Jɛrɛmiya 51:1-64
51 Jehowa kata ate:
“Dimi layanga ntondja lɔpɛpɛ lalanyaDia ndɔsha Babilɔna+ ndo wanɛ wadjasɛ la Lɛbɛ-kamai.*
2 Dimi layotoma afufodi la Babilɔna,Ndo vɔ wayokifufola ndo wayetɛ wodja atɔ hwe;Vɔ wayokilɔsha lo bɛkɛ tshɛ lo lushi la mpokoso.+
3 Aha omboki w’ota minɛ* ota ande.
Ndo aha ndooko onto memala la dikɔti diande dia mposo mposo.
Tanyokake ɛlɔngɔ atɔ w’apami kɛtshi.+
Nyokimɔ asɔlayi atɔ tshɛ lo elanyelo.
4 Ndo edo awɔ wayɔkɔ lo wodja w’ase Kaladiya,Wotondɔtondɔmi lo toshinga tande.+
5 Nɛ dia Isariyɛlɛ ndo Juda, Nzambi kawɔ Jehowa kanga lolembelembe atawaetɛ wadi waki edo.+
Koko wodja awɔ* ndola tɔɔ la onongo lo washo wa l’Ekila la Isariyɛlɛ.
6 Nyolawɔ oma l’atei wa Babilɔna,Ndo nyotsha nsɛnɔ* yanyu.+
Tanyolanyemake l’ɔtɛ wa munga katɔ.
Nɛ dia ekɔ etena ka nsɔmbɔya ka Jehowa.
Nde ekɔ lo kifuta l’ɔtɛ wa kɛnɛ kakatasale.+
7 Babilɔna akayala dikɔhɔ dia paonyi lo anya wa Jehowa;Tɔ kakadjoya nkɛtɛ k’otondo.
La wanu atɔ, wedja wakadjɔ;+Diakɔ diele, wedja wakadjɔ aladi.+
8 Babilɔna kambɔkɔ la shashimoya ndo kambohembɔ.+
Nyokilele!+
Nyɔshi balasama l’ɔtɛ wa kandji katɔ; ondo tɔ mbeyaka nkɔnɔ.”
9 “Takahembe nkɔnɔla Babilɔna, koko tɔ kokoka nkɔnɔ.
Nyokitshike ndo nyɛsɔ totshu, onto l’onto lo wodja ande hita.+
Nɛ dia kilombo katɔ kambokoma lo olongo;Tɔ kekɔ la diko oko wange.+
10 Jehowa ambela losembwe le so.+
Nyoye, nyɛsɔ tosanya la Siɔna olimu wa Jehowa Nzambi kaso.”+
11 “Nyɔsɔngɔlɛ mpito;+ nyɔshi dingawo di’ebolonga.*
Jehowa ambɔsɛngiya timba ta nkumi ya dikanga y’ase Mediya,+Nɛ dia nde ekɔ lo nsangoya dia ndanya Babilɔna.
Nɛ dia ɔsɔ ekɔ nsɔmbɔya ka Jehowa, nsɔmbɔya dikambo dia tɛmpɛlɔ kande.
12 Nyonyiya djembetelo*+ dikambo dia mpele dia Babilɔna.
Olamelo waleke ndjala wolo, nyokitsha todjamu.
Nyɔlɔngɔsɔlɛ wanɛ wayoholama.
Nɛ dia Jehowa ambokongɛ yoho ya nsala akambo,Ndo nde ayokotsha kɛnɛ kakandalake lo dikambo dia wanɛ wadjasɛ la Babilɔna.”+
13 “Wɛ womoto ladjasɛ lo ashi w’efula,+Lele la diangɔ dia nɛmɔ di’efula,+Ekomelo kayɛ kamboya, olelo* wa wahɔ wakondjayɛ.+
14 Jehowa kanga lolembelembe ambotshiba lo lokombo lande ndamɛ* ate:‘Dimi layokolodia la anto efula oko akata w’ɛndjɔ,Ndo vɔ wayokodɛ ekoko wa edjelo k’otshumba.’+
15 Nde kele Otungi wa nkɛtɛ oma lo wolo ande,Ɔnɛ lakashikikɛ nkɛtɛ y’ɛtɛtɔ oma lo lomba lande+Ndo lakananula olongo oma lo yimba yande.+
16 Etena kokiyande dui diande,Ashi wa l’olongo mongaka lo lofunguso,Ndo nde salaka dia wange* mbidɛ oma lo tokoma ta nkɛtɛ.
