Jɛrɛmiya 48:1-47
-
Prɔfɛsiya kendana la Mɔaba (1-47)
48 Jehowa kanga lolembelembe, Nzambi k’Isariyɛlɛ kata lo dikambo dia Mɔaba+ ate:
“Mananu le Nɛbɔ,+ nɛ dia tɔ kambolanyema!
Kiriatayima+ amboshama nsɔnyi ndo ambɔsama.
Eshamelo k’oshika* kamboshama nsɔnyi ndo kambɔlɛndjama.+
2 Vɔ hawoyotombola Mɔaba nto.
Vɔ wambɔtɔ sheke la Hɛshibɔna+ dia ɔkwɛlɔ atɔ ɔnɛ:
‘Nyoye towolanya diaha vɔ monga wodja.’
Ndo wɛ Madimɛna, pombaka ntshikala ki,Nɛ dia lokuwa la ta lekɔ lo takoyele.
3 Londjo la ekoko lekɔ lo mbokɛma oma la Hɔrɔnayima,+La elanyelo ndo la ɔkwɛlɔ wa wolo.
4 Mɔaba ambolanyema.
Anto ande wa totshitshɛ wekɔ lo mbida ekoko.
5 Lo wodelo w’otsha la Luhita, vɔ wekɔ lo tatetemala ndela etena katawadɛ.
Ndo lo mboka kaholɔ oma la Hɔrɔnayima, vɔ wekɔ lo mboka ekoko wa lɔkɔnyɔ l’ɔtɛ wa mpokoso.+
6 Nyolawɔ, nyotsha nsɛnɔ* yanyu!
Nyu pombaka monga oko osongo wa dihake lo oswe.
7 Lam’ele wɛ ndjaɛkɛka lo elimu ayɛ ndo lo diangɔ diayɛ dia nɛmɔ,Wɛ la wɔ ayɔsama.
Ndo Kɛmɔshɛ+ ayotshɔ lo lɔhɔmbɔKaamɛ la ɛlɔmbɛdi ande ndo ewandji ande.
8 Ondanyishi ayɔtɔ lo osomba tshɛ,Ndo ndooko osomba wayohandɔ.+
Okidi* wayolanyema,Ndo nkɛtɛ y’ebamubamu yayolanyema paka oko wakate Jehowa.
9 Nyodje djembetelo dikambo dia Mɔaba,Lam’ele tɔ kambolanyema, tɔ kayolawɔ,Ndo esomba atɔ wayonga ɛngɔ ka wɔma,Aha la onto ladjasɛ lɔkɔ.+
10 Mananu le onto lakotsha ɔkɛndɛ w’oma le Jehowa la dɛwɔlɛwɔ!
Mananu le onto lashimba lokuwa lande la ta dia nkɛdia dikila!
11 Ase Mɔaba watasutshasutshama oma ko akɛnda awɔ,Oko wanu wele laadiko dia ɛkɔngɔ.
Vɔ wataangɔma oma lo mbidika kɛmɔtshi otsha lo kekina,Ndo vɔ watatshɔka ndooko lushi lo lɔhɔmbɔ.
Diakɔ diele dɛtɔ diawɔ diekɔ woho akɔ waamɛ,Ndo opumu awɔ hawotshikitana.
12 “‘Ɔnkɔnɛ nyohokame, nshi yekɔ lo ndjaye,’ mbata Jehowa, ‘yayomotoma anto dia ndjowakukumɛ. Vɔ wayoyikukumɛ ko wayotshika mbidika yawɔ hwe, ndo vɔ wayodiodia mbaka yawɔ ya weke.
13 Ndo ase Mɔaba wayoshama nsɔnyi l’ɔtɛ wa Kɛmɔshɛ, paka oko wakashama luudu l’Isariyɛlɛ nsɔnyi l’ɔtɛ wa Bɛtɛlɛ, lɛnɛ akawayaɛkɛka.+
14 Lande na kasombɔnyu mbuta ɔnɛ: “Sho tekɔ andɔshi w’ata wa wolo, wele nsuke dia ndɔ ta”?’+
15 ‘Mɔaba ambolanyema,Wambɔtwɛ esomba ande la wolo,+Ndo ɛlɔngɔ ande w’apami woleki lokumu wambodiakema,’+
Mbata Nkumekanga, ɔnɛ lele lokombo lande Jehowa kanga lolembelembe.+
16 Mpokoso kayanga ndja le ase Mɔaba aha la ntshimbatshimba,Ndo ɔkwɛlɔ awɔ wekɔ lo ndjasukana esadi esadi.+
17 Wanɛ tshɛ waadingi wayowaoka kɛtshi,Wanɛ tshɛ weya lokombo lawɔ.
Nyowate ɔnɛ: ‘Ande woho wambohembɔma okalemba wa wolo, danga dia dimɛna lee!’
