Jɛrɛmiya 26:1-24
26 Lo etatelo k’ɛlɔmbwɛlɔ ka Jɛhɔyakima+ ɔna Jɔsiya nkumekanga ka Juda, ɔtɛkɛta ɔnɛ wakaye oma le Jehowa:
2 “Jehowa kata ate: ‘Emala lo sɛkɛ dia luudu la Jehowa ndo tɛkɛta lo dikambo dia* anto tshɛ wa lo esomba wa Juda waya dia ndjɔtɛmɔla* lo luudu la Jehowa. Tɛwɔ awui tshɛ wamomokodjangɛ; tonyake ndooko dui.
3 Ondo vɔ wayohokamɛ ndo onto l’onto ayokadimɔ oma lo mboka kande ka kɔlɔ, ko dimi layotshikitanya kanyi yami lo dikambo* dia mpokoso kasangoyami dia mbaela l’ɔtɛ w’etsha awɔ wa kɔlɔ.+
4 Tɛwɔ wate: “Jehowa kata ate: ‘Naka hanyompokame lo ndjela ɛlɛmbɛ* ami wamomokitsha la ntondo kanyu,
5 lo mpokamɛ ɛtɛkɛta w’ekambi ami amvutshi wanyotomɛmi mbala la mbala,* wakinyu kompokamɛ,+
6 kete dimi layetɛ luudu lɔnɛ oko Shilo+ ndo dimi layetɛ osomba ɔnɛ ɛngɔ ka mananu le wedja tshɛ wa la nkɛtɛ.’”’”+
7 Ko ɛlɔmbɛdi, amvutshi ndo anto tshɛ wakoke Jɛrɛmiya ata ɛtɛkɛta ɛsɔ lo luudu la Jehowa.+
8 Ɔnkɔnɛ, etena kakashidiya Jɛrɛmiya la ntɛkɛta kɛnɛ tshɛ kakawodjangɛ Jehowa dia mbutɛ anto tshɛ, ɛlɔmbɛdi la amvutshi ndo anto tshɛ wakawonde ko wakate vate: “Wɛ mɛtɛ ayovɔ.
9 Lande na katayɛ prɔfɛsiya lo lokombo la Jehowa ɔnɛ: ‘Luudu lɔnɛ layoyala oko Shilo ndo osomba ɔnɛ wayolanyema ndo wayotshikala aha la onto ladjasɛ lɔkɔ’?” Ndo anto tshɛ wakatshumana lale Jɛrɛmiya lo luudu la Jehowa.
10 Etena kakoke ewandji wa la Juda ɛtɛkɛta ɛsɔ, vɔ wakaye oma lo luudu* la nkumekanga oya lo luudu la Jehowa ndo wakadjasɛ lo mbɔtwɛlɔ ka soko di’oyoyo dia Jehowa.+
11 Ɛlɔmbɛdi ndo amvutshi wakatɛ ewandji la anto tshɛ ɔnɛ: “Onto ɔnɛ sunganaka nongola dilanya dia nyɔi,+ nɛ dia nde akate prɔfɛsiya dikambo dia osomba ɔnɛ oko wakanyoki la atoyi anyu hita.”+
12 Ko Jɛrɛmiya akatɛ ewandji tshɛ la anto tshɛ ate: “Jehowa kakantome dia ndjota awui tshɛ wa prɔfɛsiya wakanyoki+ lo dikambo dia luudu lɔnɛ ndo di’osomba ɔnɛ.
13 Ɔnkɔnɛ, nyotshikitanya mboka yanyu la etsha anyu ndo nyokitanyiya dui dia Jehowa Nzambi kanyu, ko Jehowa ayotshikitanya kanyi yande lo dikambo* dia mpokoso kakandate lo dikambo dianyu.+
14 Koko le mi, dimi lekɔ lo anya anyu. Nyonsale kɛnɛ tshɛ kayonyɛna ɔlɔlɔ ndo dimɛna lo washo anyu.
15 Nyeye tsho dia naka nyu ndjakami, kete nyayela dikila diaha la onongo le nyu nyuamɛ, le osomba ɔnɛ ndo le anto wadjasɛ lɔkɔ, nɛ dia lo mɛtɛ Jehowa kakantome le nyu dia ndjota ɛtɛkɛta tshɛ wokanyu ɛsɔ.”
