Jɛrɛmiya 35:1-19
-
Ase Rɛkabɛ wambosha ɛnyɛlɔ k’okitanyiya (1-19)
35 Ɔtɛkɛta wa Jehowa wakaye le Jɛrɛmiya lo nshi ya Jɛhɔyakima+ ɔna Jɔsiya, nkumekanga ka Juda ɔnɛ:
2 “Tshɔka lo luudu l’aseka Rɛkabɛ,+ tɔtɛkɛtɛ la wɔ ndo toye la wɔ oya lo luudu la Jehowa, lo luudu lɔmɔtshi l’oleelo;* oma laasɔ, ko wɛ mbasha wanu dia vɔ nnɔ.”
3 Ko dimi lakɔshi Jazaniya ɔna Jɛrɛmiya ɔna Habaziniya, anango, anande w’apami tshɛ ndo luudu l’otondo l’aseka Rɛkabɛ,
4 ko lakɔtɔ la wɔ lo luudu la Jehowa. Dimi lakaye la wɔ lo luudu l’oleelo laki ana wa Hanana ɔna Ingidaliya, okambi wa Nzambi ka mɛtɛ laki suke la luudu l’oleelo l’ewandji, laki la diko dia luudu l’oleelo la Maseya ɔna Shaluma olami wa soko.
5 Oma laasɔ, dimi lakakitsha akɔhɔ ndo akɔhɔ wa weke wolodiami la wanu la ntondo k’apami wa lo luudu l’aseka Rɛkabɛ, ko lakawatɛ nte: “Nyɔnɔ wanu.”
6 Koko vɔ wakate ɔnɛ: “Sho hatotɔnɔ wanu, nɛ dia Jɛhɔnadaba*+ ɔna Rɛkabɛ tshɛso akatodjangɛ ate: ‘Oyadi nyu kana ananyu hanyohombe pondjo nnɔ wanu.
7 Ndo nyu hanyohombe mbika luudu, monɛ ntɔngɔ, monɛ kana monga la dikambɔ dia vinyɔ. Koko nyu pombaka mbidjasɛka nshi tshɛ lo mvudu y’apɛma, dia nyu nsɛna edja lo wodja wadjasɛnyu oko angɛndangɛnda.’
8 Ɔnkɔnɛ, sho tekɔ lo ntetemala nkitanyiya dui dia Jɛhɔnadaba ɔna Rɛkabɛ tshɛso lo kɛnɛ tshɛ kakandatodjangɛ, lo ntona lo pondjo dia nnɔ woho tshɛ wa wanu, sho, wadiɛso, anaso w’apami ndo anaso wa wamato.
9 Ndo sho hatoke mvudu ya mbidjasɛka, sho bu la dikambɔ dia vinyɔ, dikambɔ kana ntɔngɔ.
10 Sho tekɔ lo ntetemala mbidjasɛ lo mvudu y’apɛma ndo nkitanyiya kɛnɛ tshɛ kakatodjangɛ tshɛso Jɛhɔnadaba.*
11 Koko etena kakaye Nɛbukadinɛza* nkumekanga ka Babilɔna dia ndjɔlɔsha wodja,+ sho takate shate: ‘Nyoye, nyɛsɔ totshu otsha la Jɛrusalɛma dia sho mpandɔ oma le asɔlayi w’ase Kaladiya la w’ase Suriya,’ ndo kakianɛ tekɔ lo mbidjasɛ la Jɛrusalɛma.”
12 Ko ɔtɛkɛta wa Jehowa wakaye le Jɛrɛmiya ɔnɛ:
13 “Jehowa kanga lolembelembe, Nzambi k’Isariyɛlɛ kata ate: ‘Tshɔka, tote ase Juda ndo wanɛ wadjasɛ la Jɛrusalɛma wate: “Onde nyu kotetemala keketshama dia nkitanyiya ɛtɛkɛta ami?”+ mbata Jehowa.
14 “Jɛhɔnadaba ɔna Rɛkabɛ akadjangɛ tokanula tande diaha nnɔ wanu, ko vɔ wakakitanyiya ɛtɛkɛta ande lo ntona mbanɔ polo ndo ɛlɔ, ɔnkɔnɛ vɔ wekɔ lo nkitanyiya didjango dia tshɛwɔ.+ Dimi lakanyotɛka mbala la mbala,* koko nyu kokitanyiyami.+
15 Ndo dimi lakatetemala nyotomɛ ekambi ami tshɛ amvutshi, lakaatomaka mbala la mbala*+ dia nyotɛ ɔnɛ: ‘Lam’alanganyu, onto l’onto l’atei anyu akadimɔ oma lo mboka yanyu ya kɔlɔ+ ndo nyosale kɛnɛ kele ɔlɔlɔ! Tanyoyelake tozambizambi tokina ndo tanyotikambɛke. Ko nyayotetemala mbidjasɛ lo wodja wakamanyosha nyu la watshɛnyu.’+ Koko nyu kompokɛ atoyi anyu kana pokamɛmi.
16 Tokanula ta Jɛhɔnadaba ɔna Rɛkabɛ wakakitanyiya didjango diakawadjɛ tshɛwɔ,+ koko anto anɛ kompokamɛmi.”’”
17 “Ɔnkɔnɛ Jehowa, Nzambi kanga lolembelembe, Nzambi k’Isariyɛlɛ kata ate: ‘Dimi layanga mbela Juda ndo wanɛ tshɛ wadjasɛ la Jɛrusalɛma mpokoso tshɛ kakamaahɛmɔla,+ nɛ dia dimi lakawatɛ, koko vɔ kompokamɛ ndo dimi lakatetemala mbaelɛ, koko vɔ kombetawɔ.’”+
18 Ko Jɛrɛmiya akatɛ ase luudu l’aseka Rɛkabɛ ate: “Jehowa kanga lolembelembe, Nzambi k’Isariyɛlɛ kata ate: ‘Lam’ele nyu nyakakitanyiya didjango dia tshɛnyu Jɛhɔnadaba ndo nyekɔ lo ntetemala nkitanyiya wadjango ande tshɛ, lo nsala kɛnɛ tshɛ kakandanyodjangɛ,
19 Jehowa kanga lolembelembe, Nzambi k’Isariyɛlɛ kata ate: “Kanula ya Jɛhɔnadaba* ɔna Rɛkabɛ hahombamaki pondjo dia nkamba la ntondo kami.”’”
Nɔtɛ ka l'ɛse ka dikatshi
^ Kana “mvudu ya l’etei.”
^ Tshɛk., “Jɔnadaba,” yoho ya mondo yafundama lokombo Jɛhɔnadaba.
^ Tshɛk., “Jɔnadaba,” yoho ya mondo yafundama lokombo Jɛhɔnadaba.
^ Tshɛk., “Nɛbukadrɛza,” yoho kina ya mfunda.
^ Tshɛk., “lakemalaka ko pindju ndo lakatɛkɛtaka.”
^ Tshɛk., “lakemalaka ko pindju ndo lakatomaka.”
^ Tshɛk., “Jɔnadaba,” yoho ya mondo yafundama lokombo Jɛhɔnadaba.
