Jɔbɔ 12:1-25
12 Ko Jɔbɔ akakadimola ate:
2 “Lo mɛtɛ, nyu nyekɔ anto weya,*Ndo lomba layovɔ kaamɛ la nyu!
3 Koko dimi lawɔ lekɔ la yimba.*
Nyu hanyondeki.
Akɔna aheye akambo asɔ?
4 Dimi laya ɛngɔ ka tɔɔla le asekami,+Ɔnɛ lalɔmba Nzambi okadimwelo.+
Onto ɔlɔlɔ ndo laha la onongo aya ɛngɔ ka tɔɔla.
5 Onto laha la ekiyanu mɔnyɔlaka mpokoso,Afɔnya dia tɔ kekɔ paka dikambo dia wanɛ wele ekolo awɔ hawoshikimala.*
6 Mvudu y’apɛma y’apɔtwanyi yekɔ lo wɔladi,+Ndo wanɛ wasola Nzambi wekɔ lo lotui tshitshi,+Wanɛ wele la jambizambi yawɔ lo anya awɔ.
7 Koko lam’alangayɛ, mbola nyama, ko yɔ yayokeetsha;Ndo tofudu ta l’olongo, ko tɔ tayokotɛ.
8 Kana sɛdingola* nkɛtɛ, ko yɔ yayokeetsha;Ndo nse ya lo ndjale yayokotɛ dui diakɔ.
9 Akɔna l’atei adiɔ tshɛ aheyeDia lonya la Jehowa kakasale dui nɛ?
10 Lo lonya lande kele lɔsɛnɔ la ɛngɔ tshɛ kasɛna*Ndo lomu la onto tshɛ.*+
11 Onde toyi ndɛtaka tɔtɛkɛtaWoho walɛta lolemi* mbo ya ndɛ?+
12 Shi lomba tanemaka le esombe w’anto,+Ndo shi yimba mongaka le onto lambɔsɛna edja?
13 Le nde kele lomba ndo wolo;+Nde ekɔ la dako ndo la yimba.+
14 Etena kahandjolande ɛngɔ kɛmɔtshi, tɔ hakoke mbikama nto;+Kɛnɛ kamondodiha, ndooko onto lakoka ndjihola.
15 Etena kadihande ashi, diangɔ tshɛ momaka;+Etena kaakimɔnde, vɔ kukumɛka nkɛtɛ.+
16 Le nde kele wolo la lomba l’oshika;+Nde kakanga ɔnɛ langanɛ ndo ɔnɛ langanyiya;
17 Nde salaka dia andaki nkɛndakɛnda ekolo hwe,*Nde mbetɛka toshushi dinginya.+
18 Nde kelekolaka ɛkɔdi wakakeleka nkumi ya dikanga,+Ndo nde mbakelekaka oya lo nkende yawɔ.
19 Nde kɛndjakɛndjaka ɛlɔmbɛdi ekolo hwe,+Ndo nde kɔshaka wanɛ wamboshikimala nge lo wolo;+
20 Nde dimaka andaki wɛkɛwɔ otema ɔtɛkɛtaNdo nde kɔsɔlaka esombe* ekanelo k’ɔlɔlɔ;
21 Nde mbitsholaka diɔnyɔ le ɛlɔhɛ,+Ndo nde mbetɛka akanga wa wolo wɔdu;*
22 Nde mbisholaka diangɔ dioshɛmi etale lo wodjima,+Ndo nde mbelaka wodjima wa tshududu lo osase;
23 Nde salaka dia wedja mpama efula la oyango wa mbalanya;Nde nunyaka wedja dia nde mbalɔmbɔla otsha lo lɔhɔmbɔ.
24 Nde kɔsɔlaka ɛnɔmbɔdi w’anto yimba*Ndo nde salaka dia vɔ mbekekɔ lo bɛtshi dia nkɛtɛ dia hwe diaha la mboka.+
25 Vɔ mamambaka lo wodjima,+ lɛnɛ ele bu osase;Nde salaka dia vɔ mbekekɔ oko anto wambodjɔ wanu.+
Nɔtɛ ka l'ɛse ka dikatshi
^ Tshɛk., “nyu nyekɔ anto.”
^ Tshɛk., “otema.”
^ Kana “sɛlɔka.”
^ Kana ondo “tɛkɛta la.”
^ Kana “anima w’onto tshɛ lasɛna.”
^ Tshɛk., “emunyi tshɛ w’onto.”
^ Tshɛk., “onyɔ.”
^ Kana “nkolola ɛngɔ tshɛ.”
^ Kana “dikumanyi.”
^ Tshɛk., “kelekolaka oya w’akanga wa wolo.”
^ Tshɛk., “otema.”
