Jɔbɔ 31:1-40
31 “Dimi lakadje sheke la washo ami.+
Laasɔ ngande watomokoka ndjasha lo yoho ya kɔlɔ le osekaseka w’emuma?+
2 Ko kakɔna kayomolongola oma l’olongo le Nzambi?Naa etenyi k’okitɔ kayomolongola oma la diko le Kanga-Wolo-Tshɛ?
3 Shi mpokoso kongɛɛka otshi wa kɔlɔNdo sui kongɛɛka wanɛ wasala kɛnɛ kele kɔlɔ?+
4 Shi nde mɛnaka mboka yami+Ndo mbadiaka wanya ami tshɛ?
5 Onde dimi lambɔɔkɛndakɛndaka lo kashi* lushi lɔmɔtshi?
Onde ekolo ami wakasamanya otsha lo lokeso?+
6 Nzambi ambɛdike lo kilɔ+ ka mɛtɛ;Ko nde ayeya olowanyi+ ami.
7 Naka ekolo ami wakatakɔ mboka+Kana otema ami wakayele washo ami+Ko kana anya ami wakɔtɔ mindo,
8 Kete nyontshike monɛ woho kele onto okina kayole,+Ndo kɛnɛ konɛmi kakundɔme.*
9 Naka otema ami wakakotɔma le womoto+ ɔmɔtshiNdo dimi lakaholama+ la soko dia osekami,
10 Kete wadɛmi atɔ ntɔngɔ dikambo dia pami kekina,Ndo apami akina weyane la nde.*+
11 Nɛ dia ɔsɔ otonga lɔkɛwɔ la fumbɔ nsɔnyi,Munga kahomba onto nongola dilanya oma le toshushi.+
12 Ɔsɔ otonga dja yatshumba ndo yalanya,*+Yatshumba kaanga edio wa* ɛngɔ kami tshɛ.
13 Naka dimi lakadime ekambi ami w’apami kana wa wamato losembweEtena kakiwɔ la dui dia nkiyana* lo dikambo diami,
14 Akokami nsala etena kandɔsha* Nzambi?
Akokami mbokadimola etena kayangande dia mbikoya la mi?+
15 Shi Ɔnɛ lakankenge lo dikundju kakaakenge ndo vɔ?+
Shi Onto akɔ ɔtɔi kakatosale la ntondo ka sho mbotɔ?*+
16 Naka dimi lakatone dia mbisha ase wola kɛnɛ kakawakombola+Kana lakakiyanya washo wa wadi aki odo;*+
17 Naka lakale yema ya mbo ya ndɛ yami dimɛAha la nkahana la ana wa tshike;+
18 (Nɛ dia oma ko dikɛnda diami, ɔna etshike* akole lalemi wate kana dimi kele she,Ndo dimi laki ɔnɔmbɔdi wa wadi aki odo* oma ko nshi ya dikɛnda.*)
