Jɛrɛmiya 49:1-39
49 Jehowa kata lo dikambo di’ase Amɔna+ ate:
“Onde Isariyɛlɛ bu la ana w’apami?
Onde nde bu la okitɔ?
Lande na kele Malakama+ ambɔsa Ngada?+
Ndo lande na kadjasɛ anto ande lo esomba w’Isariyɛlɛ?”
2 “‘Ɔnkɔnɛ nyohokame, nshi yekɔ lo ndjaye,’ mbata Jehowa,‘Yayomosala dia ombeka wa djembetelo ya ta* mbokɛma lo dikambo dia Raba+ k’ase Amɔna.+
Vɔ wayoyala tota dia elanyelo,Ndo tosombasomba tendɛ* le wɔ tayodjama dja.’
‘Ndo Isariyɛlɛ ayɔsa diangɔ dia wanɛ wakɔɔhɔtɔla,’+ mbata Jehowa.
3 ‘Wɛ Hɛshibɔna le, lela, nɛ dia Ai ambolanyema!
Nyu tosombasomba tendɛ oma le Raba le, nyode ekoko.
Nyɔlɔtɛ akoto.
Nyolele ndo nyetete l’atei wa nkoto y’ave,*Nɛ dia Malakama ayotshɔ lo lɔhɔmbɔ,Kaamɛ la ɛlɔmbɛdi ande ndo ewandji ande.+
4 Lande na kasɛmayɛ lo dikambo dia ekidi,*Lo dikambo dia nkɛtɛ yayɛ y’ɛtɛtɔ, wɛ ɔna womoto laha la kɔlamelo,Layaɛkɛ lo diangɔ diayɛ dia nɛmɔNdo lata ɔnɛ: “Onto akɔna ayoya ndjɔndɔsha?”’”
5 “‘Dimi layanga kela ɛngɔ kɛmɔtshi ka wɔma efula,’ mbata Nkum’Olongo Nkumadiɔndjɔ, Jehowa kanga lolembelembe,‘Oma le wanɛ tshɛ wokodingi.
Nyu nyayohandjɔma lo bɛkɛ tshɛ,Ndo ndooko onto layotshumanya wanɛ walawɔ.’”
6 “‘Koko l’ɔkɔngɔ wa laasɔ, dimi layotshumanya mfumbe y’ase Amɔna,’ mbata Jehowa.”
7 Jehowa kanga lolembelembe kata lo dikambo dia Ɛdɔmɛ ate:
“Onde lomba laya bu la Temana?+
Onde dako di’ɔlɔlɔ diamboshishɔ oma le akanga wa timba?
Onde lomba lawɔ lambɔhɔnda?
8 Nyolawɔ, nyokalole!
Nyotshu ndo nyotodjasɛ lo ɛhɔngɔ, nyu wanɛ wadjasɛ la Dedana!+
Nɛ dia dimi layela mpokoso le EsaoLam’ayokoka etena ka dimi mbodja yimba.
9 Naka amimbi w’elowa wamboya le yɛ,Onde vɔ hawototshika ɛmɔtshi dia ndjɔkɔdiakɔdia?
Naka wevi wamboya l’otsho,Vɔ wayowaela elanyelo paka oko walangawɔ.+
10 Koko dimi layotshika Esao otakataka.
Dimi layofola ahole ande tshɛ w’eshamelo,Diaha nde ndjashɛ.
