Jɛrɛmiya 38:1-28
38 Ko Shefatiya ɔna Matanɛ, Ngedaliya ɔna Pashura, Jukala+ ɔna Shelemiya ndo Pashura+ ɔna Malakidja wakoke ɛtɛkɛta wakatɛka Jɛrɛmiya anto tshɛ ate:
2 “Jehowa kata ate: ‘Onto tshɛ layotshikala lo osomba ɔnɛ ayovɔ la lokuwa la ta, la ndjala ka kasha ndo la elando.*+ Koko onto layoyakimɔ* le ase Kaladiya ayotetemala nsɛna ndo ayokondja lɔsɛnɔ* lande oko ɛngɔ ka dimbo* ndo ayɔsɛna.’+
3 Jehowa kata ate: ‘Lo mɛtɛ osomba ɔnɛ wayokimɔma lo anya w’asɔlayi wa nkumekanga ka Babilɔna ndo nde ayowɔsa.’”+
4 Ewandji wakatɛ nkumekanga vate: “Lam’alangayɛ, pami kɛnɛ adiakeme,+ nɛ dia nde ekɔ lo nkɔmɔla etema* w’asɔlayi wambotshikala lo osomba ɔnɛ ndo w’anto tshɛ lo mbatɛ ɛtɛkɛta wa ngasɔ. Nɛ dia pami kɛnɛ ekɔ lo nyanga, aha wɔladi w’anto anɛ, koko mpokoso kawɔ.”
5 Nkumekanga Zɛdɛkiya akakadimola ate: “Eenda, nde ekɔ lo anya anyu, nɛ dia nkumekanga hakoke nsala ndooko dui dia nyoshimba.”
6 Ko vɔ wakɔshi Jɛrɛmiya ndo wakawokadja lo difuku di’ashi diaki lo Sɛkɛ dia Olamelo+ dia Malakidja ɔna nkumekanga. Vɔ wakaholoya Jɛrɛmiya la ɛkɔdi. Ashi komonga lo difuku diakɔ, paka lɔtɛkɛ, ko Jɛrɛmiya akatatɛ dinda lo lɔtɛkɛ.
7 Ɛbɛdɛ-Mɛlɛkɛ+ ose Etiyɔpiya, ɔlɛnga* wa lo luudu* la nkumekanga, akoke dia wambodja Jɛrɛmiya lo difuku. Laasɔ ko nkumekanga odjashi lo Soko dia Bɛnjamina,+
8 ko Ɛbɛdɛ-Mɛlɛkɛ akatombe oma lo luudu* la nkumekanga ndo akatɛ nkumekanga ate:
9 “Nkumɛmi nkumekanga le, kɛnɛ kambosalɛ apami anɛ omvutshi Jɛrɛmiya kekɔ kɔlɔ! Vɔ wambowokadja lo difuku di’ashi, ndo nde ayovɔ lɔkɔ l’ɔtɛ wa ndjala, nɛ dia mbo ya ndɛ yaya bu lo osomba.”+
10 Ko nkumekanga akadjangɛ Ɛbɛdɛ-Mɛlɛkɛ ose Etiyɔpiya ate: “Ɔsa apami 30 oma lanɛ, kele nyototondja omvutshi Jɛrɛmiya oma lo difuku di’ashi la ntondo ka nde mvɔ.”
11 Ko Ɛbɛdɛ-Mɛlɛkɛ akɔshi apami ndo akatshu la wɔ otsha lo luudu* la nkumekanga lo dihole dia l’ɛse ka eombelo,+ vɔ wakɔshi ahɔndɔ amɔtshi w’emusu lɛkɔ ndo bɛtshi dia ahɔndɔ dia emusu, ko wakaholoyɛ Jɛrɛmiya la ɛkɔdi lo difuku diakɔ.
12 Ko Ɛbɛdɛ-Mɛlɛkɛ ose Etiyɔpiya akatɛ Jɛrɛmiya ate: “Lam’alangayɛ, dja ahɔndɔ ndo bɛtshi dia ahɔndɔ lam’asa kavu yayɛ la ɛkɔdi.” Jɛrɛmiya akasale ngasɔ,
13 ko vɔ wakakotola Jɛrɛmiya la ɛkɔdi ndo wakootondja oma lo difuku. Ndo Jɛrɛmiya akatshikala lo Sɛkɛ dia Olamelo.+
14 Nkumekanga Zɛdɛkiya akatome anto dia toya la omvutshi Jɛrɛmiya oya le nde lo soko dia 3 diele lo luudu la Jehowa ndo nkumekanga akatɛ Jɛrɛmiya ate: “Lekɔ la dui dimɔtshi dia kombola. Tombishɛke ndooko dui.”
15 Ko Jɛrɛmiya akatɛ Zɛdɛkiya ate: “Naka dimi kotɛ, wɛ mɛtɛ ayondjaka. Ndo naka dimi kosha dako, wɛ hatompokamɛ.”
16 Ɔnkɔnɛ, nkumekanga Zɛdɛkiya akatshibɛ Jɛrɛmiya lo woshɛshɛ ate: “Lo mɛtɛ oko wele Jehowa la lɔsɛnɔ, ɔnɛ lakatosha lɔsɛnɔ* lɔnɛ, dimi hantokodiaka ndo hantokokimɔ lo anya w’anto anɛ wayanga dia mbɔsa lɔsɛnɔ* layɛ.”
