Jɛrɛmiya 32:1-44
32 Ɔtɛkɛta wa Jehowa wakaye le Jɛrɛmiya lo ɔnɔnyi wa 10 w’ɛlɔmbwɛlɔ ka Zɛdɛkiya nkumekanga ka Juda, mbuta ate lo ɔnɔnyi wa 18 wa ɛlɔmbwɛlɔ ka Nɛbukadinɛza.*+
2 Lo etena kɛsɔ, asɔlayi wa nkumekanga ka Babilɔna wakadinge Jɛrusalɛma ndo omvutshi Jɛrɛmiya akadihama lo Sɛkɛ dia Olamelo+ lo luudu* la nkumekanga ka Juda.
3 Nɛ dia Zɛdɛkiya nkumekanga ka Juda akoodihe+ ata ate: “Lande na katayɛ prɔfɛsiya ka nganɛ? Wɛ ekɔ lo mbuta wate: ‘Jehowa kata ate: “Dimi layokimɔ osomba ɔnɛ lo anya wa nkumekanga ka Babilɔna ko nde ayowɔsa,+
4 ndo Zɛdɛkiya nkumekanga ka Juda hatohandɔ oma le ase Kaladiya, nɛ dia nde mɛtɛ ayokimɔma lo anya wa nkumekanga ka Babilɔna ndo nde ayɔtɛkɛta la nde okoko lo okoko ndo ayɛnana la nde sso lo sso.”’+
5 ‘Nde ayɔtɔla Zɛdɛkiya otsha la Babilɔna ndo nde ayototshikala lɛkɔ polo ndo lam’ayomowodja yimba,’ mbata Jehowa. ‘Kaanga mbatetemalayɛ ndɔsha ase Kaladiya, wɛ hatotondoya.’”+
6 Jɛrɛmiya akate ate: “Ɔtɛkɛta wa Jehowa wamboya le mi ɔnɛ:
7 ‘Hanamɛlɛ ɔna Shaluma ɔnango shɔ ayoya le yɛ dia ndjokotɛ ate: “Somba ekambɔ kami ka la Anatɔta,+ nɛ dia wɛ kele onto la ntondo lele la lotshungɔ la kitshungola.”’”+
8 Hanamɛlɛ ɔnaki ɔnango papa akaye le mi paka oko wakate Jehowa, oya lo Sɛkɛ dia Olamelo ndo nde akambutɛ ate: “Lam’alangayɛ, somba ekambɔ kami ka la Anatɔta lo wodja wa Bɛnjamina, nɛ dia wɛ kele la lotshungɔ la kiɔsa ndo kitshungola. Sombatɔ.” Ko dimi lakeye dia ɔsɔ ekɔ ɔtɛkɛta w’oma le Jehowa.
9 Ɔnkɔnɛ, dimi lakasombe ekambɔ la Anatɔta oma le Hanamɛlɛ ɔnaki ɔnango papa. Dimi lakawɛdikɛ falanga,+ tɔshɛkɛlɛ* 7 ndo ekenga wa mfɛsa 10.
10 Ko dimi lakafunde dui sɔ lo mukanda,+ lakadje ohomɔ, lakelɛ ɛmɛnyi+ ndo lakɛdika falanga lo kilɔ.
11 Dimi lakɔshi mukanda washa lotshungɔ, wɔnɛ wakadjama ohomɔ lo ndjela didjango ndo ɛlɛmbɛ wa lɛɛta ndo wɔnɛ waki kombidjama ohomɔ,
12 ko dimi lakasha Baruka+ ɔna Neriya+ ɔna Mahaseya mukanda w’osombelo la ntondo ka Hanamɛlɛ ɔna ɔnango papa, k’ɛmɛnyi wakafunde lo mukanda w’osombelo ndo k’ase Juda tshɛ wakadjasɛ lo Sɛkɛ dia Olamelo.+
13 Ko dimi lakadjangɛ Baruka la ntondo kawɔ nte:
14 “Jehowa kanga lolembelembe, Nzambi k’Isariyɛlɛ kata ate: ‘Ɔsa mikanda ɛnɛ, mukanda washa lotshungɔ wakadjama ohomɔ ndo wɔnɛ waki kombidjama ohomɔ, kele djawɔ lo ɛngɔ ka diwomba dia vɔ namema lo etena k’otale.’