Anande, anango ndo asukanyi ande, vɔ tshɛ wayolanyema,+Ndo nde hatoyala nto.+
11 Tshika anayɛ wa tshike,Ko dimi layowalama la lɔsɛnɔ,Ndo wadi ayɛ waki edo wayoyaɛkɛ le mi.”
12 Nɛ dia Jehowa kata ate: “Eenda, naka wanɛ waki kofundamɛ dia nnɔ dikɔhɔ pombaka dinɔ, onde wɛ pombaka ntshikala aha la nongola kaanga yema ya dilanya? Wɛ hotshikala aha la nongola dilanya, nɛ dia wɛ pombaka dinɔ.”+
13 “Nɛ dia dimi lakatshibe lo sɛkɛ,” mbata Jehowa, “dia Bozɛra ayoyala ɛngɔ ka wɔma, lɔtɛngɔ, elanyelo ndo mananu;+ ndo esomba awɔ tshɛ wayoyala elanyelo ka pondjo.”+
14 Dimi lamboka losango oma le Jehowa,Otomami ambotomama l’atei wa wedja dia mbuta ɔnɛ:
“Nyotshumane kaamɛ ndo nyowɔlɔsha;Nyoyalɔngɔsɔlɛ dikambo dia ta.”+
15 “Nɛ dia eenda, dimi lamboketɛ ɛngɔ k’anyanya l’atei wa wedja,Ɔmɔnywami l’atei w’anto.+
16 Lokomba lakayasale dia lɔ monga lakakokese,Otako w’otema ayɛ,Wɛ ladjasɛ lo weoko w’ave,Lodjashi lo kionakona yoleki la diko,
Kaanga mbasalayɛ kefu yayɛ la diko oko mpongo,Dimi layokoholoya oma lɛkɔ,” mbata Jehowa.
17 “Ndo Ɛdɔmɛ pombaka monga ɛngɔ ka wɔma.+ Ɔnɛ tshɛ layeta suke la nde ayondama la wɔma ndo ayoda kioko l’ɔtɛ wa paa yande tshɛ.
18 Paka oko lo ɔkwɛlɔ wa Sɔdɔma la Ngɔmɔra ndo tosombasomba tosukanyi la wɔ,”+ mbata Jehowa, “ndooko onto layodjasɛ lɛkɔ ndo ndooko onto layoka ngelo lɛkɔ.+
19 “Eenda, onto ɔmɔtshi ayoya dia ndjɔlɔsha ahole wa ndeshaka dongalonga wakokamɛ oko ntambwɛ+ k’oma lo tohoka ta weke tele l’omamu wa Jɔrdana, koko aha la ntshimbatshimba, dimi layowotshanya etale oma le nde. Ndo dimi layokitsha laadiko diande ɔnɛ lakasɔnama. Nɛ dia akɔna ele oko dimi, ndo akɔna akoka nsɛmanɛ la mi? Olami w’ɛkɔkɔ wakɔna wakoka memala la ntondo kami?+
20 Diakɔ diele nyohokame nyu anto, yɛdikɔ* yambɔsa Jehowa lo dikambo dia Ɛdɔmɛ ndo kɛnɛ kamondokanyiya lo dikambo dia anto wadjasɛ la Temana:+
Lo mɛtɛ, ana wa totshitshɛ wa dongalonga wayokotɔma.
Nde ayetɛ dihole diawɔ dia mbidjasɛ tɔngɔ to l’ɔtɛ awɔ.+
21 La wondjo wa ɔkwɛlɔ awɔ, nkɛtɛ yambodidima.
Ekoko wekɔ lo mbokɛma!
Wondjo wambokɛ polo lo Ndjale ka Beela.+
22 Eenda, nde ayodɛ ndo ayoholɔ oko mpongo,+Ndo nde ayosandjola ahafu ande laadiko dia Bozɛra.+
Lushi lɔsɔ, etema w’andɔshi wa ta wa ƐdɔmɛWayonga oko otema wa womoto latata lɔɔnɔ.”
23 Lo dikambo dia Damasɛkɛ:+
“Hamatɛ+ ndo Arapadɛ wamboshama nsɔnyi,Nɛ dia vɔ wamboka losango la kɔlɔ.
Vɔ wambɔkɔmɔ la wɔma.
Osukusuku wahakoke mbɔlanya wekɔ lo ndjale.
24 Damasɛkɛ amboshisha dihonga.
Nde ambokadimɔ dia ndawɔ, koko sase dia wɔma diambowonda.
Lɔkɔnyɔ ndo paa ambowonda,Oko womoto latata lɔɔnɔ.
25 Lande na kele osomba wa lotombo kokalema,Shombasomba y’ɔngɛnɔngɛnɔ?
26 Nɛ dia ɛlɔngɔ ande w’apami wayɔkɔ lo ahole ande wa lo sɛkɛ,Ndo lushi lakɔ, asɔlayi tshɛ wayovɔ,” mbata Jehowa kanga lolembelembe.