17 Ko Jɛrɛmiya akatɛ Zɛdɛkiya ate: “Jehowa Nzambi kanga lolembelembe, Nzambi k’Isariyɛlɛ kata ate: ‘Naka wɛ ndjakimɔ* le ewandji wa nkumekanga ka Babilɔna, lɔsɛnɔ layɛ layokokamɛ* ndo osomba ɔnɛ hawototshumbama la dja, ko wɛ l’ase luudu layɛ nyayokokamɛ.+
18 Koko naka wɛ hayakimwe* le ewandji wa nkumekanga ka Babilɔna, osomba ɔnɛ wayokimɔma le ase Kaladiya ndo vɔ wayowotshumba la dja,+ ko wɛ hatohandɔ oma lo anya awɔ.’”+
19 Ko nkumekanga Zɛdɛkiya akatɛ Jɛrɛmiya ate: “Dimi lekɔ la wɔma w’ase Juda wakete lo wedi w’ase Kaladiya, nɛ dia naka vɔ kimɔmi lo anya awɔ, vɔ mbeyaka salɛmi akambo la esehe tshɛ.”
20 Koko Jɛrɛmiya akate ate: “Hawotokokimɔ lo anya awɔ. Lam’alangayɛ, kitanyiya dui dia Jehowa diakotɛmi, ko awui wayeta dimɛna le yɛ ndo wɛ* ayotetemala nsɛna.
21 Koko naka wɛ ntona ndjakimɔ,* Jehowa akamɛnya ɔnɛ:
22 Eenda, wamato tshɛ wakatshikala lo luudu* la nkumekanga ka Juda wotatɔlama le ewandji wa nkumekanga ka Babilɔna+ ndo vɔ wekɔ lo mbuta vate:‘Apami wakayayaɛkɛ* le wɔ wambokokesa ndo wambokodja otshumba.+
Vɔ wambosala dia lokolo layɛ dinda lo lɔtɛkɛ.
Kakianɛ, vɔ wambonya demba.’
23 Vɔ wekɔ lo tatɔlɛ wadiɛyɛ tshɛ ndo anayɛ w’apami otsha le ase Kaladiya ndo wɛ hatohandɔ oma lo anya awɔ, koko nkumekanga ka Babilɔna+ ayokonda ndo osomba ɔnɛ wayotshumbama la dja l’ɔtɛ ayɛ.”+
24 Ko Zɛdɛkiya akatɛ Jɛrɛmiya ate: “Aha ndooko onto mbeya awui asɔ, diaha wɛ mvɔ.
25 Ndo naka ewandji mboka dia dimi lakasawodi la yɛ ko vɔ ndja ndjokotɛ ɔnɛ: ‘Lam’alangayɛ, otote kɛnɛ kakayate nkumekanga. Totoshɛke ndooko dui, ko sho hatotokodiaka.+ Kakɔna kakakote nkumekanga?’
26 wɛ pombaka mbakadimola wate: ‘Lakalɔmbaki nkumekanga, diaha nde kaloyami lo luudu la Jɛhɔnatana dia dimi tovɔ lɛkɔ.’”+
27 L’ɔkɔngɔ diko, ewandji tshɛ wakaye le Jɛrɛmiya ko wakawombola. Nde akawatɛ awui tshɛ wakawodjangɛ nkumekanga dia mbuta. Ko vɔ kombotɛ ndooko dui nto, nɛ dia ndooko onto lakoke sawo diawɔ.
28 Polo lushi lakɔsama Jɛrusalɛma, Jɛrɛmiya akatshikala lo Sɛkɛ dia Olamelo;+ nde aki paka lɔkɔ etena kakɔsama Jɛrusalɛma.+
Nɔtɛ ka l'ɛse ka dikatshi
^ Kana “hemɔ.”
^ Tshɛk., “ntshɔ otsha le.”
^ Kana “anima.”
^ Kana “ayohandɔ la lɔsɛnɔ lande.”
^ Tshɛk., “anya.”
^ Kana “ɔlɔhɛ ɔmɔtshi wakakambaka laka nkumekanga.”
^ Kana “luudu l’owandji.”
^ Kana “luudu l’owandji.”
^ Kana “luudu l’owandji.”
^ Kana “wayanga anima ayɛ.”
^ Kana “lakatosalɛ anima ɔnɛ.”
^ Tshɛk., “ntomba otsha.”
^ Kana “anima ayɛ wayotshikala la lɔsɛnɔ.”
^ Tshɛk., “ntomba otsha.”
^ Kana “anima ayɛ.”
^ Tshɛk., “ntomba otsha.”
^ Tshɛk., “Apami wa wɔladi ayɛ.”
^ Kana “luudu l’owandji.”