Nde salaka angadimu dikambo dia* mvula,Nde mbelaka lɔpɛpɛ oma lo mvudu yande ya eombelo.+
17 Onto tshɛ salaka akambo aha la nkanyiya ndo aha la ewo.
Otshudi wa mbolo tshɛ ayoshama nsɔnyi l’ɔtɛ wa ekishi;+Nɛ dia ekishi kande ka lowolo kekɔ kashi,Ndo tɔ bu la lomu.*+
18 Diɔ diekɔ lokeso,*+ olimu wa lɔsɔkɔ.
Etena kayokoka lushi la kilombo kadiɔ, diɔ diayolanyema.
19 Yema yaki Jakɔbɔ bu oko diangɔ sɔ,Nɛ dia nde kele Ɔnɛ lakakenge ɛngɔ tshɛ,Kaanga danga dia okitɔ ande.+
Jehowa kanga lolembelembe kele lokombo lande.”+
20 “Wɛ ekɔ hiembe ya ta le mi, ehomɔ ka ta,Nɛ dia la yɛ, dimi layɔtɛtshatɛtsha wedja.
La yɛ, dimi layolanya waolelo.
21 La yɛ, dimi layɔtɛtshatɛtsha mfalasa la ombahemi atɔ.
La yɛ, dimi layɔtɛtshatɛtsha pusupusu ka ta la ombahemi atɔ.
22 La yɛ, dimi layɔtɛtshatɛtsha pami la womoto.
La yɛ, dimi layɔtɛtshatɛtsha osombe la dikɛnda.
La yɛ, dimi layɔtɛtshatɛtsha ɔlɔngɔ a pami ndo osekaseka wa womoto.
23 La yɛ, dimi layɔtɛtshatɛtsha olami w’ɛkɔkɔ la ɛkɔkɔ ande.
La yɛ, dimi layɔtɛtshatɛtsha onongi wa dongalonga la olui ande wa nyama.
La yɛ, dimi layɔtɛtshatɛtsha nguvɛrnɛrɛ la topita tolɛ.
24 Ndo dimi layofuta Babilɔna la wanɛ tshɛ wadjasɛ la KaladiyaL’ɔtɛ wa kɔlɔ tshɛ kakawasale la Siɔna lo washo ayɛ,”+ mbata Jehowa.
25 “Dimi layanga kɔlɔsha,+ wɛ dikona di’elanyelo,” mbata Jehowa,“Wɛ ɔnɛ lalanya nkɛtɛ k’otondo.+
Dimi layosembola lonya lami dia kɔlɔsha ndo kongitola oma lo weoko w’aveNdo ketɛ dikona diambotshumbama.”
26 “Anto hawotɔsa oma le yɛ dive dia tshuku kana dive di’etshina,Nɛ dia wɛ ayoyala tɔngɔ to pondjo pondjo,”+ mbata Jehowa.
27 “Nyonyiya djembetelo* lo wodja.+
Nyode wɔɔndjɔ l’atei wa wedja.
Nyɔsɔnɛ* wedja dia mbɔlɔsha.
Nyele diolelo dia Ararata,+ Mini ndo Ashɛkɛnazɛ+ dia ndjowɔlɔsha.
Nyosha owandji ɔmɔtshi ɔkɛndɛ wa nsɔna anto dia mbɔlɔsha.
