Jɛrɛmiya 37:1-21
37 Nkumekanga Zɛdɛkiya+ ɔna Jɔsiya akatatɛ mbolɛ lo dihole dia Kɔniya*+ ɔna Jɛhɔyakima, nɛ dia Nɛbukadinɛza* nkumekanga ka Babilɔna akawetɛ nkumekanga lo wodja wa Juda.+
2 Koko nde la ekambi ande ndo anto wa lo wodja kompokamɛ ɛtɛkɛta wakate Jehowa lo tshimbo y’omvutshi Jɛrɛmiya.
3 Ko nkumekanga Zɛdɛkiya akatome Jehukalɛ+ ɔna Shelemiya nde la Zɛfaniya+ ɔna ɔlɔmbɛdi Maseya le omvutshi Jɛrɛmiya dia towotɛ ɔnɛ: “Lam’alangayɛ, lɔmba Jehowa Nzambi kaso lo wahɔ aso.”
4 Jɛrɛmiya aketetaka woho walangande l’atei w’anto, nɛ dia laasɔ ko watawodje lo lokanu.+
5 L’etena kɛsɔ, asɔlayi wa Farawɔ wakatombe oma l’Edjibito,+ ko ase Kaladiya wanɛ wakadinge Jɛrusalɛma wakoke losango lo dikambo diawɔ. Ɔnkɔnɛ, vɔ wakamɔ oma la Jɛrusalɛma.+
6 Ko ɔtɛkɛta wa Jehowa wakaye le omvutshi Jɛrɛmiya ɔnɛ:
7 “Jehowa Nzambi k’Isariyɛlɛ kata ate: ‘Kanyotote nkumekanga ka Juda, ɔnɛ lakanyotome dia ndjomimbola kanyi nyate: “Eenda, asɔlayi wa Farawɔ wayaye dia ndjonyokimanyiya wayohomba nkalola otsha lo wodja awɔ w’Edjibito.+
8 Ko ase Kaladiya wayokalola, wayɔlɔsha osomba ɔnɛ, wayowɔsa ndo wayowotshumba la dja.”+
9 Jehowa kata ate: “Tanyoyakesake* lo mbuta ɔnɛ: ‘Weho akɔ tshɛ, ase Kaladiya wayotomwɛ,’ nɛ dia vɔ hawototshɔ.
10 Kaanga otonyodiaka asɔlayi w’ase Kaladiya tshɛ wanyɔlɔsha ko ntshikala paka apami awɔ wakahomɔ mpota, vɔ wotoyemala oma lo mvudu yawɔ y’apɛma ndo wototshumba osomba ɔnɛ la dja.”’”+
11 Etena kakamɔ asɔlayi w’ase Kaladiya oma la Jɛrusalɛma l’ɔtɛ wa asɔlayi wa Farawɔ,+
12 Jɛrɛmiya akatombe oma la Jɛrusalɛma otsha lo ɛtshi ka nkɛtɛ ka Bɛnjamina+ dia tolongola yema yande lɛkɔ l’atei w’anto ande.
13 Koko etena kakandakome lo Soko dia Bɛnjamina, owandji w’alami, ɔnɛ lakawelɛka Iridja ɔna Shelemiya, ɔna Hananiya akande omvutshi Jɛrɛmiya ndo akawotɛ ate: “Wɛ ekɔ lo talawɔ otsha le ase Kaladiya!”
14 Ko Jɛrɛmiya akate ate: “Aha ngasɔ! Ndooko lɛnɛ atamalawɔ otsha le ase Kaladiya.” Koko nde kombohokamɛ. Ɔnkɔnɛ, Iridja akande Jɛrɛmiya ko akɔɔtɔlɛ le ewandji.
15 Ewandji wakoke Jɛrɛmiya+ nkɛlɛ k’efula, wakɔɔkɔmɔla ndo wakawodje lo lokanu*+ lo luudu laki sekeletɛlɛ Jɛhɔnatana, lɔnɛ lakawetɛ lokanu.
16 Wakadje Jɛrɛmiya lo lokanu,* lo mvudu ya mpika ndo nde akatshikala lɛkɔ nshi efula.
17 Ko nkumekanga Zɛdɛkiya akatome anto dia towɔsa ndo nkumekanga akawombola lo woshɛshɛ lo luudu*+ lande. Nde akawombola ate: “Onde ɔtɛkɛta ɔmɔtshi w’oma le Jehowa wekɔ?” Jɛrɛmiya akate ate: “Wekɔ!” ko nde akatetemala mbuta ate: “Wɛ ayokimɔma lo anya wa nkumekanga ka Babilɔna!”+
18 Jɛrɛmiya akatɛ nkumekanga Zɛdɛkiya nto ate: “Pɛkato kakɔna kakamakosalɛ wɛ la ekambi ayɛ ndo anto anɛ kakanyambidje lo lokanu?
19 Kakianɛ, lende ele amvutshi anyu wakanyotɛ prɔfɛsiya ɔnɛ: ‘Nkumekanga ka Babilɔna hatoya ndjonyɔlɔsha ndo hatɔlɔsha wodja ɔnɛ’?+
20 Nkumɛmi nkumekanga le, kakianɛ, hokamɛ lam’alangayɛ. Etawɔ kɛnɛ kakɔlɔmbami dia mbokami kɛtshi lam’alangayɛ. Tonkaloyake lo luudu la sekeletɛlɛ Jɛhɔnatana+ atokomotovɔ lɛkɔ.”+
21 Ko nkumekanga Zɛdɛkiya akadjanga dia vɔ mbidja Jɛrɛmiya lo lokanu laki lo Sɛkɛ dia Olamelo,+ ndo wakawoshaka mapa w’obolonga lushi la lushi oma lo shinga ya akatshi wa mapa+ polo l’etena kakashile mapa tshɛ lo osomba.+ Ko Jɛrɛmiya akatshikalaka lo Sɛkɛ dia Olamelo.
Nɔtɛ ka l'ɛse ka dikatshi
^ Nde kelamɛ nto Jɛhɔyakina ndo Jɛkɔniya.
^ Tshɛk., “Nɛbukadrɛza,” yoho kina ya mfunda.
^ Kana “anima anyu.”
^ Tshɛk., “wakawodje lo luudu la mɔlɔla.”
^ Tshɛk., “luudu la difuku.”
^ Kana “luudu l’owandji.”
