Jɔbɔ 14:1-22
14 “Onto lakotɔ oma le womoto,Ekɔ la lɔsɛnɔ la mondo+ ndo loludi la paa.*+
2 Nde tombaka oko dɛmbɔlɛmbɔ ko mbetaka;*+Nde ndawɔka oko dɛdi ndo shishɔka.+
3 Eelo, wɛ amboka washo ayɛ le nde,Ndo wɛ ambɔɔtɔla* lo kilombo kaamɛ la yɛ wɛmɛ.+
4 Akɔna akoka ntondja onto lele pudipudi oma le onto lele mindo?+
Ndooko onto!
5 Naka nshi yande yakashikikɛma,Lofulo la ngɔndɔ yande lekɔ le yɛ;Wɛ akawodjɛ olelo diaha nde ndekana.+
6 Onya washo ayɛ oma le nde kele nde omuya,Polo lam’ayondoshidiya lushi lande oko ose olimu.+
7 Nɛ dia elongamelo kekɔ kaanga le osongo.
Naka vɔ wambɔkɔtama, vɔ wayɔmɔnga nto,Ndo nsɔngusɔngu yawɔ yayotetemala mbola.
8 Naka odio awɔ wambotshunda lo nkɛtɛNdo okendeka awɔ wambovɔ lo nkɛtɛ,
9 Vɔ wayɔmɔnga la nsolo k’ashi;Ndo wayotondja ntahe oko osongo w’oyoyo.
10 Koko onto mvɔka ndo mbetamaka balakata;Naka onto ambokitshiya lomu, lende eende?+
11 Ashi wamboshishɔ oma lo ndjale,Ndo ɔkɛdi wambɛtɔyama, ko wamboma.
12 Ndo nto, onto mbetamaka ko hetɔ.+
Edja ndo olongo waya bu nto, nde hatetɔ,Ndo nde hatemɔ oma lo djɔ+ yande.
13 Otoyombishɛ lo Diombo* lee,+Otoyombishɛ polo nkɛlɛ kayɛ kambeta lee,Otoyoshikikɛ etena dikambo diami dia wɛ ndjombohɔ lee!+
14 Naka onto ambovɔ, onde nde koka nsɛna nto?+
Dimi layokongaka nshi tshɛ y’olimu wakambami la woloPolo lam’ayoya ekimanyielo kami.+
15 Wɛ ayelɛ, ko dimi layokokadimola.+
Wɛ ayolomɔlomɔ* dikambo dia olimu w’anya ayɛ.
16 Koko wonya ɔnɛ, wɛ ekɔ lo ntetemala mbadia wanya ami tshɛ;Wɛ mendaka paka pɛkato kami.
17 Kɔlɔ kami ndjihama lo tapa,Ndo wɛ ndjihaka munga kami la olembo.
18 Oko watohandjɔka dikona ko diɔ nshishɔNdo oko dive diambɔsɛkɔma oma lo dihole diadiɔ,
19 Oko watɔhɛlɔlaka ashi aveNdo watosolaka asuku awɔ nkɛtɛ,Ngasɔ kamboyolanya elongamelo k’onto okovɔ.
20 Wɛ ekɔ lo ntetemala mbowahemɛ polo nde ambolanyema;+Wɛ ambotshikitanya ɛnamelo kande, ko ambookimɔ.
21 Anande wambɔlɛmiyama, koko nde heye dui sɔ;Vɔ waya anto w’anyanya, koko nde hashihodia dui sɔ.+
22 Nde mbokaka kandji paka etena kekende la demba diande;Nde* ndelaka paka etena kekende la lɔsɛnɔ.”
Nɔtɛ ka l'ɛse ka dikatshi
^ Kana “ndola tɔɔ la osukusuku.”
^ Kana ondo “ko pembɔmaka.”
^ Tshɛk., “ambɔntɔla.”
^ Kana “Sheɔlɛ,” mbuta ate odimu a pɛngando. Enda Elembetshielo.
^ Kana “ayokombola efula.”
^ Kana “Anima ande.”
