Jɛrɛmiya 23:1-40
23 Jehowa kata ate:+ “Mananu le alami w’ɛkɔkɔ wadiaka ndo wahandjola ɛkɔkɔ wa lo dihole diami dia ndesha dongalonga!”
2 Ɔnkɔnɛ, Jehowa Nzambi k’Isariyɛlɛ kata lo dikambo di’alami w’ɛkɔkɔ walama anto ami ate: “Nyu nyakahandjola ɛkɔkɔ ami, nyu nyakatetemala mbadianganya ndo nyu kombadja yimba.”+
“Ɔnkɔnɛ, dimi layonyodja yimba l’ɔtɛ w’etsha anyu wa kɔlɔ,” mbata Jehowa.
3 “Ko dimi layotshumanya atshikadi w’ɛkɔkɔ ami kaamɛ oma lo wedja tshɛ wakamaahandjola,+ dimi layowakaloya lo ahole awɔ watowɔlɛka+ ndo vɔ wayotanɛ ko wayofulanɛ.+
4 Ndo dimi layowatondjiyɛ alami wayowalamaka mɛtɛ.+ Vɔ hawoka wɔma nto kana nsaka lokomba ndo ndooko wɔnɛ wayoshishɔ,” mbata Jehowa.
5 “Eenda, nshi yekɔ lo ndjaye,” mbata Jehowa, “yayomotondjiyɛ Davidɛ lokonɔ*+ la losembwe. Ko nkumekanga kɛmɔtshi ayolɛ+ ndo ayonga la shɛnɔdi, ayosukɛ losembwe ndo sambo k’ɔlɔlɔ lo wodja.+
6 Lo nshi yande, Juda ayoshimbamɛ+ ndo Isariyɛlɛ ayodjasɛ lo lotui tshitshi.+ Ndo wayowelɛ ɔnɛ: Jehowa ekɔ Losembwe laso.”+
7 “Koko nshi yekɔ lo ndjaye,” mbata Jehowa, “yahawatota nto ɔnɛ: ‘Lo mɛtɛ oko wele Jehowa la lɔsɛnɔ, ɔnɛ lakatondja ase Isariyɛlɛ oma lo wodja w’Edjibito!’+
8 Koko ɔnɛ: ‘Lo mɛtɛ oko wele Jehowa la lɔsɛnɔ, ɔnɛ lakatondja ndo lakakaloya tokanula ta lo luudu l’Isariyɛlɛ oma lo wodja wa lo nɔrdɛ ndo oma lo wedja tshɛ wakamaahandjola,’ ko vɔ wayodjasɛ lo wodja awɔ hita.”+
9 Lo dikambo di’amvutshi:
Otema ami wambɔkɔmɔ.
Weka ami tshɛ wekɔ lo nsukasuka.
Dimi laya oko onto lambodjɔNdo oko onto lambɔlɛmba la wanu,L’ɔtɛ wa Jehowa ndo l’ɔtɛ w’ɛtɛkɛta ande w’ekila.
10 Nɛ dia wodja wambolola la akanga wa loseka;+L’ɔtɛ wa mananu, wodja wambɔtɔ lo otanda+Ndo ahole wa ndesha dongalonga wa l’oswe wamboma.+
Yoho yawɔ ya lɔsɛnɔ yekɔ kɔlɔ ndo vɔ kambaka la wolo awɔ lo yoho ya kɔlɔ.
11 “Ndo omvutshi ndo ɔlɔmbɛdi wambɔtɔ mindo.*+
Kaanga lo luudu lami hita, lambotana kɔlɔ yawɔ,”+ mbata Jehowa.
12 “Ɔnkɔnɛ, mboka kawɔ kayoyala ɔsɛlɔ ndo wodjima;+Vɔ wayosokɔma ndo wayɔkɔ.
Nɛ dia dimi layela mpokoso le wɔLo ɔnɔnyi wa wokoyelo,” mbata Jehowa.
13 “Ndo dimi lambɛna kɛnɛ kele wɔnɔnyi le amvutshi wa la Samariya.+
Prɔfɛsiya yawɔ sɛngiyamaka oma le Baala,Ndo vɔ wekɔ lo minganyiya wodja ami w’Isariyɛlɛ.