Nyosale dia mfalasa ndja oko akata w’ɛndjɔ wahangahanga.
28 Nyɔsɔnɛ* wedja dia mbɔlɔsha,Nkumi ya dikanga ya Mediya,+ nguvɛrnɛrɛ yatɔ ndo topita tatɔ tshɛ tolɛNdo wedja tshɛ wolɛyɔ.
29 Nkɛtɛ yayosukasuka ndo yayodidima,Nɛ dia tokanyi ta Jehowa tendana la Babilɔna tayokotshamaDia mbetɛ wodja wa Babilɔna ɛngɔ ka wɔma, aha la onto ladjasɛ lɛkɔ.+
30 Andɔshi wa ta wa Babilɔna wambotshika ndɔ ta.
Vɔ wambodjasɛ lo ahole awɔ w’eshamelo.
Wolo awɔ wamboshila.+
Vɔ waya oko wamato.+
Ngelo yatɔ yambodjama dja.
Tokengete tatɔ tambohembɔma.+
31 Ondawi ɔmɔtshi ambolawɔ dia tohomana la ondawi okina,Ndo dikɛndji dimɔtshi dia tohomana la dikɛndji dikina,Dia totɛ nkumekanga ka Babilɔna ɔnɛ osomba ande wambɔsama lo bɛkɛ tshɛ,+
32 Ɔnɛ ateho wambɔsama,+Ɔnɛ masuwa wa papirusɛ wambotshumbama la dja,Ndo ɔnɛ asɔlayi wamboka wɔma.”
33 Nɛ dia Jehowa kanga lolembelembe, Nzambi k’Isariyɛlɛ kata ate:
“Ɔna womoto la Babilɔna ekɔ oko dihole di’esuswelo.
Etena ka mbɔhɔtshahɔtsha wolo kambokoka.
Keema edja, etena ka dinela kayokoka lo dikambo diande.”
34 “Nɛbukadinɛza* nkumekanga ka Babilɔna ambɔntɔnyatɔnya;+Nde ambombidja lo okandokando.
Nde ambonkitsha oko ɛngɔ ka hwe.
Nde ambɔmɛna oko watɔmɛnaka oloyi wa woke ɛngɔ;+Nde ambolodia dikundju diande la diangɔ diami di’amɛna.
Nde ambonsola dia mbitshanyami.
35 ‘Awui wa ngala wansalɛwɔ ndo wasalɛwɔ demba diami wasaleme le Babilɔna!’ mbata ɔnɛ ladjasɛ la Siɔna.+
‘Ndo dikila diami diayale le wanɛ wadjasɛ la Kaladiya!’ mbata Jɛrusalɛma.”
36 Ɔnkɔnɛ Jehowa kata ate:
“Dimi layanga kɔtɛkɛtɛ lo kilombo kayɛ,+Ndo dimi layɔsɔmbɔya lo dihole diayɛ.+
Dimi layoonya ndjale kande ndo layoonya tɛkɔ diande.+
37 Ndo Babilɔna ayoyala tota dia ave,+Edjaselo ka waa mbolo,+Ɛngɔ ka wɔnɔnyi ndo ka mbidɛ ekoko,Aha la onto ladjasɛ lɛkɔ.+
38 Vɔ tshɛ wayodikita kaamɛ oko ɛsɔngɔ wa ntambwɛ.*
Vɔ wayohangɔ oko ana wa ntambwɛ.”
39 “Etena kayowɔhɛtahɛta, dimi layowasalɛ dambo ndo layowadjoya,Dia vɔ ngɛnangɛna;+Oma laasɔ, vɔ wayolala djɔ ya pondjo,Djɔ yahawatemɔ,”+ mbata Jehowa.
40 “Dimi layowaholoya oko ɛsɔngɔ w’ɛkɔkɔ otsha lo ediakelo,Oko waomi w’ɛkɔkɔ kaamɛ la weombe wa mbudi.”