18 Holɔ oma lo lotombo layɛ,Ndo djasɛ la mposa k’ashi,* wɛ ɔna womoto ladjasɛ la Dibɔna,+Nɛ dia ondanyishi wa Mɔaba amboya ndjokɔlɔsha,Ndo nde ayolanya ahole ayɛ wodingami la mpele.+
19 Emala suke la mboka ndo endaka, wɛ ladjasɛ la Aroɛrɛ.+
Mbola pami katalawɔ ndo womoto layahandɔ ɔnɛ: ‘Ambotomba?’
20 Mɔaba amboshama nsɔnyi ndo ambotshama wɔma.
Lela ndo da ekoko.
Ewoya la Aranɔna+ ɔnɛ Mɔaba ambolanyema.
21 “Kilombo kamboya lo wodja w’ebamubamu,+ lo Hɔlɔna, Jahaza+ ndo Mefatɛ;+
22 lo Dibɔna,+ Nɛbɔ+ ndo Bɛtɛ-Dibalatayima;
23 lo Kiriatayima,+ Bɛtɛ-Ngamula ndo Bɛtɛ-Meɔna;+
24 lo Keriɔtɛ+ ndo Bozɛra; ndo lo esomba tshɛ wa lo wodja wa Mɔaba, wɛnɛ wele etale ndo wele suke.
25 ‘Wolo* wa Mɔaba wamboshila;Lonya lande lakɔkɔ,’ mbata Jehowa.
26 ‘Nyowodjoya,+ nɛ dia nde amboyatombola lo ndɔshana la Jehowa.+
Mɔaba ekɔ lo ndjangitola lo towɔki yande,Ndo nde ekɔ ɛngɔ ka diɔnyɔ.
27 Onde Isariyɛlɛ komonga ɛngɔ ka diɔnyɔ le yɛ?+
Onde nde akatanema l’atei w’ase wevi,Dia wɛ nsotsha ɔtɛ ayɛ ndo ntɛkɛta kɔlɔ lo dikambo diande?
28 Nyomɔ oma lo esomba ndo nyotodjasɛ lo dive, nyu ase Mɔaba,Ndo nyonge oko fudu k’enga kasala kefu katɔ l’omamu wa difuku.’”
29 “Sho tamboka lokumu la otako wa Mɔaba, nde ekɔ la ndjadiya k’efula,Lokumu la lotamanya lande, otako ande, ndjadiya kande ndo otema ande w’ofunu.”+
30 “‘Dimi mbeyaka nkɛlɛ kande,’ mbata Jehowa,‘Koko ɛtɛkɛta ande w’anyanya wayonga anyanya.
Vɔ hawotosala ndooko dui.
31 Diakɔ diayomolela l’ɔtɛ wa Mɔaba,Nɛ dia layoda ekoko l’ɔtɛ wa Mɔaba k’otondoNdo layokuma akumu l’ɔtɛ w’ase Kirɛ-Hɛrɛsɛ.+
32 La delo dioleki dia lo dikambo dia Jazɛrɛ,+Dimi layokolela, wɛ ɔkɔdi wa vinyɔ wa Sibima.+
Ntahe yayɛ yambɔmɔnganɛ yambotehɔ ndjale.
Yɔ yambokoma lo ndjale, la Jazɛrɛ.
Lo elowa ayɛ wa nshi y’ɔwɔ ndo lo dinela diayɛ di’elowaOndanyishi amboholɔ.+
33 Ɔngɛnɔngɛnɔ ndo ɔlɔ wambonyɛma oma lo ekambɔ k’elowaNdo oma lo wodja wa Mɔaba.+
Dimi lakasale diaha wanu ntetemala kɛlanɛ oma lo diamula dia wanu.
Ndooko onto layamula la ekoko w’ɔngɛnɔngɛnɔ.