14 Ndo dimi lambɛna akambo wa wɔnɔnyi le amvutshi wa la Jɛrusalɛma.
Vɔ salaka loseka+ ndo kɛndakɛndaka lo kashi;+Vɔ keketshaka* atshi wa kɔlɔ,Ndo vɔ hawokadimɔ oma lo kɔlɔ yawɔ.
Le mi, vɔ tshɛ wekɔ oko Sɔdɔma,+Ndo anto wadjasɛ lɛkɔ wekɔ oko Ngɔmɔra.”+
15 Ɔnkɔnɛ, Jehowa kanga lolembelembe kata lo dikambo di’amvutshi ate:
“Dimi layanga nsala dia vɔ ndɛ osongo w’ololoNdo layanga mbasha ashi wa lɔlɛngɔ dia nnɔ.+
Nɛ dia wetshelo w’ɛtɔlɔki wambokokanɛ lo wodja oma le amvutshi wa la Jɛrusalɛma.”
16 Jehowa kanga lolembelembe kata ate:
“Tanyohokamɛke ɛtɛkɛta w’amvutshi wanyotɛ prɔfɛsiya.+
Vɔ wekɔ lo nyokesa.*
Ɛnɛlɔ kanyotɛwɔ ndja oma l’etema awɔ hita,+Aha oma l’onyɔ wa Jehowa.+
17 Mbala la mbala, vɔ wekɔ lo mbutɛ wanɛ wahanɛmiya ɔnɛ:‘Jehowa akate ɔnɛ: “Nyu nyayonga la wɔladi.”’+
Ndo vɔ mbutɛka anto tshɛ wayela etema awɔ wa kɔlɔ ɔnɛ:‘Ndooko mpokoso kayoya le nyu.’+
18 Nɛ dia onto akɔna lakemala l’atei wa djui y’anto wa JehowaDia mɛna ndo mboka ɔtɛkɛta ande?
Akɔna akadje yimba lo ɔtɛkɛta ande dia mbooka?
19 Eenda, lɔpɛpɛ la wolo la Jehowa layɔpɛpa la nkɛlɛ;Oko ponganɛndji, lɔ layotshimba lo ɛtɛ w’akanga wa kɔlɔ.+
20 Nkɛlɛ ka Jehowa hatokitakitaEdja ndo nde ambosala ndo ambokotsha kɛnɛ kele lo otema ande.
Nyu nyayoshihodia dui sɔ dimɛna lo etena k’ekomelo ka nshi.
21 Dimi kotoma amvutshi, koko vɔ wakalawɔ.
Dimi kɔtɛkɛta la wɔ, koko vɔ wakate prɔfɛsiya.+
22 Koko otowemala l’atei wa djui y’anto ami,Tshike vɔ wotokonya anto ami dia mboka ɛtɛkɛta amiNdo wotowakonya dia vɔ nkalola oma lo mboka yawɔ ya kɔlɔ ndo oma lo etsha awɔ wa kɔlɔ.”+
23 “Onde dimi lekɔ tsho Nzambi kele suke,” mbata Jehowa, “aha Nzambi kele ndo etale?”
24 “Onde onto ɔmɔtshi koka ndjashɛ lo dihole dia woshamu diahamakoke mbɛɛna?”+ mbata Jehowa.
“Onde dimi handodisha olongo ndo nkɛtɛ?”+ mbata Jehowa.
25 “Dimi lakoke amvutshi wakate prɔfɛsiya ya kashi lo lokombo lami ɔnɛ: ‘Lakɛnyi dɔ! Lakɛnyi dɔ!’+
26 Polo l’etena kakɔna kayotetemala dui sɔ lo etema w’amvutshi, dia mbuta prɔfɛsiya ya kashi? Vɔ wekɔ amvutshi wata awui wa kashi w’oma lo etema awɔ hita.+
27 Vɔ nyangaka dia nkonya anto ami dia mbohɛ lokombo lami lo tshimbo y’alɔ wasakɔnɛwɔ, oko wakohɛ washɛwɔ lokombo lami l’ɔtɛ wa Baala.+
28 Omvutshi wakɛnyi dɔ asakole dɔ diakɔ, koko ɔnɛ lele la ɔtɛkɛta ami pombaka mbewoya ɔtɛkɛta ami lo yoho ya mɛtɛ.”
“Diɔtɔnganelo diakɔna diele lam’asa lɔlɛngɛsɛ la lɔtɔngɔ?” mbata Jehowa.