41 “Ande woho wambɔsama Sheshakɛ,*+Ande woho wambɔsama lotombo la nkɛtɛ k’otondo lee!+
Ande woho wamboyala Babilɔna ɛngɔ ka wɔnɔnyi l’atei wa wedja lee!
42 Ndjale kambodɛ laadiko dia Babilɔna.
Tɔ kambofamɛ la efula k’asuku atɔ.
43 Esomba atɔ wamboyala ɛngɔ ka wɔma, nkɛtɛ y’ofumbo ndo ya shɛnga.
Wodja wele ndooko onto layodjasɛ lɛkɔ ndo wele ndooko onto layeta lɛkɔ.+
44 Dimi layodja Bɛlɛ+ yimba lo Babilɔna,Ndo layotondja oma lo onyɔ ande kɛnɛ kakandamɛnɛ.+
Wedja hawotɔkɛlaka le nde nto,Ndo ehele ka Babilɔna kayonyukɔ.+
45 Nyu anto ami, nyotombe oma l’atei atɔ!+
Nyotsha nsɛnɔ*+ yanyu oma lo nkɛlɛ kalombalomba ka Jehowa!+
46 Tanyatɛke asolo kana mboka wɔma l’ɔtɛ wa losango layokɛma lo wodja.
Lo ɔnɔnyi ɔmɔtshi, losango layoya,Ndo ɔnɔnyi wayelana, losango lokina layoya,Lendana la awui wa ngala lo wodja ndo la omboledi walɔshana la omboledi.
47 Ɔnkɔnɛ nyende, nshi yekɔ lo ndjayeYayomendana la dikishi dia Babilɔna.
Wodja atɔ w’otondo wayoshama nsɔnyi,Ndo anto atɔ tshɛ wayodiakema wayɔkɔ l’atei atɔ.+
48 Olongo la nkɛtɛ ndo ɛngɔ tshɛ kele lɔkɔKayodɛ Babilɔna ekoko w’ɔngɛnɔngɛnɔ,+Nɛ dia andanyishi wayoya le tɔ oma lo nɔrdɛ,”+ mbata Jehowa.
49 “Babilɔna kosala tsho dia edo w’Isariyɛlɛ nkɔ+Koko ndo nto, la Babilɔna mbakakɔ edo wa lo nkɛtɛ k’otondo.
50 Nyu wanɛ wakahandɔ lo lokuwa la ta, nyotetemale ntshɔ, tanyemalake!+
Nyohɔ Jehowa oma lo etale,Ndo Jɛrusalɛma onge lo etema anyu.”+
51 “Sho tamboshama nsɔnyi, nɛ dia tamboka ntɛngɔ.
Nsɔnyi kambokomba dungi diaso,Nɛ dia angɛndangɛnda* wamboya dia ndjɔlɔsha ahole w’ekila wa luudu la Jehowa.”+
52 “Ɔnkɔnɛ nyolonge, nshi yekɔ lo ndjaye,” mbata Jehowa,“Yayomendana la dikishi diande,Ndo lo wodja ande w’otondo, ɔnɛ layohomɔ mpota ayokuma akumu.”+
53 “Kaanga naka Babilɔna kodɛka otsha l’olongo,+Kaanga naka tɔ kodingaka ahole atɔ wa woshamu la mpele di’etale,Andanyishi atɔ wayoya oma le mi,”+ mbata Jehowa.
54 “Nyolonge, ekoko wekɔ lo mbokɛma oma la Babilɔna,+Londjo la mpokoso ka woke oma lo wodja w’ase Kaladiya,+
55 Nɛ dia Jehowa olanya Babilɔna,Nde ayɔladia dui diatɔ dia woke,Ndo asuku awɔ wayodikita oko ashi w’efula.
Wondjo wa dui diawɔ wayokɛma.
