Jɛrɛmiya 4:1-31
4 Jehowa kata ate: “Isariyɛlɛ le, naka wɛ ayokalola,Naka wɛ ayokalola le miNdo naka wɛ ayonya dikishi diayɛ dia wɔnɔnyi la ntondo kami,Kete wɛ hatonga yekekɔ.+
2 Ndo naka wɛ ntshiba wate:‘Lo mɛtɛ oko wele Jehowa la lɔsɛnɔ!’ lo mɛtɛ, lo losembwe ndo lo sambo k’ɔlɔlɔ,Kete wedja wayoyakondjiyɛ ɔtshɔkɔ oma le nde,Ndo vɔ wayoyafuna lo dikambo diande.”+
3 Nɛ dia Jehowa katɛ ase Juda ndo ase Jɛrusalɛma ate:
“Nyoyafusee nkɛtɛ ya dimɛna,Ndo tanyotetemalake monɛ lo atɛndɛ.+
4 Nyoyanya mpota le Jehowa,Ndo nyonya ɛpɔpɔ w’etema anyu,+Nyu ase Juda ndo wanɛ wadjasɛ la Jɛrusalɛma,Diaha odudu ami nombalomba oko djaNdo ntshumba aha la onto layidima,L’ɔtɛ w’etsha anyu wa kɔlɔ.”+
5 Nyewoya dui sɔ la Juda ndo nyodiewoya la Jɛrusalɛma.
Nyode ekoko ndo nyode wɔɔndjɔ lo wodja w’otondo.+
Nyowele la wolo tshɛ ndo nyote nyate: “Nyotshumane kaamɛ,Ndo nyɛsɔ tolawɔ otsha lo esomba wodingami la mpele.+
6 Nyedia djembetelo* otsha lo Siɔna.
Nyoyange dihole di’eshamelo ndo tanyemalake,”
Nɛ dia dimi layanga mbela mpokoso oma lo nɔrdɛ,+ elanyelo ka woke.
7 Nde ambotomba oko ntambwɛ oma lo hioka yatɔ;+Ɔnɛ lalanya wedja ambotshɔ.+
Nde ambotomba oma lo dihole diande dia mbetɛ wodja ayɛ ɛngɔ ka wɔnɔnyi.
Esomba ayɛ wayolanyema aha la onto ladjasɛ lɔkɔ.+
8 Diakɔ diele, nyɔlɔtɛ akoto,+Nyosale otanda* ndo nyolele,Nɛ dia nkɛlɛ ka Jehowa kalombalomba katamɔ oma le so.
9 Jehowa kata ate: “Lushi lɔsɔ, otema* wa nkumekanga wayɔkɔmɔ,+Ndo etema* w’ewandji;Ɛlɔmbɛdi wayosaka lokomba, ndo amvutshi wayamba.”+
10 Ko dimi lakate nte: “Hayii, Nkum’Olongo Nkumadiɔndjɔ Jehowa! Lo mɛtɛ wɛ ambokesa anto anɛ+ ndo Jɛrusalɛma tshɛ lo tshɛ lo mbuta ɔnɛ: ‘Nyu nyayonga la wɔladi,’+ etena kele lokuwa la ta lekɔ lo nkingo yaso.”*
11 L’etena kɛsɔ, wayotɛ anto anɛ ndo Jɛrusalɛma ɔnɛ:
“Lɔpɛpɛ la dja l’oma lo tokonakona ta hwe ta l’osweLayɔmba ɔna womoto laki* anto ami;Aha dia mfufola kana mbɛdia.
12 Lɔpɛpɛ l’efula layoya oma lo ahole asɔ lo ndjela didjango diami.
Kakianɛ, dimi layewoya dombwelo lo dikambo diawɔ.
13 Eenda, nde ayoya oko wange wa mvula,Ndo pusupusu yande yekɔ oko lɔpɛpɛ la wolo.+
Mfalasa yande ndeka mpongo lowango.+
Mfɔnu le so, nɛ dia tambolanyema!
14 Jɛrusalɛma le, dia wɛ shimbamɛ, ɛdia otema ayɛ pudipudi oma lo kɔlɔ.+
Polo l’etena kakɔna kayoyoomba tokanyi ta kɔlɔ?
15 Nɛ dia dui dimɔtshi diekɔ lo mbewoya losango la Danɛ,+Ndo diɔ diekɔ lo mbewoya mpokoso lo akona wa Efrayimɛ.
16 Nyodiewoya, ɛɛ, le wedja;Nyodiewoya lo dikambo dia Jɛrusalɛma.”
“Todjamu* tekɔ lo ndjaye oma lo wodja w’etale,Ndo vɔ wayoda ekoko wa ta dia ndɔsha esomba wa Juda.
