Jɛrɛmiya 2:1-37
2 Ɔtɛkɛta wa Jehowa wakaye le mi ɔnɛ:
2 “Tshɔka kele tewoya lo atoyi wa Jɛrusalɛma wate: ‘Jehowa kata ate:
“Dimi mbohɔka dimɛna omamemelo ayɛ* wa lo dikɛnda diayɛ,+Ngandji kakayɛnya etena kakiyɛ lo diembwanelo dia tshuki,+Woho wakayatandjelaka l’oswe wa shɛnga,Lo wodja wahonɛma woho.+
3 Isariyɛlɛ aki ekila le Jehowa,+ ɛlɔnga wa dinela diande.”’
‘Wanɛ tshɛ wakosalɛka kɔlɔ wakongaka la onongo.
Mpokoso kakayaka le wɔ,’ mbata Jehowa.”+
4 Luudu la Jakɔbɔ le, hokamɛ ɔtɛkɛta wa Jehowa,Ndo nyu nkumbo tshɛ ya lo luudu la Isariyɛlɛ.
5 Jehowa kata ate:
“Munga kakɔna kakatane watshɛnyu le mi,+Dia vɔ mangana etale la mi,Ko vɔ ndjela dikishi di’anyanya+ ndo vɔamɛ ndjala anyanya?+
6 Vɔ komimbola vate: ‘Lende ele Jehowa,Ɔnɛ lakatotondja oma lo wodja w’Edjibito,+Lakatɔlɔmbɔla l’oswe wa shɛnga,Lo nkɛtɛ ya shɛnga+ la afuku,Lo nkɛtɛ ya womu+ ndo ya wodjima wa hitɔɔ,Lo nkɛtɛ yele ndooko onto lɛngɔla lɛkɔNdo lɛnɛ ele anto hawodjasɛ?’
7 Ko dimi lakanyɔtɔlɛ lo wodja wa dikambɔ di’elowa,Dia nyu ndɛ elowa wa lɔkɔ ndo diangɔ di’amɛna dia lɔkɔ.+
Koko nyu nyakɔtɔ lɔkɔ, ko nyakadje wodja ami mindo;Nyaketɛ etenyi kami k’okitɔ ɛngɔ ka wɔnɔnyi.+
8 Ɛlɔmbɛdi komimbola vate: ‘Lende ele Jehowa?’+
Wanɛ wetsha Ɛlɛmbɛ kombeyami,Alami w’ɛkɔkɔ wakantɔmbɔkwɛ,+Amvutshi wakate prɔfɛsiya lo lokombo la Baala,+Ndo vɔ wakayele wanɛ wahakoke mbakondjiyɛ wahɔ.
9 Jehowa kata ate: ‘Ɔnkɔnɛ,+ dimi layonyɔlɔsha nto,Ndo dimi layɔlɔsha ana w’ananyu.’
10 ‘Koko nyotehɔ otsha lo emamu w’ashi* wa Kitimɛ+ kele nyotende.
Ɛɛ, nyotome ɔkɛndji la Kɛdara+ ndo nyodje yimba dimɛna;Nyende kana dui dia nganɛ diambosalemaka.
11 Onde wodja ɔmɔtshi wambengɔnyaka lushi lɔmɔtshi tozambizambi tawɔ la kɛnɛ kele bu tozambizambi?
Koko anto ami hita wambengɔnya lotombo lami la kɛnɛ kele bu ohomba.+
12 Olongo le, amba lo dikambo sɔ;Onga la wɔma w’efula,’ mbata Jehowa,
13 ‘Nɛ dia anto ami wambosala akambo 2 wa kɔlɔ:
Vɔ wambɔnsɛka dimi kiɔkɔ y’ashi wa lɔsɛnɔ,+Ndo wamboyatshimɛ* afuku w’ashi,Afuku wambotondɔ hawokoke momba ashi.’
14 ‘Onde Isariyɛlɛ ekɔ okambi kana mfumbe kotwe lo luudu?