15 Nɛ dia Jehowa kanga lolembelembe, Nzambi k’Isariyɛlɛ kata ate: ‘Mvudu, dikambɔ ndo dikambɔ dia vinyɔ diayosombama nto lo wodja ɔnɛ.’”+
16 Ko dimi lakalɔmbɛ Jehowa l’ɔkɔngɔ wa dimi mbisha Baruka ɔna Neriya mukanda washa lotshungɔ lata nte:
17 “Hayii, Nkum’Olongo Nkumadiɔndjɔ Jehowa! Eenda, wɛ akasale olongo ndo nkɛtɛ la wolo ayɛ w’efula+ ndo la lonya layɛ losembwe tɔɔ. Ndooko dui diele diambo efula le yɛ,
18 wɛ Ɔnɛ lɛnya nunu di’anto ngandji ka kɔlamelo, koko lafuta munga y’ambutshi w’apami le* anawɔ w’apami l’ɔkɔngɔ awɔ,+ Nzambi ka mɛtɛ, ka woke ndo Kanga wolo, lele lokombo layɛ Jehowa kanga lolembelembe.
19 Wɛ ekɔ woke lo alako* ndo wolo lo etsha,+ wɛ lele washo ayɛ sɛdingolaka mboka tshɛ y’anto+ dia mbisha onto l’onto lo ndjela mboka yande ndo lo ndjela kɛnɛ kasalande.+
20 Wɛ akasale tolembetelo ndo ahindo lo wodja w’Edjibito weyama polo ndo ɛlɔ ndo wɛ akayasalɛ lokombo lo Isariyɛlɛ ndo l’atei w’anto+ oko wediɔ ɛlɔ.
21 Ndo wɛ akatondja wodja ayɛ w’Isariyɛlɛ oma lo wodja w’Edjibito, la tolembetelo, la ahindo, la lonya la wolo, la lonya losembwe tɔɔ ndo la etsha wa wɔma.+
22 “L’ɔkɔngɔ diko, wɛ akawasha wodja ɔnɛ wakayatshibe dia mbisha watshɛwɔ,+ wodja wakɛlanɛ abɛlɛ la osanga.+
23 Ko vɔ wakɔtɔ lɔkɔ ndo wakawɔshi, koko vɔ kokitanyiya dui diayɛ kana nkɛndakɛnda lo ɛlɛmbɛ ayɛ. Vɔ kosala ndooko dui diakayawadjangɛ dia vɔ nsala, diakɔ diakayasale dia mpokoso kɛnɛ tshɛ mbakomɛ.+
24 Eenda, anto wamboya ndo wamboka mpele dia odingelo dia mbɔsa osomba+ ndo l’ɔtɛ wa lokuwa la ta,+ ndjala ka kasha la elando,*+ osomba wayɔkɔ mɛtɛ lo anya w’ase Kaladiya wanɛ wɔɔlɔsha; kɛnɛ kakayate kambokotshama tshɛ oko wadiɛnayɛ kakianɛ.
25 Koko Nkum’Olongo Nkumadiɔndjɔ Jehowa le, wɛ akambutɛ wate: ‘Somba ekambɔ la falanga ndo elɛ ɛmɛnyi,’ kaanga mbele osomba wayokimɔma mɛtɛ lo anya w’ase Kaladiya.”
26 Ko ɔtɛkɛta wa Jehowa wakaye le Jɛrɛmiya ɔnɛ:
27 “Dimi ɔnɛ, dimi Jehowa, Nzambi k’anto tshɛ.* Onde ekɔ dui dimɔtshi diele diambo efula le mi?
28 Ɔnkɔnɛ, Jehowa kata ate: ‘Dimi layanga nkimɔ osomba ɔnɛ le ase Kaladiya ndo lo anya wa Nɛbukadinɛza* nkumekanga ka Babilɔna, ko nde ayowɔsa.+
29 Ndo ase Kaladiya walɔsha osomba ɔnɛ wayɔtɔ lɔkɔ, wayodja osomba ɔnɛ dja ndo wayowotshumba+ kaamɛ la mvudu yele lo nsambe yayɔ, anto wakalambolaka Baala elambo ndo wakalambolaka tozambizambi tokina elambo wa lotɛ dia mbotshami nkɛlɛ.’+
30 “‘Nɛ dia ase Isariyɛlɛ ndo ase Juda wambosala paka kɛnɛ kele kɔlɔ lo washo ami, oma ko akɛnda awɔ;+ ase Isariyɛlɛ wekɔ lo ntetemala mbotshami nkɛlɛ la elimu w’anya awɔ,’ mbata Jehowa.
31 ‘Nɛ dia osomba ɔnɛ, ntatɛ oma ko lushi lakawawoke polo ndo ɛlɔ, vɔ wekɔ paka kiɔkɔ ya nkɛlɛ ndo ya odudu le mi,+ dia vɔ minyɛma oma la ntondo kami,+
32 l’ɔtɛ wa kɔlɔ tshɛ yakasale ase Isariyɛlɛ ndo ase Juda dia mbotshami nkɛlɛ, vɔ, nkumi ya dikanga yawɔ,+ ewandji awɔ,+ ɛlɔmbɛdi awɔ, amvutshi awɔ,+ ndo ase Juda la wanɛ wadjasɛ la Jɛrusalɛma.