29 “Onde ɔtɛkɛta ami bu oko dja,”+ mbata Jehowa, “ndo oko maditɔ w’otshudi wa yaandjo wahandjola dive?”+
30 “Ɔnkɔnɛ, dimi layanga ndɔsha amvutshi,” mbata Jehowa, “wavana ɛtɛkɛta ami onto l’onto oma le wonyande.”+
31 “Dimi layanga ndɔsha amvutshi,” mbata Jehowa “wakamba la nemi yawɔ dia mbuta ɔnɛ: ‘Nde kata!’”+
32 “Dimi layanga ndɔsha amvutshi w’alɔ wa kashi,” mbata Jehowa, “waasakola ndo wakonya anto ami dia ntakɔ mboka l’ɔtɛ wa kashi yawɔ ndo ofunu awɔ.”+
“Koko dimi kombatoma kana mbadjangɛ. Ɔnkɔnɛ, vɔ hawotokondjiyɛ anto anɛ ndooko wahɔ,”+ mbata Jehowa.
33 “Ndo etena kakombola anto anɛ kana omvutshi kana ɔlɔmbɛdi ɔmɔtshi ɔnɛ: ‘Kakɔna kele wotsho* wa Jehowa?’ wɛ pombaka mbakadimola ɔnɛ: ‘“Nyu mbele wotsho! Ndo dimi layonyokasha,”+ mbata Jehowa.’
34 Koko omvutshi, ɔlɔmbɛdi kana anto wata ɔnɛ: ‘Ɔnɛ kele wotsho* wa Jehowa,’ dimi layodja onto ɔsɔ yimba ndo ase luudu lande.
35 Onto l’onto la l’atei anyu ekɔ lo mimbola osekande ndo ɔnango ɔnɛ: ‘Kakɔna kambokadimola Jehowa? Ndo kakɔna kambota Jehowa?’
36 Koko nyu hanyohombe nyimola wotsho* wa Jehowa nto, nɛ dia ɔtɛkɛta w’onto l’onto mbele wotsho,* ndo nyu nyambotshikitanya ɛtɛkɛta wa Nzambi kasɛna, Jehowa kanga lolembelembe, Nzambi kaso.
37 “Kombole omvutshi wate: ‘Okadimwelo akɔna wambokosha Jehowa? Ndo kakɔna kambota Jehowa?
38 Naka nyu ntetemala mbuta nyate: “Wotsho* wa Jehowa,” kete Jehowa kata ate: “L’ɔtɛ watanyu ɔnɛ: ‘Ɔtɛkɛta ɔnɛ kele wotsho* wa Jehowa,” l’ɔkɔngɔ wa dimi nyotɛ nte: ‘Hanyohombe mbuta nyate: “Wotsho* wa Jehowa!”’
39 Eenda, dimi layonyoonyiya ko nyokasha etale oma lalemi, nyu la osomba wakamanyosha nyu la watshɛnyu.
40 Ndo dimi layonyela nsɔnyi ka pondjo la diɔnyɔ dia pondjo diahohamɛki.”’”+
Nɔtɛ ka l'ɛse ka dikatshi
^ Kana “okitɔ.”
^ Kana “wakayala ɛtɔlɔki.”
^ Tshɛk., “keketshaka anya wa.”
^ Kana “wekɔ lo nyolodia la elongamelo ka kashi.”
^ Kana “losango lɔmɔtshi la wotsho.” Tshɛkɛta ya lo Hɛbɛru nyɛ yekɔ la elembetshielo 2: “ɛtɛkɛta wa wotsho w’oma le Nzambi” kana “dui dimɔtshi dia wotsho.”
^ Kana “losango la wotsho.”
^ Kana “losango la wotsho.”
^ Kana “losango la wotsho.”
^ Kana “Losango la wotsho.”
^ Kana “losango la wotsho.”
^ Kana “Losango la wotsho.”
