka mpawo yayɔ.
Mvudu ya waombelo yambolanyema.
Apɛngɛ wambohandjɔma, nɛ dia ntɔngɔ yamboma.
18 Kaanga dongalonga diekɔ lo nkuma akumu!
Nyemba ya ngɔmbɛ yambekekɔ, yambonganɛ, nɛ dia yɔ bu la mbo ya ndɛ!
Ndo nyemba y’ɛkɔkɔ yambolongola dilanya.
19 Jehowa le, wɛ kayomelɛka;+Nɛ dia dja yambotshumba adiyo wa l’oswe waleshawɔ dongalonga,Ndo loombe lambolongoya esongo tshɛ wa l’okonda.
20 Kaanga nyama ya l’okonda mendɛka le yɛ,Nɛ dia ɛkɛdi w’ashi wambomaNdo dja yambotshumba adiyo wa l’oswe waleshawɔ dongalonga.”
Nɔtɛ ka l'ɛse ka dikatshi
^ Kitshimudi ate: “Jehowa kele Nzambi.”
^ Kana “nkɛtɛ.”
^ Kana “wadi.”
^ Kana “omi.”
^ Tshɛk., “Nyoyadinge.”
^ Kana “nyoyakɔmɔlɛ lo ntolo.”
^ Tshɛk., “Nyokidia.”
^ Kana ondo “Fingo ya womu.”
