Jɛrɛmiya 42:1-22
42 Ko ewandji tshɛ w’asɔlayi ndo Johanana+ ɔna Karea, Jezaniya ɔna Hɔshaya l’anto tshɛ ntatɛ oma le ɔnɛ loleki tshitshɛ polo le ɔnɛ loleki woke wakasukana
2 ko wakatɛ omvutshi Jɛrɛmiya vate: “Lam’alangayɛ, hokamɛ ɔsɛngɔsɛngɔ aso dia tooka kɛtshi ndo lɔmba Jehowa Nzambi kayɛ lo wahɔ aso, lo wahɔ w’atshikadi anɛ tshɛ, nɛ dia lo anto efula, yema tshitshɛ tsho mbambotshikala+ oko wakokayɛ diɛna.
3 Jehowa Nzambi kayɛ atote mboka kahombaso nkɛndakɛnda ndo kɛnɛ kahombaso nsala.”
4 Omvutshi Jɛrɛmiya akaakadimola ate: “Dimi lambonyooka ndo lekɔ lo nɔmba Jehowa Nzambi kanyu lo ndjela kɛnɛ kalɔmbanyu; ndo ɔtɛkɛta tshɛ wayonyokadimola Jehowa, dimi layonyotɛ. Dimi hantonyoshɛ ndooko dui.”
5 Vɔ wakakadimola Jɛrɛmiya vate: “Jehowa ayale ɔmɛnyi wa mɛtɛ ndo wa kɔlamelo le so naka hatosadi kɛnɛ tshɛ kayototɛ Jehowa Nzambi kayɛ lo tshimbo yayɛ.
6 Oyadi ɔlɔlɔ kana kɔlɔ, sho tayokitanyiya dui dia Jehowa Nzambi kaso, ɔnɛ lakotomaso le nde, dia akambo ndowana le so l’ɔtɛ wakitanyiyaso dui dia Jehowa Nzambi kaso.”
7 Nshi 10 l’ɔkɔngɔ, ɔtɛkɛta wa Jehowa wakaye le Jɛrɛmiya.
8 Ko nde akelɛ Johanana ɔna Karea ndo ewandji tshɛ w’asɔlayi waki kaamɛ la nde l’anto tshɛ, ntatɛ oma le ɔnɛ loleki tshitshɛ polo le ɔnɛ loleki woke.+
9 Nde akawatɛ ate: “Jehowa Nzambi k’Isariyɛlɛ, ɔnɛ lakanyantome le nde dia towotɛ ɔsɛngɔsɛngɔ anyu dia mbokama kɛtshi kata ate:
10 ‘Naka nyu mɛtɛ nyayotshikala lo wodja ɔnɛ, kete dimi layonyohika ndo hantonyohandjola, dimi layonyonɛ ndo hantonyokundola, nɛ dia dimi layonyanga* l’ɔtɛ wa mpokoso kakamanyela.+
11 Tanyokake wɔma l’ɔtɛ wa nkumekanga ka Babilɔna, ɔnɛ lokanyu wɔma.’+
“‘Tanyokake wɔma l’ɔtɛ ande,’ mbata Jehowa, ‘nɛ dia dimi lekɔ kaamɛ la nyu, dia nyoshimbɛ ndo dia nyohandja oma lo anya ande.
12 Dimi layonyoka kɛtshi+ ndo nde ayonyoka kɛtshi, ko ayonyokaloya lo wodja anyu hita.
13 “‘Koko naka nyu mbuta nyate: “Keema, sho hatototshikala lo wodja ɔnɛ!” ndo nyu ntona nkitanyiya dui dia Jehowa Nzambi kanyu
14 lo mbuta ɔnɛ: “Keema, sho tayotshɔ lo wodja w’Edjibito+ lɛnɛ ahatatɛna ata, kana mboka wondjo wa wɔɔndjɔ kana ndjala; lɛkɔ mbayotodjasɛ,”
15 kete nyohokame ɔtɛkɛta wa Jehowa, nyu atshikadi wa Juda. Jehowa kanga lolembelembe, Nzambi k’Isariyɛlɛ kata ate: “Naka mɛtɛ nyamboyashikikɛ dia ntshɔ l’Edjibito, ko nyambotshɔ dia todjasɛ* lɛkɔ,
16 kete lokuwa la ta lokanyu wɔma layokoma le nyu lɛkɔ lo wodja w’Edjibito ndo ndjala ka kasha kokanyu wɔma kayoyelana la nyu l’Edjibito, ko nyu nyayovɔ lɛkɔ.+
17 Ndo anto tshɛ wamboyashikikɛ dia ntshɔ l’Edjibito todjasɛ lɛkɔ wayovɔ la lokuwa la ta, la ndjala ka kasha ndo la elando.* Ndooko onto l’atei awɔ layotshikala la lɔsɛnɔ kana layohandɔ lo mpokoso kayomowaela.”’
18 “Nɛ dia Jehowa kanga lolembelembe, Nzambi k’Isariyɛlɛ kata ate: ‘Paka oko wakahongɔ nkɛlɛ kami ndo odudu ami le anto wadjasɛ la Jɛrusalɛma,+ mbayohongɔ odudu ami le nyu naka nyu ntshɔ l’Edjibito, ndo nyu nyayoyala ɛngɔ kadjama etshii, ɛngɔ ka diambo, mananu ndo lɔtɛngɔ,+ ndo nyu hanyɛnaki dihole nɛ nto pondjo.’
19 “Atshikadi wa Juda le, Jehowa ambɔtɛkɛta lo dikambo dianyu. Tanyotshɔke l’Edjibito. Nyu pombaka mbeya mɛtɛ dia dimi lambonyɔhɛmɔla ɛlɔ
20 ɔnɛ munga kanyu kayonyoshishɛ nsɛnɔ* yanyu. Nɛ dia nyu nyakantome le Jehowa Nzambi kanyu nyate: ‘Lɔmba Jehowa Nzambi kaso lo wahɔ aso kele yotote dui tshɛ diayota Jehowa Nzambi kaso, ko sho tayodisala.’+
21 Ndo dimi lakanyote ɛlɔ, koko nyu hanyotokitanyiya dui dia Jehowa Nzambi kanyu kana nsala kɛnɛ tshɛ kakandantomi dia ndjonyotɛ.+
22 Ɔnkɔnɛ, nyeye mɛtɛ dia la lokuwa la ta, la ndjala ka kasha ndo la elando mbayonyovɔ lo dihole diakombolanyu ntshɔ ndo todjasɛ.”+
Nɔtɛ ka l'ɛse ka dikatshi
^ Kana “layonga la lɔkɔnyɔ.”
^ Kana “dia todjasɛ lo etena kɛmɔtshi.”
^ Kana “hemɔ.”
^ Kana “anima.”
