Jɛrɛmiya 39:1-18
39 L’ɔnɔnyi wa 9 w’ɛlɔmbwɛlɔ ka Zɛdɛkiya nkumekanga ka Juda, lo ngɔndɔ ka 10, Nɛbukadinɛza* nkumekanga ka Babilɔna akaye la asɔlayi ande tshɛ la Jɛrusalɛma ndo vɔ wakayidinge.+
2 L’ɔnɔnyi wa 11 w’ɛlɔmbwɛlɔ ka Zɛdɛkiya, lo ngɔndɔ ka 4 nshi 9, vɔ wakatondola ehele k’osomba.+
3 Ndo ewandji tshɛ wa nkumekanga ka Babilɔna ɛnɛ wakɔtɔ, ko wakadjasɛ lo Soko dia L’atei:+ Nɛrɛngala-Sharɛzɛrɛ laki Samɛngarɛ, Nɛbɔ-Sarɛsɛkimɛ laki Rabisarisi,* Nɛrɛngala-Sharɛzɛrɛ laki Rabimangɛ* ndo ewandji ekina tshɛ wa nkumekanga ka Babilɔna.
4 Etena kakawaɛnyi Zɛdɛkiya nkumekanga ka Juda nde la asɔlayi tshɛ, vɔ wakalawɔ,+ wakatombe oma lo osomba l’otsho lo mboka k’otsha lo ekambɔ ka nkumekanga, lo soko diaki lam’asa mpele 2 ndo vɔ wakatetemala lo mboka k’otsha la Araba.+
5 Koko asɔlayi w’ase Kaladiya wakawatshanya, ko vɔ wakatonda Zɛdɛkiya lo laandja l’oswe wa Jeriko.+ Vɔ wakawonde ko wakawela le Nɛbukadinɛza* nkumekanga ka Babilɔna+ la Ribila lo wodja wa Hamatɛ,+ lɛnɛ akandatoolombosha.
6 Nkumekanga ka Babilɔna akadiake ana wa Zɛdɛkiya lɛkɔ la Ribila lo washo ande ndo nkumekanga ka Babilɔna akadiake ɛlɔhɛ tshɛ wa Juda.+
7 Ko nde akole Zɛdɛkiya washo; oma laasɔ, nde akookeleka mɔlɔla wa nkonga dia mbɔtɔla la Babilɔna.+
8 Oma laasɔ, ase Kaladiya wakatshumbe luudu la nkumekanga* ndo mvudu y’anto,+ ndo vɔ wakanyukola mpele dia Jɛrusalɛma.+
9 Nɛbuzaradana+ owandji w’alami, akande anto wakatshikala l’osomba, wanɛ wakete lo wedi ande ndo wanɛ tshɛ wakatshikala, ko akatshu la wɔ lo lɔhɔmbɔ la Babilɔna.
10 Koko Nɛbuzaradana owandji w’alami akatshike anto amɔtshi woleki wola lo wodja wa Juda, wanɛ waki komonga ndooko la ɛngɔ. Ndo nto, lushi lɔsɔ, nde akawasha dikambɔ dia vinyɔ la dikambɔ dia kambaka.*+
11 Ko Nɛbukadinɛza* nkumekanga ka Babilɔna akadjangɛ Nɛbuzaradana owandji w’alami lo dikambo dia Jɛrɛmiya ate:
12 “Ɔsande ndo lamakande; towosalɛke kɔlɔ ndo kowoshake kɛnɛ tshɛ kayondokɔlɔmba.”+
13 Ɔnkɔnɛ, Nɛbuzaradana owandji w’alami, Nɛbushazabana ɔnɛ laki Rabisarisi,* Nɛrɛngala-Sharɛzɛrɛ laki Rabimangɛ* ndo ɛnɛnɛ tshɛ wa nkumekanga ka Babilɔna wakatome anto,
14 ko vɔ wakatɔsa Jɛrɛmiya oma lo Sɛkɛ dia Olamelo+ ndo wakayookimɔ le Ngedaliya+ ɔna Ahikama+ ɔna Shafana+ dia nde mbɔtɔla lo luudu lande. Ko nde akatodjasɛ l’atei w’anto.
15 Etena kakadihama Jɛrɛmiya lo Sɛkɛ dia Olamelo,+ ɔtɛkɛta wa Jehowa wakaye le nde ɔnɛ:
16 “Tshɔka tote Ɛbɛdɛ-Mɛlɛkɛ+ ose Etiyɔpiya wate: ‘Jehowa kanga lolembelembe, Nzambi k’Isariyɛlɛ kata ate: “Dimi layanga nkotsha ɛtɛkɛta ami lo osomba ɔnɛ dikambo dia mpokoso, koko aha dia ɔlɔlɔ, ndo lushi lakɔ wɛ ayɛna dui diakɔ diambosalema.”’
17 “‘Koko dimi layokotshungola lushi lakɔ,’ mbata Jehowa, ‘ndo wɛ hatokimɔma le anto wokayɛ wɔma.’
18 “‘Nɛ dia dimi mɛtɛ layokohandja ndo wɛ hatovɔ la lokuwa la ta. Wɛ ayokondja lɔsɛnɔ* layɛ oko ɛngɔ ka dimbo,*+ nɛ dia wɛ akayaɛkɛ le mi,’+ mbata Jehowa.”
Nɔtɛ ka l'ɛse ka dikatshi
^ Tshɛk., “Nɛbukadrɛza,” yoho kina ya mfunda.
^ Kana lo ndjela okahanyelo wotshikitanyi wa tɔtɛkɛta ta lo efundelo wa Hɛbɛru, ekɔ “Nɛrɛngala-Sharɛzɛrɛ, Samangara-Nɛbɔ, Sarɛsɛkimɛ, Rabisarisi.”
^ Kana “owandji w’ase maji (ombeyi w’akambo wa tɔɔtɔ).”
^ Tshɛk., “Nɛbukadrɛza,” yoho kina ya mfunda.
^ Kana “luudu l’owandji.”
^ Kana ondo “elimu wa lokandja la wolo.”
^ Tshɛk., “Nɛbukadrɛza,” yoho kina ya mfunda.
^ Kana “owandji w’ɛlɔhɛ wa laka nkumekanga.”
^ Kana “owandji w’ase maji (ombeyi w’akambo wa tɔɔtɔ).”
^ Kana “anima.”
^ Kana “ayohandɔ la lɔsɛnɔ layɛ.”