Ekoko wayonga ekoko wotshikitanyi.’”+
34 “‘Ekoko wekɔ lo mbokɛma oma la Hɛshibɔna+ polo la Elealɛ.+
Vɔ wambonyiya awui awɔ polo la Jahaza,+Oma la Zɔara polo la Hɔrɔnayima+ polo la Engalata-Shelishiya.
Kaanga ashi wa Nimirimɛ wayolanyema.+
35 Dimi layonya oma la Mɔaba,’ mbata Jehowa,‘Ɔnɛ lela olambo lo dihole dia la dikoNdo ɔnɛ lalambola jambizambi yande elambo.
36 Diakɔ diele otema ami wayokuma akumu* l’ɔtɛ wa Mɔaba oko mpolo,*+Ndo otema ami wayokuma akumu* l’ɔtɛ w’ase Kirɛ-Hɛrɛsɛ oko mpolo.*
Nɛ dia ɔngɔnyi wakandakondja wayolana.
37 Nɛ dia ɔtɛ tshɛ wekɔ la diwandji,+Ndo ndɛdu tshɛ yambonyɛma.
Anya tshɛ mpota tsho,+Ndo akoto wekɔ lo nkende yawɔ!’”+
38 “‘Lo nsambe tshɛ ya MɔabaNdo lo ahole ayɔ tshɛ wa lo sɛkɛ,Ndooko ɛngɔ paka alelo.
Nɛ dia dimi lambolanya MɔabaOko mbaka kambowokasha,’ mbata Jehowa.
39 ‘Ande woho wambondoka wɔma lee! Nyolele!
Ande woho wambɛdiya Mɔaba ɔkɔngɔ la nsɔnyi lee!
Mɔaba aya ɛngɔ ka diɔnyɔ,Ɛngɔ kotsha anto tshɛ woodingi wɔma.’”
40 “Nɛ dia Jehowa kata ate:
‘Eenda, oko mpongo kaholɔ,+Nde ayosandjola ahafu ande laadiko dia Mɔaba.+
41 Tosombasomba tayɔsama,Ndo ahole atɔ w’eshamelo wayɔsama.
Lushi lɔsɔ, etema w’andɔshi wa ta wa MɔabaWayonga oko otema wa womoto latata lɔɔnɔ.’”
42 “‘Ndo Mɔaba ayolanyema diaha tɔ monga wodja nto,+Nɛ dia tɔ kamboyatombola lo ndɔshana la Jehowa.+
43 Wɔma, difuku ndo djonga wekɔ la ntondo kayɛ,Wɛ ɔnɛ ladjasɛ la Mɔaba,’ mbata Jehowa.
44 ‘Onto tshɛ lalawɔ wɔma ayotambɛ lo difuku,Ndo onto tshɛ latomba oma lo difuku ayondama lo djonga.’
‘Nɛ dia dimi layela Mɔaba ɔnɔnyi wa dilanya diawɔ,’ mbata Jehowa.
45 ‘Wanɛ watalawɔ wambemala lo dɛdi dia Hɛshibɔna, wambɔlɛmba.
Nɛ dia dja yayotomba oma la HɛshibɔnaNdo loombe oma l’etei ka Sihɔna.+
Yɔ yayotshumba mfumu ya MɔabaNdo lowako laki ana wa lofunguso.’+
46 ‘Mananu le yɛ, wɛ Mɔaba!
Aseka Kɛmɔshɛ+ wambolanyema.
Nɛ dia anayɛ w’apami wambɔsama mfumbe,Ndo anayɛ wa wamato wambɔtɔlama lo lɔhɔmbɔ.+
47 Koko dimi layosanganya ase Mɔaba wele mfumbe lo etena k’ekomelo ka nshi,’ mbata Jehowa.
‘Lanɛ mbakomɛ kilombo ka Mɔaba.’”+
Nɔtɛ ka l'ɛse ka dikatshi
^ Kana “oshimbedi ami wa wolo.”
^ Kana “anima.”
^ Kana “Okidi w’ebamubamu.”
^ Kana ondo “lo nkɛtɛ y’ofumbo.”
^ Tshɛk., “Loseke.”
^ Kana “wayosala lofunguso.”
^ Mbuta ate mpolo kadawɔ la ɔkɛyi lo otanda.
^ Kana “wayosala lofunguso.”
^ Mbuta ate mpolo kadawɔ la ɔkɛyi lo otanda.
