Jɔna 1:1-17
1 Ɔtɛkɛta wa Jehowa wakaye le Jɔna*+ ɔna Amitai ɔnɛ:
2 “Onɛɛ, tshɔka otsha la Niniva+ osomba wa woke, kele tewoya kilombo lo dikambo diawɔ, nɛ dia kɔlɔ kawɔ kambokoma le mi.”
3 Koko Jɔna akalawɔ Jehowa otsha la Tarashishi; nde akaholɔ la Jɔpa ko akatotana masuwa wakatatshɔka otsha la Tarashishi. Ɔnkɔnɛ nde akafute tikɛ, ko akɔtɔ lɔkɔ dia ntshɔ la wɔ otsha la Tarashishi, mangana la Jehowa.
4 Ko Jehowa akatome lɔhɛlɛdi la wolo lo ndjale ndo lɔpɛpɛ la wolo efula lakapɛpɛ lo ndjale lo yɛdikɔ yele masuwa waki suke la mpandjɔ.
5 Ekambi wa lo masuwa wakoke wɔma w’efula, ko vɔ tshɛ onto l’onto akatatɛ nɔmba nzambi kande dia nyanga ekimanyielo. Ndo vɔ wakatatɛ mbikasha diangɔ diaki lo masuwa lo ndjale dia masuwa monga osadi.+ Koko Jɔna akaholɔ lo dihole dia l’etei ka masuwa,* akatetama lɛkɔ ndo akalale djɔ ya baku.
6 Kapitɛnyi ka masuwa akaye lalende, ko akawombola ate: “Lande na kalalayɛ? Emala, elɛ nzambi kayɛ! Ondo Nzambi ka mɛtɛ ayoyakiyanya lo dikambo diaso, ko hatotovɔ.”+
7 Oma laasɔ, vɔ tshɛ wakate vate: “Nyoye tooke owale+ kele tende onto lele lo kiɔkɔ ya mpokoso kɛnɛ.” Ɔnkɔnɛ vɔ wakoke owale, ko owale wakande Jɔna.+
8 Vɔ wakawombola vate: “Ototɛ lam’alangayɛ, onto akɔna ele lo kiɔkɔ ya mpokoso kambotokomɛ kɛnɛ? Olimu akɔna watoyokambaka ndo oma lende ayaaye? Ose wodja akɔna ndo ose na eeyɛ?”
9 Nde akakadimola ate: “Dimi lekɔ ose Hɛbɛru, ndo dimi mbokaka Jehowa Nzambi ka l’olongo wɔma,* Ɔnɛ lakasale ndjale ndo nkɛtɛ y’ofumbo.”
10 Ko anto akɔ wakaleke mboka wɔma ndo vɔ wakawombola vate: “Ko kakɔna kamboyosala?” (Anto asɔ wakeye dia nde ekɔ lo talawɔ Jehowa, nɛ dia nde akawatɛ.)
11 Ɔnkɔnɛ vɔ wakawombola vate: “Ahombaso kosalɛ dia ndjale tɔlamɛ?” Nɛ dia ndjale kakatalekaka mimbɔmbɔ ndo lɔpɛpɛ la wolo lakatalekaka.
12 Nde akakadimola ate: “Nyomonyiya kele nyombikasha lo ndjale, ko ndjale kayɔlama dikambo dianyu; nɛ dia dimi mbeyaka dia l’ɔtɛ ami kambonyoyɛ lɔpɛpɛ la wolo efula lɔnɛ.”
13 Ko anto akɔ wakasale la wolo* dia ntɔla masuwa l’omamu, koko vɔ kokoka, nɛ dia ndjale kakaleke mimbɔmbɔ ndo lɔpɛpɛ la wolo lakaleke mpɛpa lo dihole diakiwɔ.
14 Oma laasɔ, vɔ wakalelɛ Jehowa ndo wakate vate: “Hayii, Jehowa le, lam’alangayɛ, tatovɔke l’ɔtɛ wa pami kɛnɛ!* Totɛndjake onongo wa dikila diaha la onongo, nɛ dia Jehowa le, wɛ ambosala kɛnɛ kalangayɛ.”
15 Ko vɔ wakonyiya Jɔna ndo wakawokasha lo ndjale; ko ndjale kakalɛmbɔhala.
16 Oma laasɔ, anto akɔ wakandama la wɔma wa Jehowa,+ ko wakalambola Jehowa olambo ndo wakatshike alɔkɔlɔkɔ.
17 Jehowa akatome lose la shaka efula dia ndjɔmɛna Jɔna, ko Jɔna akatshikala lo dikundju dia lose l’edja ka tanyi 3 la etsho 3.+
Nɔtɛ ka l'ɛse ka dikatshi
^ Kitshimudi ate: “Fudu k’enga.”
^ Kana “tshuku dia la tshina.”
^ Kana “tɛmɔlaka.”
^ Kana “wakahembe mbata mboka kawɔ.”
^ Kana “l’ɔtɛ w’anima wa pami kɛnɛ!”
