Jɛrɛmiya 52:1-34
52 Zɛdɛkiya+ aki l’ɛnɔnyi 21 lam’akandayala nkumekanga ndo nde akolɛ l’edja k’ɛnɔnyi 11 la Jɛrusalɛma. Nyango lokombo lande Hamutala+ ɔna Jɛrɛmiya ose Libina.
2 Nde akatetemala nsala kɛnɛ kaki kɔlɔ lo washo wa Jehowa lo ndjela kɛnɛ tshɛ kakasale Jɛhɔyakima.+
3 Awui asɔ wakasalema la Jɛrusalɛma ndo la Juda l’ɔtɛ wa nkɛlɛ ka Jehowa polo nde mbanya lo washo ande.+ Ko Zɛdɛkiya akatɔmbɔkwɛ nkumekanga ka Babilɔna.+
4 Lo ɔnɔnyi wa 9 w’ɛlɔmbwɛlɔ ka Zɛdɛkiya, lo ngɔndɔ ka 10 nshi 10, Nɛbukadinɛza* nkumekanga ka Babilɔna akaye l’asɔlayi ande tshɛ dia ndjɔlɔsha Jɛrusalɛma. Vɔ wakake mpango dia ndjilɔsha ndo wakayidinge la lokombo l’otshimbedi ayɔ tshɛ.+
5 Ko osomba akɔ wakadingama polo l’ɔnɔnyi wa 11 w’ɛlɔmbwɛlɔ ka nkumekanga Zɛdɛkiya.
6 Lo ngɔndɔ ka 4 nshi 9,+ ndjala ka kasha kakayala l’osomba, ko anto wa lo wodja komonga ndooko la ɛngɔ ka ndɛ.+
7 L’ekomelo, ehele k’osomba kakatondɔma, ko asɔlayi tshɛ wakalawɔ l’otsho oma lo soko diaki lam’asa mpele 2 suke la ekambɔ ka nkumekanga etena kakadinge ase Kaladiya osomba; ndo vɔ wakatetemala lo mboka k’otsha lo Araba.+
8 Koko asɔlayi w’ase Kaladiya wakatshanya nkumekanga ko wakatonda Zɛdɛkiya+ lo laandja l’oswe wa Jeriko, ko asɔlayi ande tshɛ wakoohandjɔ.
9 Ko vɔ wakande nkumekanga ndo wakɔɔtɔlɛ otsha la Ribila le nkumekanga ka Babilɔna lo wodja wa Hamata, ko nde akatoolombosha lɛkɔ.
10 Nkumekanga ka Babilɔna akadiake ana waki Zɛdɛkiya lo washo ande, ndo nde akadiake ewandji tshɛ wa Juda lɛkɔ la Ribila.
11 Oma laasɔ, nkumekanga ka Babilɔna akoole Zɛdɛkiya washo,+ akookeleka mɔlɔla wa nkonga, akɔɔtɔlɛ la Babilɔna ndo akoolame lo lokanu polo lushi lakandavu.
12 Lo ngɔndɔ ka 5 nshi 10, mbuta ate l’ɔnɔnyi wa 19 w’ɛlɔmbwɛlɔ ka Nɛbukadinɛza* nkumekanga ka Babilɔna, Nɛbuzaradana owandji w’alami ɔnɛ laki okambi wa nkumekanga ka Babilɔna akaye la Jɛrusalɛma.+
13 Nde akatshumbe luudu la Jehowa,+ luudu* la nkumekanga ndo mvudu tshɛ ya la Jɛrusalɛma; ndo nto, nde akatshumbe mvudu ya weke tshɛ.
