Jɛrɛmiya 24:1-10
-
Fingo y’amɛna la ya kɔlɔ (1-10)
24 Ko Jehowa akamɛnya asaka 2 wa fingo wokitshami la ntondo ka tɛmpɛlɔ ka Jehowa, l’ɔkɔngɔ wa Nɛbukadinɛza* nkumekanga ka Babilɔna ntɔla Jɛkɔniya*+ ɔna Jɛhɔyakima,+ nkumekanga ka Juda nde la ewandji wa la Juda, etshudi ndo etshudi wa yaandjo;* nde akawaɔshi oma la Jɛrusalɛma otsha la Babilɔna lo lɔhɔmbɔ.+
2 Kisaka kɛmɔtshi kaki la fingo y’amɛna efula, oko fingo ya ntondo, koko kisaka kekina kaki la fingo ya kɔlɔ efula, kɔlɔ kele yɔ kokoka ndɛma.
3 Oma laasɔ, Jehowa akamimbola ate: “Kakɔna kɛnayɛ na Jɛrɛmiya?” Ko dimi lakate nte: “Fingo; fingo y’amɛna yekɔ amɛna efula, koko nyɛ ya kɔlɔ yekɔ kɔlɔ efula, kɔlɔ kele yɔ hayokoke ndɛma.”+
4 Ko ɔtɛkɛta wa Jehowa wakaye le mi ɔnɛ:
5 “Jehowa Nzambi k’Isariyɛlɛ kata ate: ‘Lo ɛnyɛlɔ ka fingo y’amɛna nyɛ, dimi layenda ase Juda wele lo lɔhɔmbɔ la sso di’ɔlɔlɔ, wanɛ wakamatondja oma lo dihole nɛ otsha lo wodja w’ase Kaladiya.
6 Sso diami diayotetemala monga le wɔ lo ɔlɔlɔ awɔ, ko dimi layosala dia vɔ nkalola lo wodja ɔnɛ.+ Dimi layowahika ndo halowalanya; dimi layowaonɛ ndo halowakundola.+
7 Dimi layowasha otema dia mbeyami ɔnɛ dimi kele Jehowa.+ Vɔ wayoyala wodja ami ndo dimi layoyala Nzambi kawɔ,+ nɛ dia vɔ wayokalola le mi la etema awɔ tshɛ.+
8 “‘Koko lo dikambo dia fingo ya kɔlɔ, kɔlɔ kele yɔ hayokoke ndɛma,+ Jehowa kata ate: “Ngasɔ kayomenda Zɛdɛkiya+ nkumekanga ka Juda, ewandji ande, atshikadi wa Jɛrusalɛma wakatshikala lo wodja ɔnɛ, ndo wanɛ wodjashi lo wodja w’Edjibito.+
9 Dimi layowaetɛ ɛngɔ ka wɔnɔnyi ndo mpokoso le waolelo tshɛ wa la nkɛtɛ,+ lɔtɛngɔ, ɛtɛkɛta wa yokedi, kiɔkɔ ya diɔnyɔ, ndo mananu+ lo ahole tshɛ waadianganyami.+
10 Ndo dimi layowatomɛ lokuwa la ta,+ ndjala ka kasha la elando,*+ edja ndo vɔ wamboshila oma lo wodja wakamawasha vɔ la watshɛwɔ.”’”
Nɔtɛ ka l'ɛse ka dikatshi
^ Tshɛk., “Nɛbukadrɛza,” yoho kina ya mfunda.
^ Nde kelamɛ nto Jɛhɔyakina ndo Kɔniya.
^ Kana ondo “ambiki w’ahole w’eshamelo.”
^ Kana “hemɔ.”
