Jɛrɛmiya 46:1-28
46 Ɔnɛ ele ɔtɛkɛta wa Jehowa le omvutshi Jɛrɛmiya lo dikambo dia wedja:+
2 Lo dikambo dia Edjibito,+ lo kɛnɛ kendana l’asɔlayi wa Farawɔ Neko+ nkumekanga k’Edjibito, waki l’omamu wa Ɔkɛdi wa Efaratɛ ndo wele Nɛbukadinɛza* nkumekanga ka Babilɔna akaalɛndja la Karakɛmishɛ lo ɔnɔnyi wa 4 w’ɛlɔmbwɛlɔ ka Jɛhɔyakima+ ɔna Jɔsiya nkumekanga ka Juda ɔnɛ:
3 “Nyɔlɔngɔsɔlɛ dingawo dianyu dia totshitshɛ* ndo dingawo dia weke,Ndo nyotshu lo ta.
4 Nyokeleke mfalasa ndo nyaheme, nyu ambahemi wa mfalasa.
Nyemale ndo nyɔlɔtɛ mfulɛ yanyu.
Nyɔkɛtɛmɔlɛ akɔnga ndo nyɔlɔtɛ akɔti anyu wa mbolo wa mposo mposo.
5 ‘Lande na kawaɛnami woka wɔma?
Vɔ wekɔ lo takalola ɛkɔngɔkɔngɔ, andɔshi awɔ wa ta hawɛwɔ.
Vɔ wambolawɔ la wɔma, andɔshi awɔ wa ta kɔmbɛwɔ.
Wɔma wekɔ lo ahole tshɛ,’ mbata Jehowa.
6 ‘Ɔnɛ lalawɔ efula hakoke ndawɔ, ndo andɔshi wa ta hawokoke mpandɔ.
Lo nɔrdɛ, lo omamu w’Ɔkɛdi wa Efaratɛ,Vɔ wambotakana ndo wambɔkɔ.’+
7 Akɔna ayaye oko Ɔkɛdi wa Nilɛ,Oko ɛkɛdi wele la ashi wambɔmbɔ?
8 Edjibito ekɔ lo ndjaye paka oko Ɔkɛdi wa Nilɛ,+Oko ɛkɛdi wele la ashi wambɔmbɔ,Ndo ekɔ lo mbuta ɔnɛ: ‘Dimi layodɛ ndo layokomba nkɛtɛ.
Dimi layolanya osomba ndo wanɛ wadjasɛ lɔkɔ.’
9 Nyodee, nyu mfalasa!
Nyolawɔ oko aladi, nyu pusupusu!
Andɔshi wa ta watshu,Kusha ndo Puta, wanɛ watokambaka la engawo,+Ndo ase Ludima,+ wanɛ watokambaka la ota ndo watowonɛka.*+
10 “Lushi lɔsɔ lekɔ la Nkum’Olongo Nkumadiɔndjɔ, Jehowa kanga lolembelembe, lushi la nsɔmbɔya dia nsɔmbɔya atunyi ande. Ndo lokuwa la ta layolanya, layolota ndo layolodiama la dikila diawɔ, nɛ dia Nkum’Olongo Nkumadiɔndjɔ, Jehowa kanga lolembelembe, ekɔ la olambo* lo wodja wa lo nɔrdɛ suke la Ɔkɛdi wa Efaratɛ.+
11 Dɛ otsha la Ngiliyadɛ dia tɔsa balasama,+Wɛ ɔna womoto l’emuma la Edjibito.
Wɛ amboyafudiyɛ ekanga ofudiafudia,Nɛ dia ndooko ɛkɔnwɛlɔ dikambo diayɛ.+
12 Wedja wamboka lokumu la nsɔnyi kayɛ,+Ndo delo diayɛ diambolola lo wodja.
Nɛ dia ɔndɔshi wa ta ambotakana le ɔndɔshi wa ta,Ko vɔ akɔ 2 wambɔkɔ kaamɛ.”
13 Ɔnɛ ele ɔtɛkɛta wakatɛ Jehowa omvutshi Jɛrɛmiya lo dikambo dia oyelo wa Nɛbukadinɛza* nkumekanga ka Babilɔna dia ndjɔlɛndja wodja w’Edjibito:+
14 “Tawɔ lo Edjibito, ewoyawɔ la Mingidɔlɛ.+
Ewoyawɔ la Nofu* ndo la Tapanɛhɛsɛ.+
Ta ɔnɛ: ‘Nyemale ndo nyoyalɔngɔsɔlɛ,Nɛ dia lokuwa la ta layodiaka wanɛ tshɛ wonyodingi.
15 Lande na kambowoshila apami anyu wa wolo?
Vɔ koshika ntanga,Nɛ dia Jehowa ambowakɔsha.
16 Efula kawɔ wekɔ lo ntakana ndo wekɔ lo nkɔ.
Vɔ wekɔ lo mbutanɛ lam’asawɔ ɔnɛ:
“Emala, tokalole le anto aso ndo lo wodja asoL’ɔtɛ wa lokuwa la ta la ngala.”’
