Jɛrɛmiya 15:1-21
15 Ko Jehowa akambutɛ ate: “Kaanga Mɔsɛ nde la Samuɛlɛ otowemala la ntondo kami,+ dimi totomoka* anto anɛ kɛtshi. Tshanyawɔ oma la ntondo kami. Tshikawɔ watshu.
2 Ndo naka vɔ wambokotɛ ɔnɛ: ‘Lende ahombaso ntshɔ?’ Kowate wate: ‘Jehowa kata ate:
“Ɔnɛ lahomba ntshɔ lo hemɔ kadiaka, atshu lo hemɔ kadiaka!
Ɔnɛ lahomba ntshɔ lo lokuwa la ta, atshu lo lokuwa la ta!+
Ɔnɛ lahomba ntshɔ lo ndjala ka kasha, atshu lo ndjala ka kasha!
Ndo ɔnɛ lahomba ntshɔ lo lɔhɔmbɔ, atshu lo lɔhɔmbɔ!”’+
3 “‘Ndo dimi layowasɔnɛ mpokoso 4,’*+ mbata Jehowa, ‘lokuwa la ta dia ndjaka, mfɔ dia nkotola, tofudu ta l’olongo ndo nyama ya la nkɛtɛ dia ndɛ ndo ndanya.+
4 Ndo dimi layowaetɛ ɛngɔ ka wɔnɔnyi le waolelo tshɛ wa la nkɛtɛ+ l’ɔtɛ wa Manase ɔna Hɛzɛkiya, nkumekanga ka Juda, lo kɛnɛ kakandasale la Jɛrusalɛma.+
5 Jɛrusalɛma le, akɔna ayokoka kɛtshi,Akɔna ayokoka kandji,Ndo akɔna ayemala dia mimbola yoonge yayɛ?’
6 ‘Wɛ akansɛkɛ,’ mbata Jehowa.+
‘Wɛ ekɔ lo ntetemala mbokami ɔkɔngɔ.*+
Ɔnkɔnɛ, dimi layosembola lonya lami dia kɔlɔsha ndo kolanya.+
Dimi lambɔlɛmba dia koka kɛtshi.*
7 Ndo dimi layowafufola la lɔsɔmɔ lo asoko wa wodja.
Dimi layowatshika aha la ana.+
Dimi layolanya anto ami,Nɛ dia vɔ tonaka nkalola oma lo mboka yawɔ.+
8 Wadi waki edo awɔ wayofulanɛ la ntondo kami ndeka lɔkɔngɔ la lo ndjale.
Dimi layela ondanyishi le wɔ la midi, le waa mama ndo le ɛlɔngɔ w’apami.
Dimi layowaela osukusuku ndo wɔma la shashimoya.
9 Womoto lakote ana 7 ambɔlɛmba;Nde* ekɔ la okakatanu dia mpɛnga.
Wonya ambowodjɛ la yanyi,Ambowosha nsɔnyi ndo diɔnyɔ.’
‘Ndo yema y’anto tshitshɛ yakatshikala l’atei awɔDimi layowakimɔ lo lokuwa la ta la ntondo k’atunyi awɔ,’ mbata Jehowa.”+
10 Mama kami le, mananu le mi l’ɔtɛ wakayambote,+Pami kadiɛnɛ la londjo ndo kawana la wodja w’otondo.
Dimi kɔsɔndja kana nsɔmba;Koko vɔ tshɛ mbidjakami mananu.
11 Jehowa akate ate: “Lo mɛtɛ dimi layokokambɛ olimu lo dimɛna;Dimi layokokimanyiya lo etena ka mpokoso,Lo etena ka sui la ntondo k’atunyi.
12 Onde onto ɔmɔtshi koka mpendjahendja lowolo totenyi totenyi,Lowolo l’oma lo nɔrdɛ ndo nkonga?
13 Dimi layokimɔ ekundji ayɛ ndo diangɔ diayɛ dia nɛmɔ oko diangɔ dia dimbo,+Aha la oshinga, koko l’ɔtɛ wa pɛkato yayɛ tshɛ ya lo bɛtshi diayɛ dia nkɛtɛ tshɛ.
14 Dimi layodisha atunyi ayɛDia vɔ ntɔla otsha lo wodja wahayeye.+
Nɛ dia dja yakahɛtɛ la nkɛlɛ kami,Ndo yɔ yekɔ lo nombalomba dikambo dianyu.”+
15 Jehowa le, wɛ mbeyaka,Ombohɔ ndo ombidje yimba.
Sɔmbɔya wanɛ wampɛnyahɛnya lo dihole diami.+
Totshikake dia dimi nanyema* l’ɔtɛ wahayoke nkɛlɛ esadi.
Eya dia l’ɔtɛ ayɛ kamomɔtɛngama.+
16 Ɛtɛkɛta ayɛ wakatanema, ndo dimi lakawale;+Ko ɔtɛkɛta ayɛ wakayala le mi ɔngɛnɔngɛnɔ ndo ɔlɔ w’otema ami,Nɛ dia Jehowa Nzambi kanga lolembelembe le, wakambelɛ lo lokombo layɛ.
17 Dimi halodjasɛ kaamɛ la asadi wa fɛtɛ ndo ngɛnangɛna.+
Nɛ dia lonya layɛ lekɔ laadiko diami, dimi mbidjasɛ dimɛ,Dikambo wɛ akandodia la lonyangu.*+
18 Lande na kele paa kami hashile ndo mpota kami hakɔnɔ?
Tɔ kambotona nkɔnɔ.
Onde wɛ ayonga le mi oko ɛngɔ ka lokeso kombawɔ ashiKahawakoke ndjaɛkɛ lɔkɔ?
19 Ɔnkɔnɛ, Jehowa kata ate:
“Naka wɛ nkalola, kete dimi layokokaloya,Ndo wɛ ayemala la ntondo kami.
Naka wɛ nkakitola ɛngɔ ka nɛmɔ la ɛngɔ k’anyanya,Wɛ ayonga oko onyɔ ami hita.*
Vɔ wayokadimɔ oya le yɛ,Koko wɛ hatokadimɔ otsha le wɔ.”
20 “Dimi layanga ketɛ ehele ka wolo ka nkonga le anto anɛ.+
Lo mɛtɛ, vɔ wayokɔlɔsha,Koko hawotokoleka wolo,*+Nɛ dia dimi lekɔ kaamɛ la yɛ, dia koshimbɛ ndo kotsha,” mbata Jehowa.
21 “Dimi layokotsha oma l’anya wa kanga kɔlɔNdo layokotshungola oma lo awambo wa kanga esehe.”
Nɔtɛ ka l'ɛse ka dikatshi
^ Kana “anima ami totowotshɔ otsha le.”
^ Kana ondo “weho wa dombo 4.” Tshɛk., “nkumbo 4.”
^ Kana ondo “tetemalaka nkɛndakɛnda ɛkɔngɔkɔngɔ.”
^ Kana “monga la lonyangu.”
^ Kana “Anima ande.”
^ Tshɛk., “Tɔmbɔsake.”
^ Kana “losango la diɔnyɔ.”
^ Kana “ayonga yɛmba awui yami.”
^ Kana “hawotokɔlɛndja.”
