Jɛrɛmiya 3:1-25
3 Anto mimbolaka ɔnɛ: “Naka pami ambɔsɛka wadɛnde, ko womoto akɔ ambotshɔ ko ambotonga wadi aki pami kekina, onde omɛnde ayokoka kaloyana la nde nto?”
Onde wodja ɔsɔ kombidjama mindo tshɛ lo tshɛ?+
“Wɛ akasale kinumba la anto efula,+Ko onde kakianɛ, wɛ ayokoka nkalola le mi?” mbata Jehowa.
2 “Onyiya washo ayɛ otsha lo tokonakona ta hwe kele enda.
Lende akiwɔ kombeyana la yɛ la wolo?
Wɛ akadjasɛ l’emamu wa mboka dikambo diawɔ,Oko yekekɔ* l’oswe wa shɛnga.
Wɛ ekɔ lo ntetemala mbidja wodja mindoLa kinumba kayɛ ndo la kɔlɔ kayɛ.+
3 Ɔnkɔnɛ, mvula ka hielahela kambokimamɛ,+Ndo ndooko mvula yalɔ lo nshi y’avula w’ekomelo.
Wɛ ekɔ la leendo* la kɔlɔ laki womoto lasala kinumba;Wɛ halange mboka nsɔnyi.+
4 Koko kakianɛ, wɛ ekɔ lo mbelɛmi wate:‘Papa kami, wɛ ekɔ osekami l’oma ko dikɛnda diami!+
5 Onde onto pombaka ntshikala la kumbɛkumbɛ pondjo,Kana nama okomba nshi tshɛ?’
Kɛsɔ mbatayɛ,Koko wɛ tetemalaka nsala kɔlɔ tshɛ keyɛ la akoka wa nsala.”+
6 Lo nshi ya nkumekanga Jɔsiya,+ Jehowa akambutɛ ate: “‘Onde wɛ ambɛna kɛnɛ kambosala Isariyɛlɛ lele bu la kɔlamelo? Nde ambotshɔ lo dikona tshɛ di’otale ndo l’ɛse k’osongo tshɛ wele l’akatshi efula dia tosala kinumba.+
7 Kaanga l’ɔkɔngɔ wa nde nsala akambo asɔ tshɛ, dimi lakatetemala mbotɛ dia nde kalolɛmi,+ koko nde kokalola; ndo Juda akatetemala menda kadiyɛnde ka lokeso.+
8 Etena kakamɛnyi dui sɔ, dimi lakasɛkɛ Isariyɛlɛ lele bu la kɔlamelo lo mbosha mukanda wa odiakelo wa diwala+ l’ɔtɛ wa loseka lande.+ Koko Juda kadiyɛnde ka lokeso komboka wɔma; nde lawɔ akatshu ko akatosala kinumba.+
9 Nde akɔshi kinumba kande oko dui di’anyanya, ndo nde akatetemala mbidja wodja mindo lo nsala loseka la ave ndo la esongo.+
10 Kaanga mbaki akambo asɔ tshɛ, Juda kadiyɛnde ka lokeso kokalolɛmi la otema ande tshɛ, koko la lokeso,’ mbata Jehowa.”
11 Ko Jehowa akambutɛ ate: “Isariyɛlɛ lele bu la kɔlamelo akɛnya dia nde* ekɔ la losembwe ndeka Juda ya lokeso.+
12 Tshɔka tewoya ɛtɛkɛta ɛnɛ lo nɔrdɛ:+
“‘“Isariyɛlɛ w’ɔtɔlɔki le, kalola,” mbata Jehowa.’+ ‘“Dimi hantokenda la nkɛlɛ,*+ nɛ dia dimi lekɔ la kɔlamelo,” mbata Jehowa.’ ‘“Dimi hantotshikala la kumbɛkumbɛ pondjo.
13 Dikambo ɔtɔi ele, etawɔ onongo ayɛ, nɛ dia wɛ akatɔmbɔkwɛ Jehowa Nzambi kayɛ. Wɛ tetemalaka mpandjola kɛtshi* kayɛ le angɛndangɛnda* l’ɛse k’osongo tshɛ wele l’akatshi efula, koko wɛ hakitanyiya dui diami,” mbata Jehowa.’”