16 Ko ewandji ndo anto tshɛ wakatɛ ɛlɔmbɛdi la amvutshi ɔnɛ: “Onto ɔnɛ hakoke nongola dilanya dia nyɔi, nɛ dia nde akatotɛ akambo lo lokombo la Jehowa Nzambi kaso.”
17 Laadiko dia laasɔ, dikumanyi dimɔtshi dia wodja wakonɛɛ ko wakatatɛ mbutɛ etshumanelo k’otondo k’anto ɔnɛ:
18 “Mika+ ka la Mɔrɛshɛtɛ akate prɔfɛsiya lo nshi ya Hɛzɛkiya+ nkumekanga ka Juda ndo nde akatɛ anto tshɛ wa la Juda ate: ‘Jehowa kanga lolembelembe kata ate:
“Siɔna ayofusama oko ekambɔ,Jɛrusalɛma ayoyala tota dia elanyelo,+Ndo dikona dia Luudu* diayoyala oko ahole wa la diko wa lo okonda.”’*+
19 “Ko onde Hɛzɛkiya nkumekanga ka Juda ndo Juda y’otondo wakoodiake? Onde nde komboka Jehowa wɔma ndo kɔsɛngasɛnga Jehowa dia mbooka kɛtshi,* ko Jehowa akatshikitanya kanyi yande lo dikambo* dia mpokoso kakandate kendana la wɔ?+ Ɔnkɔnɛ, tekɔ lo nyanga dia ndjaela mpokoso ka woke shoamɛ.*
20 “Ndo onto okina lakate prɔfɛsiya lo lokombo la Jehowa ele Uridja ɔna Shemaya ose Kiriatɛ-Jarima,+ ɔnɛ lakataka prɔfɛsiya lo dikambo dia osomba ɔnɛ ndo lo dikambo dia wodja ɔnɛ la ɛtɛkɛta wele oko wa Jɛrɛmiya.
21 Nkumekanga Jɛhɔyakima+ nde la apami ande tshɛ wa wolo ndo ewandji tshɛ wakoke ɛtɛkɛta ande, ko nkumekanga akayange dia mbodiaka.+ Kam’akoke Uridja dui diakɔ, nde akoke wɔma ko akalawɔ otsha l’Edjibito.
22 Ko nkumekanga Jɛhɔyakima akatome Elɛnatana+ ɔna Akɛbɔrɛ ndo apami akina kaamɛ la nde otsha l’Edjibito.
23 Vɔ wakela Uridja oma l’Edjibito ndo wakatshu la nde le nkumekanga Jɛhɔyakima, ko nde akoodiake la lokuwa la ta+ ndo akakasha odo ande lo waombo w’anto k’anto.”
24 Ko Ahikama+ ɔna Shafana+ akasukɛ Jɛrɛmiya, ɔnkɔnɛ nde kokimɔma lo anya w’anto dia nde ndjakema.+
Nɔtɛ ka l'ɛse ka dikatshi
^ Kana “lo kɛnɛ kendana la.”
^ Kana “ndjokusamɛ.”
^ Kana “nyanga l’ɔtɛ wa.”
^ Kana “wetshelo.”
^ Tshɛk., “lakemalaka ko pindju ndo lakatomaka.”
^ Kana “luudu l’owandji.”
^ Kana “nyanga l’ɔtɛ wa.”
^ Kana “dikona dia tɛmpɛlɔ.”
^ Kana “oko dikona diele la esongo.”
^ Kana “nyanga l’ɔtɛ wa.”
^ Kana “anima aso.”
^ Kana “mpemba dia nɛndja elungi ka Jehowa.”
