Jɔbɔ 36:1-33
-
Elihu ekɔ lo ntombola woke woke waki Nzambi wahamanema mfundo (1-33)
36 Elihu akatetemala ate:
2 “Konga yema kele nkolembetshiya,Nɛ dia dimi leke l’awui wa ntɛkɛta lo wahɔ wa Nzambi.
3 Dimi layɔtɛkɛta kɛnɛ keyami lo yoho yokɛma hwe,Ndo dimi layɛnya dia Osadi+ ami kele la losembwe.
4 Lo mɛtɛ, ɛtɛkɛta ami bu kashi;Onto lele la ewo+ ka kokele ekɔ lanɛ la ntondo kayɛ.
5 Nzambi ekɔ mɛtɛ kanga wolo+ ndo nde hatone ndooko onto;Nde ekɔ la wolo w’efula wa nshihodia.*
6 Nde hatokokɛ nsɛnɔ y’akanga wa kɔlɔ,+Koko nde sambolɛka wanɛ wasowa la losembwe.+
7 Nde hanya washo ande oma le onto ɔlɔlɔ;+Nde mbadjashiyaka lo kiti kaamɛ la nkumi ya dikanga,*+ ndo vɔ mbidiyamaka pondjo.
8 Ko naka vɔ wambokelekama la mɔlɔlaNdo wambondama lo ɛkɔdi w’asui,
9 Nde mbasholɛka kɛnɛ kakawasale,Munga yawɔ l’ɔtɛ wa lotamanya lawɔ.
10 Nde ndjiholaka atoyi awɔ otsha lo engweloNdo nde mbatɛka dia vɔ ntshika nsala kɛnɛ kele kɔlɔ.+
11 Naka vɔ mbokitanyiya ndo mbokambɛ,Vɔ wayetsha nshi yawɔ lo ɔngɔnyi,Ndo ɛnɔnyi awɔ wayonga w’ɔngɛnɔngɛnɔ.+
12 Ko naka vɔ hawokitanyiyisha, kete wayolanyema la lokuwa la ta*+Ndo wayovɔ aha la ewo.
13 Anto wele la etema waheye Nzambi* mbayolama kumbɛkumbɛ.
Vɔ hawoyange ekimanyielo oyadi kaanga etena kawakelekande.
14 Vɔ mvɔka* weke akɛnda,+Lo mbetsha* nsɛnɔ yawɔ kaamɛ la numba+ y’apami ya lo tɛmpɛlɔ.
15 Koko Nzambi* tshungolaka ose paa etena kende lo sui;Nde ndjiholaka atoyi ande etena kasoyamande.
16 Nde kaanganyaka etale oma l’omamu wa lɔkɔnyɔ+Otsha lo dihole dia hwe, diele bu la wekamu,+Kaamɛ la mbo ya ndɛ y’amɛna lo mɛsa ayɛ oko esambelo.+
17 Ko wɛ ayɔngɛnangɛna kilombo ka kanga kɔlɔ,+Lam’ayowosambola kilombo ndo lam’ayowosukɛ losembwe.
18 Koko yalama diaha nkɛlɛ k’efula kɔtɔla lo kɔlɔ,*+Ndo tetawɔke dia etshimba w’efula kotakoya mboka.
19 Onde delo diayangayɛ ekimanyieloKana welo tshɛ w’efula wadjayɛ kotondjaka oma lo sui?+
20 Tokombolake otsho,Etena kashishɔ anto oma lo dihole diawɔ.
21 Yalama diaha wɛ nkalola lo nsala kɔlɔ,Lo nsɔna dui sɔ lo dihole dia sui.+
22 Eenda, Nzambi ambodiyama lo wolo ande;Ombetsha akɔna wele oko nde?
23 Akɔna akalɔmbɔla* mboka kande+Kana akawotɛ ate: ‘Kɛnɛ kamboyosala kekɔ kɔlɔ’?+
24 Ohɔ dia ntombola olimu ande,+Wele anto wakeembe+ dikambo diawɔ.
25 Anto tshɛ wambɛna olimu akɔ,Onto okovɔ mendaka oma lo tshalola.
26 Eelo, Nzambi ekɔ woke efula ndeka kɛnɛ kakokaso mbeya;+Lofulo l’ɛnɔnyi ande ndeka kɛnɛ kakokaso nshihodia.*+
27 Nde kotolaka apɔpɔ w’ashi;+Vɔ tshumanaka dia monga mvula oma lo loonge lande;
28 Oma laasɔ, wange mbatsholaka;+Vɔ tshulwɛka anto.
29 Onde onto ɔmɔtshi koka nshihodia woho wasandjɔ wange,Dikungola di’oma lo luudu lande la dipɛma?*+
30 Ohenda woho wadianganyande dingadimu*+ diande laadiko dialɔNdo wakombande angunda* wa ndjale.
31 La diangɔ sɔ kakimanyiyande* anto;Nde mbashaka mbo ya ndɛ lo yɛdikɔ y’efula.+
32 Nde mɔmbaka dingadimu la anya ande,Ndo nde diɛdiyaka otsha lɛnɛ ahombadiɔ ntshɔ.+
33 Dikungola diande tɛkɛtaka dikambo diande,Kaanga dongalonga mbewoyaka ɔnɛ* layaye.
Nɔtɛ ka l'ɛse ka dikatshi
^ Tshɛk., “otema.”
^ Kana ondo “Nde mbidjashiyaka nkumi ya dikanga lo kiti ya lowandji.”
^ Kana “la ehomɔ ka ta (dikuwa).”
^ Kana “ɛtɔlɔki.”
^ Kana “Anima awɔ mvɔka.”
^ Kana ondo “Lo nkomiya.”
^ Tshɛk., “Nde.”
^ Kana “mbida losaka la diɔnyɔ.”
^ Kana ondo “Wakɔnyɔla; Wakawelɛ dia mbikoya la nde.”
^ Kana “halomanema mfundo.”
^ Tshɛk., “tshombotombo yande.”
^ Tshɛk., “osase.”
^ Tshɛk., “edio.”
^ Kana ondo “kasambande lo dikambo dia.”
^ Kana ondo “kɛnɛ.”