19 Naka dimi lakɛnyi onto ɔmɔtshi avɔ l’ɔtɛ w’otaka wa dihɔndɔKana ose wola ɔmɔtshi ahomba kɛnɛ ka ndjafɛ;+
20 Naka nde* kɔtshɔkɔlami+Etena kakandayahɛtshahɛtshaka la wɛɔsa w’oma lo ɛkɔkɔ ami;
21 Naka dimi lakakɔmɛɛ ɔna etshike+ dikɔfiEtena kakinde la ohomba w’ekimanyielo kami la soko di’osomba;*+
22 Kete lonya* lami longɔ oma lo dihɛka diami,Ndo lonya lami lahembɔ lo wɔdu.*
23 Nɛ dia dimi lakokaka mpokoso k’oma le Nzambi wɔma,Ndo dimi kokoka memala la ntondo ka kɛnɛmɔ kande.
24 Naka dimi lakadjaka wɛkamu ami lo paonyiKana lakatɛ paonyi ka dimɛna nte: ‘Wɛ kele ekokelo kami!’+
25 Naka dimi lakatanaka ɔngɛnɔngɛnɔ lo ɔngɔnyi+ ami w’efulaL’ɔtɛ w’efula ka diangɔ diakamakondja;+
26 Naka lakɛnyi yanyi* awalɛKana ngɔndɔ katatshimbe lo lotombo+ latɔ;
27 Ko otema ami wakakotɔma lo woshɛshɛ,Ndo onyɔ ami wakanɔnɛ lonya lami dia ntɛmɔla diangɔ sɔ;+
28 Kete ɔsɔ ekɔ munga kakoka toshushi mbisha dilanya,Nɛ dia dimi lotanguna Nzambi ka mɛtɛ kele l’olongo.
29 Onde dimi lambɔngɛnangɛnaka l’ɔtɛ w’elanyelo k’otunyi+ amiKana mboka ɔlɔ l’ɔtɛ wa dui dia kɔlɔ diambookomɛ?
30 Ndooko lushi lakametawɔ dia onyɔ ami nsala pɛkatoLo nɔmba lɔsɛnɔ* lande lo etshibelo.+
31 Onde apami wa lo luudu lami la dipɛma kombuta vate:‘Akɔna akoka ntana onto lahatalotaka la mbo ya ndɛ*+ yande?’
32 Ndooko ɔngɛndangɛnda wakahombaka ndala l’andja;+Dimi lakadiholɛka ambetshetshi nkuke yami.
33 Onde dimi lambohembaka nkomba kɔlɔ yami oko anto+ akina,Lo mbishɛ munga kami lo dibenga dia dihɔndɔ diami?
34 Onde dimi lakoke kɛnɛ kayosala olui w’anto wɔma,Kana onde dimi laki la wɔma wa diɔnyɔ dia nkumbo nkina,Lo mbɔlanyami ndo mbotshami wɔma dia ntomba l’andja?
35 Otondongaka onto ɔmɔtshi ampokame lee!+
Tshike lotodja sinyatirɛ ya lokombo lami lo kɛnɛ kakamatshi.*
Kanga-Wolo-Tshɛ ankadimole!+
Ofundji ami otondofunda kɛnɛ kamfundande lo dikatshi lee!
36 Tshike lotodiɛmba lo dihɛka,Ndo lotodidinga l’ɔtɛ ami oko dɛmbɔ dia nkoso.
37 Tshike lotowadiyɛ ena tshɛ kakamatakola;Lototshɔ le nde la eshikikelo tshɛ oko owandji.
38 Naka nkɛtɛ yami hita yakambidɛ ekokoNdo naka emunda awɔ wakalele kaamɛ;
39 Naka dimi lakale elowa w’oma lɔkɔ aha la mfuta,+Kana naka lakakonya akanga ayɔ* dia nshisha+ elongamelo;
40 Kete atɛndɛ wantombee lo dihole dia epongaNdo adiyo wa nsolo ka kɔlɔ lo dihole dia asami.”
Ɛtɛkɛta wa Jɔbɔ wambokomɛ lanɛ.
Nɔtɛ ka l'ɛse ka dikatshi
^ Kana ondo “kaamɛ l’akanga wa kashi.”
^ Kana “tokanula tami takundɔme.”
^ Tshɛk., “apami akina wake adwe laadiko diande.”
^ Tshɛk., “yalɛ (yalongoya) dia ndanya.”
^ Kana “Yakundola.”
^ Kana “kilombo.”
^ Tshɛk., “kambonɛ.”
^ Tshɛk., “lo dikundju.”
^ Tshɛk., “lakasale dia washo wa wadi aki odo nɛmba.”
^ Tshɛk., “nde.”
^ Tshɛk., “oma ko dikundju dia mama.”
^ Tshɛk., “nde.”
^ Tshɛk., “lokende lande.”
^ Kana ondo “Etena kakamɛnyi dia lekɔ la osukɔ lo soko di’osomba.”
^ Kana “weka wa lo dihɛka.”
^ Kana “lo sɔnga dialɔ; lo weka alɔ wa la diko.”
^ Tshɛk., “osase.”
^ Kana “anima.”
^ Tshɛk., “onatshi.”
^ Kana “Sinyatirɛ yami yɔ nyɛ.”
^ Kana “anima w’akanga ayɔ.”