17 Vɔ wamboya ndjoyilɔsha lo wedi akɔ tshɛ oko alami wa l’oswe,+Nɛ dia yɔ yakantɔmbɔkwɛ,”+ mbata Jehowa.
18 “Mboka yayɛ hita ndo etsha ayɛ wayokadimɔ le yɛ.+
Ande ololo wele mpokoso kayɛ,Nɛ dia tɔ kambokoma polo l’otema ayɛ!”
19 Ande sui diami,* sui diami!
Lekɔ la paa k’efula l’otema ami.*
Otema ami wekɔ lo mbatatɛ.
Dimi haakoke ntshikala ki,Nɛ dia dimi* lamboka londjo la wɔɔndjɔ,Ombeka wa ta.*+
20 Wakewoya mpokoso laadiko dia mpokoso,Nɛ dia wodja w’otondo wambolanyema.
Mvudu yami y’apɛma yambolanyema la shashimoya,Ahɔndɔ ami w’apɛma+ lo kamula ka sso.
21 Polo l’etena kakɔna kayomotetemala mɛna djembetelo,*Kayomotetemala nongalonga wondjo wa wɔɔndjɔ?+
22 “Nɛ dia anto ami wekɔ dinginya;+Vɔ hawombidje yimba.
Vɔ wekɔ ana wa dinginya, wele bu la timba.
Vɔ wekɔ la timba* t’efula lo nsala kɔlɔ,Koko vɔ haweye woho wa nsala ɔlɔlɔ.”
23 Dimi lakende wodja, ko vɔ waki hwe ndo tɔngɔ to.+
Dimi lakende l’olongo, ko osase awɔ komonga nto.+
24 Dimi lakende akona, ko vɔ wakadidimaka,Ndo tokonakona takasukasukaka.+
25 Dimi lakende, ko ndooko onto lakikɔ,Ndo tofudu ta l’olongo tshɛ takafumbɔ.+
26 Dimi lakende, ndo ekambɔ k’elowa kakayala oswe wa shɛnga,Ndo wakanyukola esomba atɔ tshɛ.+
L’ɔtɛ wa Jehowa,L’ɔtɛ wa nkɛlɛ kande kadɔdɔ.
27 Nɛ dia Jehowa kata ate: “Wodja w’otondo wayoyala tɔngɔ to,+Koko hantowolanya tshɛ lo tshɛ.
28 L’ɔtɛ wa dui sɔ, wodja wayolela,+Ndo olongo wele la diko wayoyala wodjima.+
Nɛ dia dimi lakatɛkɛta, dimi lakɔshi yɛdikɔ,Ndo hantotshikitanya kanyi yami* kana ndjitshika.+
29 La londjo la ambahemi wa mfalasa ndo amboki wa eta,Osomba w’otondo wambolawɔ.+
Vɔ wambɔtɔ lo tohoka,Ndo wambodɛ lo ave.+
Esomba tshɛ wambɔsɛkama,Ndo ndooko onto ladjasɛ lɔkɔ.”
30 Etena kɛnɛ kamboyolanyema, kakɔna kayoyosala?
Wɛ akayalɔtshaka ahɔndɔ wa beela,Dia ndjalɛnga la dɛngalɛnga dia paonyi,Ndo dia nkonya washo ayɛ etale la tile y’edima.*
Koko wɛ akayaetɛ olangala lo anyanya,+Nɛ dia wanɛ wakakokombolaka wambokɔsɛka;Kakianɛ, vɔ woyanga dia mbɔsa lɔsɛnɔ layɛ.*+
31 Nɛ dia lakoke dui diele oko dia womoto lele la hemɔ,Paa kele oko ka womoto latata lɔɔnɔ dia mbota ɔnande l’enondo,Dui dia ɔna womoto la Siɔna latetemala pɛnganɛ.
Nde ekɔ lo nkalɛ awambo ande ata ate:+
“Mananu le mi, nɛ dia dimi* lambɔkɔmɔ l’ɔtɛ w’andjakanyi!”
Nɔtɛ ka l'ɛse ka dikatshi
^ Kana “ekundji ka djembetelo.”
^ Kana “Nyɔkɔmɔlɛ ntolo yanyu.”
^ Kana “dihonga.”
^ Kana “dihonga.”
^ Kana “etena kele lokuwa la ta lambokoma lo anima aso.”
^ Ɔnɛ ekɔ ɛtɛkɛta wa lɔlɛnga wendana la onto, ondo dia mɛnya kɛtshi kana kandji.
^ Tshɛk., “Alami,” mbuta ate wanɛ walama osomba dia nshikikɛ etena ka ndɔsha.
^ Tshɛk., “ɛsɔhi ami.”
^ Tshɛk., “lo mpele di’otema ami.”
^ Kana “anima ami.”
^ Kana ondo “wondjo wa kioko ya ta.”
^ Kana “ekundji ka djembetelo.”
^ Kana “lomba.”
^ Kana “monga la lonyangu.”
^ Kana “dɛdi dia sso.”
^ Kana “woyanga anima ayɛ.”
^ Kana “anima ami wambɔkɔmɔ.”