33 Vɔ wakatetemala mbishami ɛkɔngɔ, aha dungi diawɔ;+ kaanga mbakamatetemala mbaetsha mbala la mbala,* ndooko onto l’atei awɔ lakahokamɛ dia nongola ohokwelo.+
34 Ndo vɔ wakakitsha dikishi diawɔ dia nyɛtɛɛtɛ lo luudu lele la lokombo lami dia lidja mindo.+
35 Laadiko dia laasɔ, vɔ wakahike ahole wa la diko wa Baala lo Okidi w’Ɔna Hinɔmɛ,*+ dia vɔ tshumbaka anawɔ w’apami ndo anawɔ wa wamato lo dja dikambo dia Mɔlɛka,+ dui diakimi kombadjangɛ+ ndo diahatayalaka ndooko lushi lo otema ami* dia nsala dui dia wɔnɔnyi dia ngasɔ dia nkonya Juda lo nsala pɛkato.’
36 “Ɔnkɔnɛ, Jehowa Nzambi k’Isariyɛlɛ kata lo dikambo dia osomba ɔnɛ watanyu ɔnɛ wayokimɔma lo anya wa nkumekanga ka Babilɔna la lokuwa la ta, la ndjala ka kasha ndo la elando ate:
37 ‘Dimi layowatshumanya kaamɛ oma lo wedja tshɛ wakamaadianganya la nkɛlɛ kami, la odudu ami, la yɛnyi y’efula+ ndo dimi layowakaloya lo dihole nɛ ndo layotshika dia vɔ mbidjasɛka lo lotui tshitshi.+
38 Ndo vɔ wayonga anto ami ko dimi layonga Nzambi kawɔ.+
39 Ndo dimi layowasha otema ɔtɔi+ la mboka ɔtɔi dia vɔ mbokakami wɔma nshi tshɛ, dikambo dia ɔlɔlɔ awɔ ndo dia ɔlɔlɔ w’anawɔ lo ɔkɔngɔ awɔ.+
40 Ko dimi layodja la wɔ sheke ya pondjo,+ diaha dimi ntshika mbasalɛ ɔlɔlɔ,+ ndo dimi layodja wɔma ami lo etema awɔ, diaha vɔ mbokami ɔkɔngɔ.+
41 Dimi layɔngɛnangɛnaka lo dikambo diawɔ dia mbasalɛ ɔlɔlɔ+ ndo dimi layowaonɛ nge lo wodja ɔnɛ+ la otema ami tshɛ ndo la anima* ami tshɛ.’”
42 “Nɛ dia Jehowa kata ate: ‘Oko wakamela mpokoso ka wolo kɛnɛ tshɛ le wodja ɔnɛ, mbayomowaela ɛlɔlɔ* tshɛ waalakami.+
43 Ndo dikambɔ diayosombama nto lo wodja ɔnɛ,+ kaanga mbatanyu nyate: “Vɔ wekɔ nkɛtɛ ya shɛnga yaha la onto ndo nyama, ndo yɔ yakakimɔma le ase Kaladiya.”’
44 “‘Anto wayosomba dikambɔ la falanga, wayofunda mikanda washa lotshungɔ, wayodja ohomɔ ndo wayelɛ ɛmɛnyi oma lo wodja wa Bɛnjamina,+ oma lo ahole wodingi Jɛrusalɛma, oma lo esomba wa Juda,+ oma lo esomba wa lo lɛkɛ l’akona,+ oma lo esomba wa lo okidi ndo oma lo esomba wa lo sidɛ, nɛ dia dimi layokaloya mfumbe yawɔ,’+ mbata Jehowa.”
Nɔtɛ ka l'ɛse ka dikatshi
^ Tshɛk., “Nɛbukadrɛza,” yoho kina ya mfunda.
^ Kana “luudu l’owandji.”
^ Tshɛk., “lo ntolo ka.”
^ Kana “woke lo kɛnɛ kendana la asangwelo ayɛ.”
^ Kana “hemɔ.”
^ Tshɛk., “emunyi tshɛ.”
^ Tshɛk., “Nɛbukadrɛza,” yoho kina ya mfunda.
^ Tshɛk., “lakemalaka ko pindju ndo lakawaetshaka.”
^ Enda Elembetshielo, “Ngɛhɛna.”
^ Kana “diahatɔtɔka lo tokanyi tami.”
^ Enda Elembetshielo.
^ Kana “akambo w’ɛlɔlɔ.”
