Jɛrɛmiya 33:1-26
33 Ɔtɛkɛta wa Jehowa wakaye le Jɛrɛmiya mbala ka 2 etena kakinde aakadihami lo Sɛkɛ dia Olamelo+ ɔnɛ:
2 “Jehowa Otungi wa nkɛtɛ, Jehowa ɔnɛ lakayisale ndo lakayishikikɛ nge; Jehowa kele lokombo lande, nde kata ate:
3 ‘Ombele, ko dimi layoketawɔ ndo layonga suke dia kotɛ akambo wa weke, wahamanema mfundo ndo wakiyɛ kombeya.’”+
4 “Nɛ dia Jehowa Nzambi k’Isariyɛlɛ kata lo dikambo dia mvudu ya lo osomba ɔnɛ ndo mvudu ya nkumi ya dikanga ya Juda yambolanyema l’ɔtɛ wa mpele dia odingelo ndo wa lokuwa la ta,+
5 ndo lo dikambo dia wanɛ waya dia ndjɔlɔsha ase Kaladiya, walodia ahole anɛ la edo wa wanɛ wakamadiake lo nkɛlɛ kami ndo lo odudu ami, wanɛ wele kɔlɔ kawɔ kakankonya dia mbishɛ elungi kami oma lo osomba ɔnɛ ate:
6 ‘Dimi layanga mbeela ɛkɔnwɛlɔ ndo yoonge ya dimɛna,+ dimi layowakɔnɔla, layowasholɛ wɔladi w’efula ndo wa mɛtɛ.+
7 Dimi layokaloya ase Juda wele mfumbe ndo ase Isariyɛlɛ+ wele mfumbe, ndo dimi layowahika oko wakamasale oma lo etatelo.+
8 Dimi layowaɛdia oma lo onongo wa pɛkato yawɔ tshɛ yakawansalɛ+ ndo dimi layodimanyiya onongo wa pɛkato yawɔ tshɛ ndo munga yakawansalɛ.+
9 Ko osomba akɔ wayoyala le mi lokombo la ɔngɛnɔngɛnɔ, lotombo ndo olangala la ntondo ka wedja tshɛ wa la nkɛtɛ wayoka ɛlɔlɔ tshɛ wayomaasalɛ.+ Vɔ wayoka wɔma ndo wayosaka lokomba+ l’ɔtɛ w’ɛlɔlɔ tshɛ ndo wɔladi wayomowosha.’”+
10 “Jehowa kata ate: ‘Lo dihole nɛ diayonyota ɔnɛ diekɔ nkɛtɛ ya shɛnga, diaha la onto kana elongalonga, lo esomba wa Juda ndo lo toshinga ta Jɛrusalɛma taya tɔngɔ to, taha la onto kana anto wadjasɛ kana dongalonga, wayooka nto
11 londjo la ɔlɔ ndo londjo la ɔngɛnɔngɛnɔ,+ dui dia otshuki ndo dui dia otshukami, dui dia wanɛ wata ɔnɛ: “Nyosha Jehowa kanga lolembelembe losaka, nɛ dia Jehowa ekɔ ɔlɔlɔ;+ ngandji kande ka kɔlamelo tshikalaka pondjo!”’+
“‘Vɔ wayela elambo wa eokelo ka losaka lo luudu la Jehowa,+ nɛ dia dimi layokaloya ase wodja wele mfumbe oko wakidiɔ oma lo etatelo,’ mbata Jehowa.”
12 “Jehowa kanga lolembelembe kata ate: ‘Lo nkɛtɛ ya shɛnga nyɛ, yaha la onto kana elongalonga ndo lo esomba ayɔ tshɛ, alami w’ɛkɔkɔ wayonga nto la ahole wa ndeshaka dongalonga dia dongalonga diawɔ ndjomuyaka.’+
13 “‘Lo esomba wa lo lɛkɛ l’akona, lo esomba wa l’ɛtshi ka nkɛtɛ kele l’okidi, lo esomba wa lo sidɛ, lo ɛtshi ka nkɛtɛ ka Bɛnjamina, lo ahole wodingi Jɛrusalɛma+ ndo lo esomba wa Juda,+ dongalonga diayeta nto l’ɛse ka anya wa ɔnɛ ladiadia,’ mbata Jehowa.”