17 Vɔ wambewoya lɛkɔ ɔnɛ:‘Farawɔ nkumekanga k’Edjibito ekɔ tsho londjo l’anyanyaƆnɛ lambetsha diaaso* wetshetsha.’+
18 ‘Lo mɛtɛ oko wemi la lɔsɛnɔ,’ mbata Nkumekanga, ɔnɛ lele lokombo lande Jehowa kanga lolembelembe,‘Nde* ayoya lɔkɔ oko Tabɔra+ l’atei w’akonaNdo oko Karamɛlɛ+ l’omamu wa ndjale.
19 Lɔngɔsɔla etshumu ayɛ dikambo dia lɔhɔmbɔ,Wɛ ɔna womoto lodjashi l’Edjibito.
Nɛ dia Nofu* ayoyala ɛngɔ ka wɔnɔnyi;Vɔ wayotshumbama* ndo wayotshikala aha la onto ladjasɛ lɔkɔ.+
20 Edjibito ekɔ oko ɔsɔngɔ wa ngɔmbɛ w’olangala,Koko ntshingo yalumatana yayowoyɛ oma lo nɔrdɛ.
21 Oyadi asɔlayi ande wakawɔshi l’olimu wele l’atei ande wekɔ oko ɛsɔngɔ wa ngɔmbɛ wa wata,Koko vɔ la wɔ wambokadimɔ ndo wambolawɔ kaamɛ.
Vɔ hawokoke nshika tanga,+Nɛ dia lushi la mpokoso kawɔ lamboya le wɔ,Etena ka mbikoya la wɔ.’
22 ‘Londjo lawɔ lekɔ oko lɔnɛ la oloyi watayakotola,Nɛ dia vɔ wambooyela la wolo, la tɔshɔka,Oko apami wakɔta esongo.*
23 Vɔ wayɔkɔta okonda awɔ,’ mbata Jehowa, ‘kaanga mbɛnamawɔ dia onto hakoke mbɔtɔ.
Nɛ dia vɔ wekɔ efula ndeka ɛndjɔ waheyama lofulo.
24 Ɔna womoto la Edjibito ayoshama nsɔnyi.
Wayowokimɔ lo anya w’anto wa lo nɔrdɛ.’+
25 “Jehowa kanga lolembelembe, Nzambi k’Isariyɛlɛ kata ate: ‘Kakianɛ, dimi layanga mendana la Amɔna+ wa la No,*+ la Farawɔ, la Edjibito, la tozambizambi tande+ ndo la nkumi ya dikanga yande, ɛɛ, la Farawɔ ndo wanɛ tshɛ wayaɛkɛ le nde.’+
26 “‘Ndo dimi layowakimɔ le wanɛ wayanga dia mbɔsa nsɛnɔ yawɔ,* le Nɛbukadinɛza* nkumekanga ka Babilɔna+ la ekambi ande. Koko l’ɔkɔngɔ wa laasɔ, anto wayodjasɛ lɔkɔ oko wakidiɔ lo nshi y’edjedja,’ mbata Jehowa.+
27 ‘Koko le yɛ wɛ okambi ami Jakɔbɔ, tokake wɔma,Ndo Isariyɛlɛ le,+ tosakake lokomba.
Nɛ dia dimi layokoshimbɛ oma l’etaleNdo tokanula* tayɛ oma lo wodja wakawawaɔshi mfumbe.+
Jakɔbɔ ayokalola ndo ayoyala ki, aha la futanyema,Ko ndooko onto layowaotsha wɔma.+
28 Ɔnkɔnɛ tokake wɔma, wɛ okambi ami Jakɔbɔ,’ mbata Jehowa, ‘nɛ dia dimi lekɔ kaamɛ la yɛ.
Dimi layoshila oshiki wedja tshɛ wakamakodianganya lɛkɔ,Koko wɛ, dimi halokoshila oshiki.+
Dimi layokohokola* lo yɛdikɔ yakoka,+Koko weho akɔ tshɛ dimi halokotshika aha la dilanya.’”+
Nɔtɛ ka l'ɛse ka dikatshi
^ Tshɛk., “Nɛbukadrɛza,” yoho kina ya mfunda.
^ Mbala efula, amboki w’eta mbakɛmbaka dingawo dia totshitshɛ sɔ.
^ Tshɛk., “wakamɛɛ.”
^ Kana “odiakelo.”
^ Tshɛk., “Nɛbukadrɛza,” yoho kina ya mfunda.
^ Kana “Memifisi.”
^ Tshɛk., “etena kakashikikɛma.”
^ Mbuta ate ɔnɛ lakalɛndja Edjibito.
^ Kana “Memifisi.”
^ Kana ondo “wayonga nkɛtɛ ya shɛnga.”
^ Kana “watshumanya nkunyi.”
^ Mbuta ate Tɛbɛsɛ.
^ Tshɛk., “Nɛbukadrɛza,” yoho kina ya mfunda.
^ Kana “wayanga anima awɔ.”
^ Tshɛk., “lɔtɔngɔ.”
^ Kana “layokongola.”
