Jɛrɛmiya 27:1-22
27 Lo etatelo k’ɛlɔmbwɛlɔ ka Jɛhɔyakima ɔna Jɔsiya, nkumekanga ka Juda, ɔtɛkɛta wa Jehowa ɔnɛ wakaye le Jɛrɛmiya ɔnɛ:
2 “Jehowa akambutɛ ate: ‘Yasalɛ eya ndo esembe, kele djawɔ lo nkingo kayɛ.
3 Oma laasɔ, tomɛwɔ nkumekanga ka Ɛdɔmɛ,+ nkumekanga ka Mɔaba,+ nkumekanga k’ase Amɔna,+ nkumekanga ka Tura+ ndo nkumekanga ka Sidɔna+ lo anya w’akɛndji wakaye la Jɛrusalɛma oya le Zɛdɛkiya nkumekanga ka Juda.
4 Shawɔ didjango nɛ dikambo dia nkumi yawɔ:
“‘“Jehowa kanga lolembelembe, Nzambi k’Isariyɛlɛ kata ate; nyu pombaka totɛ nkumi yanyu nyate:
5 ‘Dimi mbakatonge nkɛtɛ, anto ndo nyama yele laadiko dia nkɛtɛ la wolo ami w’efula ndo la lonya lami losembwe tɔɔ; ndo dimi lambodisha onto tshɛ lalangami.*+
6 Ndo kakianɛ, dimi lambokimɔ wedja ɛsɔ tshɛ lo anya w’okambi ami Nɛbukadinɛza+ nkumekanga ka Babilɔna; oyadi nyama ya mpango ya l’okonda, dimi lakawoshayɔ dia yɔ mbokambɛ.
7 Wedja tshɛ wayowokambɛ, nde, ɔnande la pami ndo okana ande wa pami polo lam’ayokoka etena ka wodja ande hita,+ etena kele wedja efula ndo nkumi ya dikanga ya weke wayowetɛ mfumbe kawɔ.’+
8 “‘“‘Naka wodja kana diolelo dimɔtshi ntona kambɛ Nɛbukadinɛza nkumekanga ka Babilɔna ndo ntona mbidja nkingo kawɔ l’ɛse ka osembe wa nkumekanga ka Babilɔna, dimi layosha wodja ɔsɔ dilanya la lokuwa la ta,+ la ndjala ka kasha, ndo la elando,’* mbata Jehowa, ‘polo lambaashila oshiki la lonya lande.’
9 “‘“‘Ɔnkɔnɛ, tanyohokamɛke amvutshi anyu, asadi anyu wa diendja, amɛnyi anyu w’alɔ, ase maji ndo alɔka anyu, wanɛ wanyotɛ ɔnɛ: “Nyu hanyotokambɛ nkumekanga ka Babilɔna.”
10 Nɛ dia vɔ wekɔ lo nyotɛ prɔfɛsiya ya kashi, dia vɔ nyɔtɔla etale mangana la wodja anyu ndo dimi layonyodianganya, ko nyu nyayovɔ.
11 “‘“‘Koko wodja wadja nkingo kawɔ l’ɛse ka osembe wa nkumekanga ka Babilɔna ndo wookambɛ, dimi layetawɔ dia vɔ ntshikala* lo wodja awɔ,’ mbata Jehowa, ‘dia vɔ mbokamba ndo mbidjasɛ lɔkɔ.’”’”
12 Dimi lakatɛ ndo Zɛdɛkiya+ nkumekanga ka Juda woho akɔ waamɛ nte: “Nyodje nkingo yanyu l’ɛse k’osembe wa nkumekanga ka Babilɔna ndo nyookambee nde l’anto ande, ko nyayotetemala nsɛna.+
13 Lande na kahombayɛ wɛ l’anto ayɛ mvɔ la lokuwa la ta,+ la ndjala ka kasha+ ndo la elando+ oko wakate Jehowa lo dikambo dia wodja wahatokambɛ nkumekanga ka Babilɔna?
14 Tanyohokamɛke ɛtɛkɛta w’amvutshi wanyotɛ ɔnɛ: ‘Nyu hanyotokambɛ nkumekanga ka Babilɔna,’+ nɛ dia vɔ wekɔ lo nyotɛ prɔfɛsiya ya kashi.+
15 “‘Nɛ dia dimi kombatoma,’ mbata Jehowa, ‘koko vɔ wekɔ lo mbuta prɔfɛsiya ya kashi lo lokombo lami, dui diayokonya dia dimi nyodianganya ndo nyu nyayovɔ, nyu l’amvutshi wanyotɛ prɔfɛsiya.’”+
16 Ndo dimi lakatɛ ɛlɔmbɛdi l’anto anɛ tshɛ nte: “Jehowa kata ate: ‘Tanyohokamɛke ɛtɛkɛta w’amvutshi anyu wanyotɛ prɔfɛsiya ɔnɛ: “Eenda, wayokaloya diangɔ dia lo luudu la Jehowa oma la Babilɔna, aha la ntshimbatshimba!”+ nɛ dia vɔ wekɔ lo nyotɛ prɔfɛsiya ya kashi.+
17 Tanyowahokamɛke. Nyokambee nkumekanga ka Babilɔna, ko nyu nyayotetemala nsɛna.+ Lande na kahomba osomba ɔnɛ ndanyema?
18 Koko naka vɔ wekɔ amvutshi ndo naka ɔtɛkɛta wa Jehowa wekɔ le wɔ, lam’alanganyu, nyowatshike wasɛngɛsɛngɛ Jehowa kanga lolembelembe diaha diangɔ diakatshikala lo luudu la Jehowa, lo luudu* la nkumekanga ka Juda ndo la Jɛrusalɛma tɔlama otsha la Babilɔna.’
19 “Nɛ dia Jehowa kanga lolembelembe kata lo dikambo dia dikundji,+ Ndjale,*+ pusupusu+ ndo diangɔ dikina diakatshikala lo osomba ɔnɛ,
20 diaki Nɛbukadinɛza nkumekanga ka Babilɔna kɔmbɔsa etena kakandatɔlɛ Jɛkɔniya ɔna Jɛhɔyakima, nkumekanga ka Juda lo lɔhɔmbɔ, oma la Jɛrusalɛma otsha la Babilɔna kaamɛ la ɛlɔhɛ tshɛ wa la Juda ndo wa la Jɛrusalɛma;+
21 ɛɛ, Jehowa kanga lolembelembe, Nzambi k’Isariyɛlɛ kata lo dikambo dia diangɔ diakatshikala lo luudu la Jehowa, lo luudu* la nkumekanga ka Juda ndo la Jɛrusalɛma ate:
22 ‘“Wayoditɔla la Babilɔna,+ ndo lɛkɔ mbayodiotshikala polo lushi layomodidja yimba,” mbata Jehowa. “Ko dimi layodikaloya ndo layodiela nto lo dihole nɛ.”’”+
Nɔtɛ ka l'ɛse ka dikatshi
^ Tshɛk., “le onto tshɛ lele ɔlɔlɔ lo washo ami.”
^ Kana “hemɔ.”
^ Tshɛk., “momuya.”
^ Kana “luudu l’owandji.”
^ Mbuta ate Ndjale ka nkonga ka lo tɛmpɛlɔ.
^ Kana “luudu l’owandji.”