14 “‘Eenda, nshi yekɔ lo ndjaye,’ mbata Jehowa, ‘yayomokotsha daka dia dimɛna diakamalake lo dikambo dia luudu l’Isariyɛlɛ ndo luudu la Juda.+
15 Lo nshi shɔ ndo lo etena kɛsɔ, dimi layotondjiyɛ Davidɛ lokonɔ*+ la losembwe, ko nde ayela sambo k’ɔlɔlɔ ndo losembwe lo wodja.+
16 Lo nshi shɔ, Juda ayoshimbamɛ+ ndo Jɛrusalɛma ayodjasɛ lo lotui tshitshi.+ Ndo yɔ yayelamɛ ɔnɛ: Jehowa ekɔ Losembwe Laso.’”+
17 “Jehowa kata ate: ‘Ndooko onyake onto ɔmɔtshi l’oma lo ɔlɔndji wa Davidɛ kayodjasɛka lo kiti ka lowandji ka luudu l’Isariyɛlɛ,+
18 ndo ɛlɔmbɛdi w’ase Lɛwi hawohombaki pondjo onto layemala la ntondo kami dia nambola elambo wa lotshumba w’etondo, dia ntshumba elambo wa ntɔngɔ, ndo dia nambola elambo.’”
19 Ndo ɔtɛkɛta wa Jehowa wakaye nto le Jɛrɛmiya ɔnɛ:
20 “Jehowa kata ate: ‘Otondongaka nyu nyakakoke ndanya sheke yami yendana la yanyi ndo sheke yami yendana la otsho diaha yanyi la otsho ndjaaka lo tena diahombama,+
21 mbotokoka sheke yami yakamadje la okambi ami Davidɛ ndana,+ diaha nde monga la ɔna pami lolɛ oko nkumekanga lo kiti kande ka lowandji,+ ngasɔ mbediɔ ndo lo dikambo dia sheke yakamadje la ɛlɔmbɛdi w’ase Lɛwi, ekambi ami.+
22 Oko wahakoke alembe wa l’olongo mbadiema ndo lɔkɔngɔ la lo ndjale mbɛdikama, mbayomofudia tokanula* taki okambi ami Davidɛ ndo ase Lɛwi wankambɛ olimu.’”
23 Ko ɔtɛkɛta wa Jehowa wakaye nto le Jɛrɛmiya ɔnɛ:
24 “Onde wɛ hoke kɛnɛ kata anto anɛ ɔnɛ: ‘Jehowa ayɔsɛka nkumbo 2 yakandasɔnɛ’? Vɔ wekɔ lo salɛ anto ami hita akambo aha la dilɛmiɛlɔ ndo vɔ hawoyowaɔsa oko wodja.
25 “Jehowa kata ate: ‘Lo mɛtɛ, oko wakamashikikɛ sheke yami yendana la yanyi ndo la otsho,+ ɛlɛmbɛ* wa l’olongo ndo wa la nkɛtɛ,+
26 mbahamasɛkaki pondjo tokanula* ta Jakɔbɔ ndo ta okambi ami Davidɛ, ko ntona dia mbɔsa oma lo tokanula* tande emboledi wa tokanula* ta Abrahama, Isaka ndo Jakɔbɔ. Nɛ dia dimi layokaloya anto awɔ wele mfumbe+ ndo layowaoka kɛtshi.’”+
Nɔtɛ ka l'ɛse ka dikatshi
^ Kana “okitɔ.”
^ Tshɛk., “lɔtɔngɔ.”
^ Kana “wadjango.”
^ Tshɛk., “lɔtɔngɔ.”
^ Tshɛk., “lɔtɔngɔ.”
^ Tshɛk., “lɔtɔngɔ.”
