Jɛrɛmiya 41:1-18
41 Lo ngɔndɔ ka 7, Ishimaɛlɛ ɔna Netaniya ɔna Elishama,+ laki lo ɔlɔndji wa nkumekanga* ndo ɔnɛnɛ ɔmɔtshi wa nkumekanga, akaye kaamɛ l’apami akina 10 le Ngedaliya ɔna Ahikama la Mizipa.+ Etena kakawalɛka diangɔ kaamɛ la Mizipa,
2 Ishimaɛlɛ ɔna Netaniya ndo apami 10 waki kaamɛ la nde wakonɛ ndo wakadiake Ngedaliya ɔna Ahikama ɔna Shafana la lokuwa la ta. Ɔnkɔnɛ, nde akadiake ɔnɛ lele nkumekanga ka Babilɔna akɔɔsɔnɛ dia nɔmbɔla wodja.
3 Ishimaɛlɛ akadiake ndo ase Juda tshɛ waki kaamɛ la Ngedaliya la Mizipa ndo asɔlayi w’ase Kaladiya waki lɛkɔ.
4 Lushi la 2 l’ɔkɔngɔ wa vɔ ndjaka Ngedaliya, la ntondo k’anto tshɛ mbeya dui sɔ,
5 apami 80 wakaye oma la Shɛkɛmɛ,+ oma la Shilo+ ndo oma la Samariya.+ Wakanya ndɛdu yawɔ, wakaatshatsha ahɔndɔ awɔ, vɔ wakayahomuya mpota,+ waki la elambo wa ntɔngɔ ndo tshɔ ya wɛma+ lo anya awɔ dia mbela lo luudu la Jehowa.
6 Ko Ishimaɛlɛ ɔna Netaniya akatombe oma la Mizipa dia tohomana la wɔ, atalele etena kakandatatshɔka. Etena kakandahomana la wɔ, nde akawatɛ ate: “Nyoye le Ngedaliya ɔna Ahikama.”
7 Koko lam’akawɔtɔ lo osomba, Ishimaɛlɛ ɔna Netaniya nde l’anto ande wakaadiake ko wakawakasha lo difuku di’ashi.
8 Koko apami 10 l’atei awɔ wakatɛ Ishimaɛlɛ vate: “Totodiakake, nɛ dia sho takashɛ eponga, asami, esɔ ndo osanga lo ekambɔ.” Ko nde kombadiaka kaamɛ la anangɛwɔ.
9 Ko Ishimaɛlɛ akakasha edo w’anto tshɛ wakandadiake lo difuku di’ashi dia woke diakasale nkumekanga Asa l’ɔtɛ wa Baasha nkumekanga k’Isariyɛlɛ.+ Ɔsɔ kele difuku di’ashi diakalodia Ishimaɛlɛ ɔna Netaniya la edo w’anto.
10 Ishimaɛlɛ akande atshikadi tshɛ wa la Mizipa,+ mbidja ndo ana wa wamato wa nkumekanga ndo anto tshɛ wakatshikala la Mizipa mfumbe, wanɛ wele Nɛbuzaradana owandji w’alami akawadje lo lokanu laki Ngedaliya+ ɔna Ahikama. Ishimaɛlɛ ɔna Netaniya akawande mfumbe ndo akatenyanya la wɔ otsha le ase Amɔna.+
11 Etena kakoke Johanana+ ɔna Karea ndo ewandji tshɛ w’asɔlayi waki kaamɛ la nde awui wa kɔlɔ tshɛ wakasale Ishimaɛlɛ ɔna Netaniya,
12 vɔ wakɔshi apami tshɛ ko wakatshu dia tɔlɔsha Ishimaɛlɛ ɔna Netaniya ndo vɔ wakatootana suke la ashi* wa weke la Ngibiyɔna.
13 Anto tshɛ waki kaamɛ la Ishimaɛlɛ wakangɛnangɛna etena kakawɛnyi Johanana ɔna Karea ndo ewandji tshɛ w’asɔlayi waki kaamɛ la nde.
14 Ko anto tshɛ wele Ishimaɛlɛ akaatɔlɛ mfumbe oma la Mizipa+ wakakadimɔ ndo wakakalola kaamɛ la Johanana ɔna Karea.
15 Koko Ishimaɛlɛ ɔna Netaniya nde la apami 8 l’atei w’anto ande wakahandɔ oma le Johanana ko wakatshu le ase Amɔna.
16 Johanana ɔna Karea nde la ewandji tshɛ w’asɔlayi waki kaamɛ la nde wakɔshi atshikadi w’anto oma la Mizipa, wanɛ wakawahandja oma le Ishimaɛlɛ ɔna Netaniya l’ɔkɔngɔ wa nde ndjaka Ngedaliya+ ɔna Ahikama. Vɔ wakakaloya apami, asɔlayi, wamato, ana ndo ɛnɛnɛ wa laka nkumekanga oma la Ngibiyɔna.
17 Ko vɔ wakatshu ndo wakatotshikala lo dihole dia mpango diaki Kimihamɛ suke la Bɛtɛlɛhɛma,+ wasangoya dia ntshɔ otsha l’Edjibito+
18 l’ɔtɛ w’ase Kaladiya. Nɛ dia vɔ wakawaokaka wɔma, oma ko etena kakadiake Ishimaɛlɛ ɔna Netaniya Ngedaliya ɔna Ahikama, ɔnɛ lele nkumekanga ka Babilɔna akɔɔsɔnɛ dia nɔmbɔla wodja.+
