Jɛrɛmiya 43:1-13
43 Etena kakashidiya Jɛrɛmiya mbutɛ anto tshɛ ɛtɛkɛta ɛsɔ tshɛ w’oma le Jehowa Nzambi kawɔ, ɔtɛkɛka tshɛ wakootome Jehowa Nzambi kawɔ dia ndjowatɛ,
2 Azariya ɔna Hɔshaya, Johanana+ ɔna Karea ndo akanga w’etako tshɛ wakatɛ Jɛrɛmiya ɔnɛ: “Kɛnɛ katayɛ kekɔ kashi! Jehowa Nzambi kaso hakotomi dia ndjototɛ ɔnɛ: ‘Tanyotshɔke l’Edjibito dia todjasɛ lɛkɔ.’
3 Koko Baruka+ ɔna Neriya kakotshutshuya dia tokimɔ lo anya w’ase Kaladiya, dia todiaka kana tɔtɔla lo lɔhɔmbɔ la Babilɔna.”+
4 Ɔnkɔnɛ, Johanana ɔna Karea nde la ewandji tshɛ w’asɔlayi ndo anto tshɛ kokitanyiya dui dia Jehowa dia ntshikala lo wodja wa Juda.
5 Koko Johanana ɔna Karea nde la ewandji tshɛ w’asɔlayi wakɔshi atshikadi tshɛ wa la Juda wakakalola oma lo wedja tshɛ wakawadianganyema dia ndjodjasɛ lo wodja wa Juda.+
6 Vɔ wakɔshi apami, wamato, ana, ana wa wamato wa nkumekanga ndo anto tshɛ* wele Nɛbuzaradana+ owandji w’alami akaatshike vɔ la Ngedaliya+ ɔna Ahikama,+ ɔna Shafana+ ndo omvutshi Jɛrɛmiya nde la Baruka ɔna Neriya.
7 Ndo vɔ wakatshu otsha lo wodja w’Edjibito, nɛ dia vɔ kokitanyiya dui dia Jehowa, ko wakatshu polo la Tapanɛhɛsɛ.+
8 Ko ɔtɛkɛta wa Jehowa wakaye le Jɛrɛmiya la Tapanɛhɛsɛ ɔnɛ:
9 “Ɔsa ave wa weke lo anya ayɛ kele towashɛ lo nkɛtɛ ya lɔsɔha yele lo obondo w’atafadi wa lo mbɔtwɛlɔ ka luudu la Farawɔ la Tapanɛhɛsɛ, etena kenda ase Juda.
10 Oma laasɔ, ko wɛ mbatɛ wate: ‘Jehowa kanga lolembelembe, Nzambi k’Isariyɛlɛ kata ate: “Dimi layanga mbelɛ Nɛbukadinɛza* nkumekanga ka Babilɔna, okambi ami+ ndo dimi layokitsha kiti kande ka lowandji laadiko dia ave wamomoshɛ anɛ, ko nde ayoka luudu lande la dipɛma l’owandji laadiko diawɔ.+
11 Ndo nde ayɔtɔ lɔkɔ ko ayɔkɔmɔla wodja w’Edjibito.+ Sui dia nyɔi diayonga le onto tshɛ lakoka la sui dia nyɔi, lɔhɔmbɔ layonga le onto tshɛ lakoka la lɔhɔmbɔ, ndo lokuwa la ta layonga le onto tshɛ lakoka la lokuwa la ta.+
12 Dimi layotshumba mvudu* ya tozambizambi ta l’Edjibito la dja+ ndo nkumekanga kakɔ ayowatshumba ko ayowatɔla lo lɔhɔmbɔ. Nde ayoyaɔmba la wodja w’Edjibito oko watoyaɔmbaka olami w’ɛkɔkɔ dihɔndɔ diande ndo nde ayomɔ oma lɛkɔ lo wɔladi.*
13 Nde ayohendjahendja dikundji* dia Bɛtɛ-Shɛmɛshɛ* lo wodja w’Edjibito ndo nde ayotshumba mvudu* ya tozambizambi ta l’Edjibito la dja.”’”
Nɔtɛ ka l'ɛse ka dikatshi
^ Kana “anima tshɛ.”
^ Tshɛk., “Nɛbukadrɛza,” yoho kina ya mfunda.
^ Kana “tɛmpɛlɔ.”
^ Kana “aha la onto lawasalɛ kɔlɔ.”
^ Kana “mɔnima.”
^ Kana “Luudu (Tɛmpɛlɔ) la Wonya,” mbuta ate: Heliopɔlisɛ.
^ Kana “tɛmpɛlɔ.”