Ko lande na kambowookimɔ dia monga ɛngɔ ka dimbo?
15 Ɛsɔngɔ wa ntambwɛ* wekɔ lo mbodikitɛ;+Yɔ yambokungola.
Yɔ yambetɛ wodja ande ɛngɔ ka wɔnɔnyi.
Esomba ande wambotshumbama, diaha onto mbidjasɛ lɔkɔ.
16 Ase Nofu*+ ndo ase Tahapanɛsɛ+ wekɔ lo ndɛ lowako l’ɔtɛ ayɛ.
17 Shi wɛmɛ kamboyayangɛ dui nɛLo nsɛka Jehowa Nzambi kayɛ+Etena kakandatakɔlɔmbɔlaka lo mboka?
18 Kakianɛ, lande na koyokombola mboka k’otsha l’Edjibito+Dia tɔnɔ ashi wa Shihɔrɛ?*
Lande na koyokombola mboka k’otsha l’Asuriya+Dia tɔnɔ ashi wa lo Ɔkɛdi?*
19 Kɔlɔ kayɛ pombaka kongola,Ndo etsha ayɛ hita waha la kɔlamelo pombaka kosha lohango.
Eya ndo shihodia dia ekɔ kɔlɔ ndo ololo+Dia nsɛka Jehowa Nzambi kayɛ;Wɛ kombokami wɔma,’+ mbata Nkum’Olongo Nkumadiɔndjɔ, Jehowa kanga lolembelembe.
20 ‘Nɛ dia oma ko nshi y’edjedja, dimi lakɔkɔla osembe ayɛ+Ndo lakahembola mɔlɔla ayɛ.
Koko wɛ akate wate: “Dimi hantokamba,”
Nɛ dia lo kionakona tshɛ y’otale ndo l’ɛse k’osongo tshɛ wele l’akatshi efula+Wɛ akakalemaka, akasalaka kinumba.+
21 Dimi lakakoonɛ oko ɔkɔdi wa vinyɔ wa beela wa lɔsɔna,+ otondo awɔ wekɔ lɔtɔngɔ la dimɛna;Ko lande na kamboyokadimɔ ntahe ya kɔlɔ ya woho okina w’ɔkɔdi wa vinyɔ la ntondo kami?’+
22 ‘Oyadi wɛ kɔkaka la omandja* ndo la sudɛ* k’efula,Onongo ayɛ wayotetemala monga la ntondo kami,’+ mbata Nkum’Olongo Nkumadiɔndjɔ Jehowa.
23 Ngande wakokayɛ mbuta wate: ‘Dimi kondjadja mindo.
Dimi kondjela waa Baala’?
Eenda mboka kayɛ l’okidi.
Sɛdingola kɛnɛ kamboyosala.
Wɛ ekɔ oko ɔsɔngɔ wa kamɛlɔ ka wadi kalawɔ efula.Kalawɔlawɔ lɛnɛ la lɛnɛ lo mboka ya tɔ,
24 Mponda ka l’okonda kambekɛ l’oswe,Katoombɛ nsolo dia nyanga omi etena ketɔ la nsaki ka dieyanelo.*
Akɔna akoka kishimba etena ketɔ la nsaki ka dieyanelo?
Wanɛ tshɛ wakiyanga hawotonga la paa dia kishola.
Vɔ wayokishola lo eleko* katɔ.
25 Sala diaha ekolo ayɛ monga hweNdo wodi ayɛ watongake la mposa k’ashi.
Koko wɛ akate wate: ‘Ndooko elongamelo!+
Keema, dimi lambolanga ase wodja okina,*+Ndo dimi layowayela.’+
26 Oko nsɔnyi kashama wovi etena kawondawɔ,Ngasɔ kamboshama luudu l’Isariyɛlɛ nsɔnyi,Vɔ, nkumi ya dikanga yawɔ ndo ewandji awɔ,Ɛlɔmbɛdi awɔ ndo amvutshi awɔ.+
27 Vɔ wambotɛ osongo vate: ‘Wɛ kele papa,’+
Ndo dive vate: ‘Wɛ kakambote.’
