Jɛrɛmiya 16:1-21
16 Ɔtɛkɛta wa Jehowa wakaye le mi nto ɔnɛ:
2 “Totshukake wadi ndo tootake ana w’apami ndo ana wa wamato lo dihole nɛ.
3 Nɛ dia Jehowa kata lo dikambo dia ana w’apami ndo ana wa wamato wotɔ lo dihole nɛ, lo dikambo dia anyangɛwɔ wawaota ndo lo dikambo dia washɛwɔ wasala dia vɔ mbotɔ lo wodja ɔnɛ ate:
4 ‘Vɔ wayovɔ la hemɔ yadiakana,+ koko ndooko onto layowalela kana mbakundɛ; vɔ wayoyala oko tumi laadiko dia nkɛtɛ.+ Vɔ wayodiakema la lokuwa la ta ndo la ndjala ka kasha,+ ko edo awɔ wayoyala mbo ya ndɛ ya tofudu ta l’olongo ndo ya nyama ya la nkɛtɛ.’
5 Nɛ dia Jehowa kata ate:‘Tɔtɔke lo luudu lasalawɔ fɛtɛ k’otanda,Ndo totshɔke dia tolela kana tosamba.’+
‘Nɛ dia dimi lakanya wɔladi ami oma le anto anɛ,’ mbata Jehowa,‘Kaamɛ ndo ngandji kami ka kɔlamelo la kɛtshi.+
6 Anto wa weke ndo wa totshitshɛ wayovɔ lo wodja ɔnɛ.
Hawotowakundɛ,Ndooko onto layowalela,Ndooko layoyahomuya kana minya hiɔlɔ lo dikambo diawɔ.*
7 Ndo ndooko onto layosha wanɛ wele lo otanda mbo ya ndɛ,Dia mbasamba l’ɔtɛ wambowovusha;Ndo ndooko onto layowasha dikɔhɔ di’esambeloDia nnɔ l’ɔtɛ wambowovusha shɛwɔ kana nyangɛwɔ.
8 Ndo tɔtɔke lo luudu lasalawɔ fɛtɛDia mbidjasɛ la wɔ dia ndɛ ndo nnɔ.’
9 “Nɛ dia Jehowa kanga lolembelembe, Nzambi k’Isariyɛlɛ kata ate: ‘Lo dihole nɛ, lo nshi yanyu ndo lo washo anyu hita, dimi layokomiya mindjo y’ɔlɔ ndo y’ɔngɛnɔngɛnɔ, dui dia otshuki ndo dui dia otshukami.’+
10 “Etena kayoyotɛ wodja ɛtɛkɛta ɛsɔ tshɛ, vɔ wayokombola ɔnɛ: ‘Lande na kakewoya Jehowa mpokoso ka wolo ka ngasɔ lo dikambo diaso? Munga ndo pɛkato kakɔna kakatasalɛ Jehowa Nzambi kaso?’+
11 Kowakadimole wate: ‘“Nɛ dia watshɛnyu wakamboke ɔkɔngɔ,”+ mbata Jehowa, “ndo vɔ wakatetemala ndjela tozambizambi tokina, wakatikambɛ ndo wakatikusamɛ.+ Koko vɔ wakamboke ɔkɔngɔ ndo vɔ kokitanyiya ɛlɛmbɛ ami.+
12 Nyu nyakasale kɔlɔ koleki watshɛnyu+ ndo la ɛtɛ wolo tshɛ onto l’onto ndjelaka otema ande wa kɔlɔ lo dihole dia kitanyiyami.+
13 Diakɔ diele, dimi layonyotondja la wolo oma lo wodja ɔnɛ otsha lo wodja wele oyadi nyu kana watshɛnyu kombeya,+ ndo nyayotokambɛ tozambizambi tokina lɛkɔ otsho la yanyi,+ nɛ dia dimi halonyoka kɛtshi.”’
14 “‘Koko nshi yekɔ lo ndjaye,’ mbata Jehowa, ‘yahawatota nto ɔnɛ: “Lo mɛtɛ oko wele Jehowa la lɔsɛnɔ, ɔnɛ lakatondja ase Isariyɛlɛ oma lo wodja w’Edjibito!”+
15 koko ɔnɛ: “Lo mɛtɛ oko wele Jehowa la lɔsɛnɔ, ɔnɛ lakatondja ase Isariyɛlɛ oma lo wodja wa lo nɔrdɛ ndo oma lo wedja tshɛ wakandaahandjola!” ko dimi layowakaloya lo wodja awɔ wakamasha watshɛwɔ.’+
16 ‘Dimi layanga mbelɛ amundji wa nse efula,’ mbata Jehowa,‘Ko vɔ wayowanda oko nse.
L’ɔkɔngɔ wa laasɔ, dimi layelɛ mengenga efula,Ko vɔ wayowatsha wenga lo dikona tshɛ ndo lo kionakona tshɛ y’otaleNdo lo weoko w’ave.
17 Nɛ dia washo ami wekɔ lo dikambo tshɛ diasalawɔ.*
Vɔ kombishɛma oma la ntondo kami,Ndo munga kawɔ kombishɛma oma lo washo ami.
18 Ntondotondo, dimi layowafuta lo yɛdikɔ y’efula l’ɔtɛ wa munga ndo pɛkato kawɔ,+Nɛ dia vɔ wakɔnyɔla wodja ami la dikishi* diawɔ dia wɔnɔnyi diele bu la lɔsɛnɔNdo wakalodia etenyi kami k’okitɔ la diangɔ dia wɔnɔnyi.’”+
19 Wɛ Jehowa, wolo ami ndo longele lami,Dihole diami dia ndawɔ lo lushi la sui,+Le yɛ mbayoya wedja oma lo tokoma ta nkɛtɛ,Ndo vɔ wayota ɔnɛ: “Sango diakalongola watshɛso ele paka lokeso,Diangɔ di’anyanya, diele bu ohomba ndo diaha la wahɔ.”+
20 Onde onto koka ndjasalɛ tozambizambiEtena kele tɔ bu mɛtɛ tozambizambi?+
21 “Ɔnkɔnɛ, dimi layosala dia vɔ mbeya,L’etena kɛsɔ, dimi layosala dia vɔ mbeya wolo ami ndo nkudu kami,Ndo vɔ wayohomba mbeya ɔnɛ lokombo lami ko Jehowa.”
Nɔtɛ ka l'ɛse ka dikatshi
^ Mɛnamaka dia apanganu waki ɛtɔlɔki lo Isariyɛlɛ waki la mbekelo ka salaka otanda.
^ Tshɛk., “lo mboka yawɔ tshɛ.”
^ Tshɛk., “edo.”