14 Jehowa kata ate: “Nyu ana w’ɛtɔlɔki le, nyokalole nɛ dia dimi laya nkumɛnyu ka mɛtɛ;* ndo dimi layonyɔsa, 1 oma l’osomba ɔmɔtshi ndo 2 oma lo nkumbo kɛmɔtshi, ko dimi layonyɔtɔla otsha la Siɔna.+
15 Ndo dimi layonyosha alami w’ɛkɔkɔ wele otema ami mbalangaka,+ ko vɔ wayonyolesha la ewo ndo shɛnɔdi.
16 Lo nshi shɔ, nyu nyayonga efula ndo nyayɔtɔ elowa lo wodja,” mbata Jehowa.+ “Vɔ hawotota nto ɔnɛ: ‘Ɔshɛtɛ wa sheke wa Jehowa!’ Vɔ hawotonga nto l’etema anyu ndo hanyotowohɔ kana mbokombola, ndo ɔshɛtɛ akɔ hawotosalema nto.
17 L’etena kɛsɔ, vɔ wayelɛ Jɛrusalɛma ɔnɛ kiti ka lowandji ka Jehowa;+ ndo wedja tshɛ wayosanganyema kaamɛ la Jɛrusalɛma+ lo lokombo la Jehowa, ko vɔ hawototshininala dia ndjela etema awɔ wa kɔlɔ.”
18 Lo nshi shɔ, vɔ wayɔkɛndakɛnda kaamɛ, luudu la Juda kaamɛ la luudu l’Isariyɛlɛ,+ ndo vɔ wayoya kaamɛ oma lo wodja wa lo nɔrdɛ oya lo wodja wakamasha watshɛnyu oko etenyi k’okitɔ.+
19 Ko dimi lakakanyiya nte: ‘Dimi lakakodje l’atei w’ana ndo lakakosha wodja wa dimɛna, etenyi k’okitɔ koleki dimɛna l’atei wa wedja!’*+ Dimi lakakanyiya nto dia nyayombelɛ ɔnɛ: ‘Papa!’ Ndo ɔnɛ hanyototshika ndjelami.
20 ‘Lo mɛtɛ, lo ɛnyɛlɔ ka wadi la lokeso lakakitɔna la omɛnde,* luudu l’Isariyɛlɛ le, ngasɔ mbamoyonsalɛ akambo la lokeso,’+ mbata Jehowa.”
21 Londjo lekɔ lo mbokɛma lo tokonakona ta hwe,Alelo ndo ɛsɛngɔsɛngɔ w’ase Isariyɛlɛ,Nɛ dia vɔ wakalanya mboka kawɔ;Vɔ wakohɛ Jehowa Nzambi kawɔ.+
22 “Nyu ana w’ɛtɔlɔki, nyokalole.
Dimi layɔlɔngɔsɔla dionga dianyu dia ɛtɔlɔki.”+
“Sho anɛ, tamboya le yɛ,Jehowa le, nɛ dia wɛ kele Nzambi kaso.+
23 Lo mɛtɛ, tokonakona ndo lofunguso la lo akona wekɔ lokeso.+
Lo mɛtɛ, panda k’Isariyɛlɛ kekɔ le Jehowa Nzambi kaso.+
24 Koko ɛngɔ ka nsɔnyi* kambomana olimu wakadiɛnɛ watshɛso oma ko akɛnda aso,+Ɛkɔkɔ awɔ ndo ngɔmbɛ yawɔ,Anawɔ w’apami ndo anawɔ wa wamato.
25 Nyɛsɔ tolale lo nsɔnyi kaso,Ndo diɔnyɔ diaso diatokombe,Nɛ dia takasalɛ Jehowa Nzambi kaso pɛkato,+Sho la washɛso oma ko akɛnda aso polo ndo ɛlɔ,+Ndo sho kokitanyiya dui dia Jehowa Nzambi kaso.”
Nɔtɛ ka l'ɛse ka dikatshi
^ Tshɛk., “ose Arabiya.”
^ Tshɛk., “mfumu.”
^ Kana “anima ande.”
^ Tshɛk., “hantɔkɔlɛ elungi kami.”
^ Tshɛk., “mboka.”
^ Kana “tozambizambi t’ase wedja.”
^ Kana ondo “omɛnyu.”
^ Tshɛk., “l’atei w’alembe wa wedja.”
^ Tshɛk., “osekande.”
^ Kana “jambizambi ya nsɔnyi.”