56 Nɛ dia ondanyishi ayoya le Babilɔna;+Andɔshi atɔ wa ta wayondama,+Eta atɔ wayohembɔma,Nɛ dia Jehowa ekɔ Nzambi kasha difuto.+
Nde mɛtɛ ayofuta.+
57 Dimi layodjoya ewandji atɔ ndo anto atɔ wa tomba,+Nguvɛrnɛrɛ yatɔ, topita tatɔ tolɛ ndo andɔshi atɔ wa ta,Ndo vɔ wayolala djɔ ya pondjo,Yahawatemɔ,”+ mbata Nkumekanga, kele lokombo lande Jehowa kanga lolembelembe.
58 Jehowa kanga lolembelembe kata ate:
“Kaanga mbele ehele ka Babilɔna woke, tɔ kayonyukɔma tshɛ lo tshɛ,+Ndo kaanga mbele asoko atɔ atanga, vɔ wayodjama dja.
Anto wayokamba olimu okambakamba;Wedja wayoyalɛndja vɔamɛ paka dia ndesha dja.”+
59 Ɛtɛkɛta ɛsɔ mbakadjangɛ omvutshi Jɛrɛmiya Seraya ɔna Neriya+ ɔna Mahaseya etena kakandatshu la Zɛdɛkiya nkumekanga ka Juda la Babilɔna lo ɔnɔnyi wa 4 w’ɛlɔmbwɛlɔ kande; Seraya mbaki ɔnɔmbɔdi wa diangɔ dia nkumekanga.
60 Jɛrɛmiya akafunde lo dibuku dimɔtshi mpokoso tshɛ kakahombe nkomɛ Babilɔna, awui tshɛ wakafundama lo dikambo dia Babilɔna.
61 Laadiko dia laasɔ, Jɛrɛmiya akatɛ Seraya ate: “Etena kayoyoya la Babilɔna ndo kayoyokiɛna, wɛ pombaka mbadia ɛtɛkɛta ɛsɔ tshɛ la dui dia wolo.
62 Ko wɛ mbuta wate: ‘Jehowa le, wɛ akate lo dikambo dia dihole nɛ ɔnɛ diɔ diayolanyema ndo diayotshikala aha la onto ladjasɛ lɔkɔ, onto kana nyama, ndo ɔnɛ diɔ diayonga tɔngɔ to pondjo pondjo.’+
63 Ndo etena kayoyoshidiya mbadia dibuku nɛ, kodikeleke la dive ko wɛ dikasha l’atei wa Efaratɛ.
64 Oma laasɔ ko wɛ mbuta ɔnɛ: ‘Nganɛ mbayodinda Babilɔna ndo tɔ honɛɛki nto+ l’ɔtɛ wa mpokoso kayangami mbela le tɔ; ko vɔ wayɔlɛmba.’”+
Lanɛ mbakomɛ ɛtɛkɛta wa Jɛrɛmiya.
Nɔtɛ ka l'ɛse ka dikatshi
^ Mɛnamaka dia ɔnɛ ekɔ lokombo la Kaladiya la woshamu.
^ Tshɛk., “kotɛ.”
^ Mbuta ate wodja w’ase Kaladiya.
^ Kana “anima.”
^ Kana ondo “nyolodia mpata.”
^ Kana “ekundji ka djembetelo.”
^ Tshɛk., “yɛdikɔ.”
^ Kana “le anima ande.”
^ Kana “edinga.”
^ Kana ondo “ahole wa mbɛtɔya ashi.”
^ Kana “lɔhɛngɔ.”
^ Kana “anyanya.”
^ Kana “ekundji ka djembetelo.”
^ Tshɛk., “Kidia.”
^ Tshɛk., “Kidia.”
^ Tshɛk., “Nɛbukadrɛza,” yoho kina ya mfunda.
^ Kana “ɛsɔngɔ wa ntambwɛ wele l’alɛfulɛfu.”
^ Mɛnamaka dia ɔnɛ ekɔ lokombo la Babɛlɛ (Babilɔna) lo woshɛshɛ.
^ Kana “anima.”
^ Kana “ase wedja.”