27 “Dimi layodja dja lo ehele ka Damasɛkɛ,Ndo yɔ yayotshumba totshoto ta Bɛnɛ-Hadada todingami la mpele.”+
28 Lo dikambo dia Kɛdara+ ndo waolelo wa Hazɔra, wele Nɛbukadinɛza* nkumekanga ka Babilɔna akaalɛndja, Jehowa kata ate:
“Nyemale, nyode otsha la Kɛdara,Ndo nyodiake ana w’apami wa lo Ɛstɛ.
29 Mvudu yawɔ y’apɛma ndo dongalonga diawɔ diayɔsama,Ahɔndɔ awɔ w’apɛma ndo diangɔ diawɔ tshɛ.
Kamɛlɔ yawɔ yayɔsama,Ndo vɔ wayowadɛ ekoko ɔnɛ: ‘Wɔma wekɔ lo ahole tshɛ!’”
30 “Nyolawɔ, nyotshu etale!
Nyotshu ndo nyotodjasɛ lo ɛhɔngɔ, nyu wanɛ wadjasɛ la Hazɔra,” mbata Jehowa.
“Nɛ dia Nɛbukadinɛza* nkumekanga ka Babilɔna ambokongɛ yoho mɔtshi ya nyɔlɔsha,Ndo nde akakanyiya sangwelo dimɔtshi lo dikambo dianyu.”
31 “Nyemale, nyotɔlɔsha wodja wele lo wɔladi,Wadjasɛ lo lotui tshitshi!” mbata Jehowa.
“Vɔ bu la nkuke kana la tokengete; vɔ mbidjasɛ mangana l’anto.
32 Kamɛlɔ yawɔ yayonga diangɔ dia dimbo,Ndo dongalonga diawɔ di’efula diangɔ dia dimbo.
Dimi layowahandjola lo lɔpɛpɛ* tshɛ,Wanɛ wanya avo awɔ lo mpakatoyi,+Ndo dimi layela mpokoso kawɔ oma lo bɛkɛ tshɛ,” mbata Jehowa.
33 “Ko Hazɔra ayoyala edjaselo ka waa mbolo,Elanyelo ka pondjo.
Ndooko onto layodjasɛ lɛkɔ,Ndo ndooko onto layoka ngelo lɛkɔ.”
34 Ɔnɛ ele ɔtɛkɛta wa Jehowa wakaye le omvutshi Jɛrɛmiya lo dikambo dia Elama+ lo etatelo k’ɛlɔmbwɛlɔ ka Zɛdɛkiya+ nkumekanga ka Juda:
35 “Jehowa kanga lolembelembe kata ate: ‘Dimi layanga mbɔkɔla ota wa Elama,+ kiɔkɔ* ya wolo awɔ.
36 Dimi layela lo Elama mpɛpɛ 4 oma lo tokoma 4 t’olongo, ndo dimi layowahandjola lo mpɛpɛ shɔ tshɛ. Ndooko wodja wahatotshɔ ase Elama wakadiangana.’”
37 “Dimi layɔtɛtshatɛtsha ase Elama la ntondo ka atunyi awɔ ndo la ntondo ka wanɛ wayanga dia mbɔsa nsɛnɔ yawɔ;* ndo dimi layela mpokoso le wɔ, nkɛlɛ kami kalombalomba,” mbata Jehowa. “Dimi layowatomɛ lokuwa la ta polo lam’ayomowashila oshiki.”
38 “Dimi layokitsha kiti kami ka lowandji la Elama+ ndo layolanya nkumekanga la ewandji wa lɛkɔ,” mbata Jehowa.
39 “Koko lo etena k’ekomelo ka nshi, dimi layotshumanya ase Elama wele mfumbe,” mbata Jehowa.
Nɔtɛ ka l'ɛse ka dikatshi
^ Kana ondo “wondjo wa kioko ya ta.”
^ Kana “tosukanyi la wɔ.”
^ Kana “nkoto y’ɛkɔkɔ.”
^ Kana “ekidi w’ebamubamu.”
^ Kana “dako.”
^ Tshɛk., “Nɛbukadrɛza,” yoho kina ya mfunda.
^ Tshɛk., “Nɛbukadrɛza,” yoho kina ya mfunda.
^ Kana “lo lɛkɛ tshɛ.”
^ Tshɛk., “etatelo.”
^ Kana “wayanga anima awɔ.”
