Jɔna 3:1-10
3 Oma laasɔ, ɔtɛkɛta wa Jehowa wakaye le Jɔna mbala ka 2 ɔnɛ:+
2 “Onɛɛ, tshɔka la Niniva+ osomba wa woke, kele tewoya losango lamomokotɛ lɛkɔ.”
3 Ɔnkɔnɛ, Jɔna akonɛɛ ko akatshu la Niniva+ dia nkitanyiya ɔtɛkɛta wa Jehowa.+ L’etena kɛsɔ, Niniva aki osomba wa woke efula,* waki la otale wa lɔkɛndɔ la nshi 3 l’ekolo.
4 Ko Jɔna akɔtɔ lo osomba ndo akakɛndakɛnda lushi l’otondo, atewoya ate: “Ambotshikala nshi 40 tsho dia Niniva ndanyema.”
5 Ko ase Niniva wakonge la mbetawɔ le Nzambi+ ndo vɔ wakewoya di’anto nkila mbo ya ndɛ ndo wakalɔtɛ akoto, akanga w’ɛngɔnyi ndo ase wola, ntatɛ oma le ɔnɛ loleki woke polo le ɔnɛ loleki tshitshɛ l’atei awɔ.
6 Lam’akakome losango le nkumekanga ka Niniva, nde akonɛɛ oma lo kiti kande ka lowandji, akakolola dihɔndɔ diande dia lowandji ndo akalɔtɛ dikoto, ko akadjasɛ lo otoko.
7 Laadiko dia laasɔ, nde akate dia vɔ mbewoya l’osomba wa Niniva w’otondo ɔnɛ:
“Nkumekanga nde l’ɛlɔhɛ ande wambodjanga nganɛ: Ndooko onto kana nyama, ngɔmbɛ kana ɔkɔkɔ wahomba ndɛ kaanga ɛngɔ. Vɔ hawohombe ndɛ ɛngɔ kana nnɔ ashi.
8 Vɔ walɔtɛ akoto, oyadi onto kana nyama; ndo vɔ walelee Nzambi la otema ɔtɔi, watshike mboka yawɔ ya kɔlɔ ndo watshike awui wa ngala wasalawɔ.
9 Akɔna eeya kana Nzambi ka mɛtɛ koka nyomenda* kɛnɛ kakandasangoya dia nsala ndo minya nkɛlɛ kande kalombalomba diaha sho nanyema?”
10 Lam’akɛnyi Nzambi ka mɛtɛ kɛnɛ kakawasale, woho wakawatshike mboka yawɔ ya kɔlɔ,+ nde akanyomɔsɛdingola* mpokoso kakandate dia mbaela, ko nde kokiela.+
Nɔtɛ ka l'ɛse ka dikatshi
^ Tshɛk., “osomba wa woke le Nzambi.”
^ Kana “ayonyanga lo dikambo dia.”
^ Kana “akanyange lo dikambo dia.”