Jɔna 4:1-11
4 Koko dui sɔ diakanyangiya Jɔna efula, ko nde akadunganɛ la nkɛlɛ.
2 Ɔnkɔnɛ, nde akalɔmbɛ Jehowa ate: “Hayii Jehowa, shi kɛnɛ kakamakiyanaka etena kakimi lo wodja ami? Diakɔ diakamahembe ndawɔ otsha la Tarashishi+ lo dihole dia ntondo, nɛ dia lakeyaka dia wɛ ekɔ Nzambi kokana kandji* ndo kɛtshi, kahoke nkɛlɛ esadi ndo koludi tɔɔ la ngandji ka kɔlamelo,+ ɔnɛ lanyanga l’ɔtɛ wa mpokoso.
3 Wonya ɔnɛ Jehowa le, lam’alangayɛ, nya lɔsɛnɔ* lami nɛ dia ndeka dimɛna dimi mvɔ lo dihole dia ntshikala la lɔsɛnɔ.”+
4 Jehowa akawombola ate: “Onde ekɔ dimɛna wɛ momala ngasɔ?”
5 Oma laasɔ, Jɔna akatombe oma l’osomba ko akatodjasɛ lo ɛstɛ k’osomba. Nde akake kitanda laawɔ, ko akadjasɛ lo dɛdi diatɔ dia menda kɛnɛ kakahombe komɛ osomba.+
6 Ko Jehowa Nzambi akatondja dambo dia dimɔkɛ* dia diɔ namba la diko dia Jɔna dia mbosha dɛdi dikambo di’ɔtɛ ande ndo dia mbosamba lo paa kande. Ko Jɔna akangɛnangɛna efula l’ɔtɛ wa dambo dia dimɔkɛ sɔ.
7 Koko Nzambi ka mɛtɛ akatome ɔsɔhɔ la wedi a pindju, ko vɔ wakale dambo dia dimɔkɛ ndo diɔ diakoome.
8 Lam’akatatɛ yanyi mbalɛ, Nzambi akatome nto lɔpɛpɛ loonya l’oma lo ɛstɛ ndo yanyi yakakɔmɔla Jɔna l’ɔtɛ, ko nde akalɛmbɛ. Nde akatetemala nɔmba dia mvɔ* ndo nde akatetemala mbuta ate: “Ndeka dimɛna dimi mvɔ lo dihole dia ntshikala la lɔsɛnɔ.”+
9 Nzambi akambola Jɔna ate: “Onde ekɔ dimɛna wɛ momala ngasɔ l’ɔtɛ wa dambo dia dimɔkɛ?”+
Ko nde akate ate: “Dimi lekɔ la ɔkɔkɔ wa momala, momala efula lo yɛdikɔ ya nkombola mvɔ.”
10 Koko Jehowa akate ate: “Wɛ ambonyanga l’ɔtɛ wa dambo dia dimɔkɛ diahayɛnyi paa ndo diahayodisha; diɔ diakatombe l’otsho ɔmɔtshi ndo diakoomi l’otsho okina.
11 Onde dimi lawɔ haakoke nyanga l’ɔtɛ wa Niniva, osomba wa woke+ wele l’anto ndekana nunu lokama l’akumi ahende (120 000) waheye kaanga ntshikitanya ɔlɔlɔ la kɔlɔ* ndo nyama+ yawɔ y’efula?”
Nɔtɛ ka l'ɛse ka dikatshi
^ Kana “katɛtɛ solo.”
^ Kana “anima.”
^ Kana ondo “dambo di’oshinɔ.”
^ Kana “dia anima ande mvɔ.”
^ Kana “waheye ntshikitanya lonya lawɔ l’omi la la lɔmɔsɔ.”