Koko vɔ wambɔmbɛdiya ɛkɔngɔ awɔ, aha dungi diawɔ.+
Ndo vɔ wayota l’etena ka mpokoso kawɔ vate:‘Emala kele otoshimbee!’+
28 Ko wonya ɔnɛ, lende ele tozambizambi tayɛ takayayasalɛ?+
Tɔ temale naka tɔ koka koshimbɛ l’etena ka mpokoso kayɛ,Nɛ dia Juda le, tozambizambi tayɛ taya efula oko esomba ayɛ.+
29 ‘Lande na katetemalanyu ndɔshami?
Lande na kamonyɔntɔmbɔkwɛ nyu tshɛ?’+ mbata Jehowa.
30 Dimi lakakɔmɔla ananyu ɔkɔmɔlakɔmɔla.+
Vɔ kombetawɔ dilanya;+Lokuwa lanyu hita la ta lakadiake amvutshi anyu,+Oko ntambwɛ kahangiya.
31 Lɔlɔnga lɔnɛ le, nyodje yimba lo ɔtɛkɛta wa Jehowa.
Onde dimi laya le Isariyɛlɛ oko oswe wa shɛngaKana wodja wa wodjima wa kɔlɔ?
Lande na kata anto anɛ, wodja ami ɔnɛ: ‘Sho tekɔ lo mbeteta aha la okakatanu.
Sho hatotoya le yɛ nto’?+
32 Onde osekaseka w’emuma koka mbohɛ dɛngalɛnga diande,Otshukami koka mbohɛ eya ande wa lo ntolo?*
Koko wodja ami hita wambombohɛ efula ka nshi yaheyama mbadia.+
33 Womoto le, ande woho walɔngɔsɔlayɛ mboka kayɛ la kɛsɔ tshɛ dia nyanga ngandji!
Wɛ amboyalowanya lo mboka y’akambo wa kɔlɔ.+
34 Oyadi ehembo w’ahɔndɔ ayɛ wekɔ la dikila di’ase wola* waha la onongo,+Kaanga mbele dimi kombanda tshu;Diɔ diekɔ lo ehembo w’ahɔndɔ ayɛ tshɛ.+
35 Koko wɛ mbutaka wate: ‘Dimi keema la onongo.
Lo mɛtɛ, nkɛlɛ kande kambomɔ oma le mi.’
Kakianɛ, dimi layanga kela kilomboNɛ dia wɛ mbutaka wate: ‘Dimi kosala pɛkato.’
36 Lande na kɔsayɛ lɔkɛwɔ layɛ la kɔlɔ oko dikambo di’anyanya?
Wɛ ayɔsa nsɔnyi ndo l’ɔtɛ w’Edjibito,+Oko wakayɔshi nsɔnyi l’ɔtɛ w’Asuriya.+
37 Ndo lo dikambo sɔ nto, wɛ ayotomba ahe anya ayɛ l’ɔtɛ,+Nɛ dia Jehowa ambɔsɛka wanɛ wayaɛkɛyɛ le wɔ;Vɔ wayosala diaha wɛ ntondoya.”
Nɔtɛ ka l'ɛse ka dikatshi
^ Kana “ngandji ka kɔlamelo.”
^ Kana “asɛnga.”
^ Kana “wambotondola,” ondo oma lo dive.
^ Kana “Ɛsɔngɔ wa ntambwɛ wele l’alɛfulɛfu.”
^ Kana “Memifisi.”
^ Mbuta ate ɔkɛdi w’oma lo Ndjale ka Nilɛ.
^ Mbuta ate Efaratɛ.
^ Kana “lombo.”
^ Kana “savɔ.”
^ Kana “nsaki ka wolo ka anima atɔ.”
^ Tshɛk., “ngɔndɔ.”
^ Kana “tozambizambi t’angɛndangɛnda.”
^ Kana “oya ande wa diwala?”
^ Kana “anima.”