14 Ndo asɔlayi tshɛ w’ase Kaladiya waki kaamɛ l’owandji w’alami+ wakanyukola mpele diakadinge Jɛrusalɛma.
15 Nɛbuzaradana owandji w’alami akatɔlɛ lo lɔhɔmbɔ anto k’anto amɔtshi ndo anto akina wakatshikala l’osomba. Nde akatɔlɛ ndo wanɛ wakalawɔ wakete lo wedi wa nkumekanga ka Babilɔna ndo etshudi wa tomanamana wakatshikala.+
16 Koko Nɛbuzaradana owandji w’alami akatshike anto amɔtshi woleki wola lo wodja dia vɔ kambaka dikambɔ dia vinyɔ ndo dia mbakandjaka elimu la wolo.+
17 Ase Kaladiya wakahendjahendja dikundji dia nkonga+ dia lo luudu la Jehowa ndo pusupusu+ la Oduwa wa nkonga+ waki lo luudu la Jehowa, ko vɔ wakɛmbɛ nkonga yakɔ otsha la Babilɔna.+
18 Vɔ wakɔshi ndo nkenga ya mbidjaka otoko, mpawo, diangɔ dia nyimaka dja, alɔnga w’afuku,+ akɔhɔ+ ndo diangɔ tshɛ dia nkonga diakawakambaka la diɔ l’olimu wa lo tɛmpɛlɔ.
19 Owandji w’alami akɔshi alɔnga wa weke,+ diangɔ dia mɛmbaka dja, alɔnga w’afuku, nkenga ya mbidjaka otoko, dikundji dia atala,+ akɔhɔ ndo alɔnga w’afuku wakasalema la paonyi ka dimɛna ndo la mfɛsa.+
20 Lo kɛnɛ kendana la dikundji 2, Oduwa, ngɔmbɛ ya nkonga 12+ yaki l’ɛse ka Oduwa ndo pusupusu yakasale nkumekanga Sɔlɔmɔna dikambo dia luudu la Jehowa, wotsho wa nkonga yaki lo diangɔ sɔ tshɛ kokoka mbɛdikama.
21 Lo kɛnɛ kendana la dikundji, ekundji tshɛ kaki la tanga dia kubita* 18, ɔkɔdi wa yɛdikɔ wa kubita 12 wakakokaka kidinga;+ nkeka katɔ kaki woke wa mpita 4 ya lo lonya* ndo kaki hwe l’atei.
22 Ndo ɔtɛ waki lɔkɔ wakasalema la nkonga; ndo ɔtɛ 1 waki la tanga dia kubita 5;+ ndo ɔtɛyi la pɔmɛgranatɛ yaki l’otshimbedi w’otondo w’ɔtɛ akɔ wakasalema la nkonga. Ekundji ka 2 kaki oko tɔ, ndo pɔmɛgranatɛ.
23 Pɔmɛgranatɛ 96 yaki l’emamu; tshɛ tshɛ aki pɔmɛgranatɛ 100 lo otshimbedi wa ɔtɛyi.+
24 Ndo nto, owandji w’alami akɔshi Seraya+ owandji w’ɛlɔmbɛdi, Zɛfaniya+ ɔlɔmbɛdi wa lo dihole dia 2 ndo alami 3 w’asoko.+
25 Ndo nde akɔshi ɔnɛnɛ ɔmɔtshi waki la ɔkɛndɛ w’asɔlayi, angɛnyi 7 wa suke suke waki nkumekanga wakatanema l’osomba, kaamɛ ndo ofundji wa owandji w’asɔlayi, ɔnɛ lakasanganyaka anto wa lo wodja, ndo apami 60 wakɔsama oma l’atei w’anto k’anto wa lo wodja, wanɛ waki weke lo osomba.
26 Nɛbuzaradana owandji w’alami akawaɔshi, ko akaatɔlɛ otsha la Ribila le nkumekanga ka Babilɔna.
27 Nkumekanga ka Babilɔna akaakɔmɔla ko akaadiake la Ribila+ lo ɛtshi ka nkɛtɛ ka Hamatɛ. Ngasɔ mbakatɔlama Juda lo lɔhɔmbɔ oma lo wodja awɔ.+
28 Nɛbukadinɛza* akatɔlɛ anto anɛ lo lɔhɔmbɔ: Lo ɔnɔnyi wa 7, ase Juda nunu sato la akumi ahende la asato (3 023).+
29 Lo ɔnɔnyi wa 18 w’ɛlɔmbwɛlɔ ka Nɛbukadinɛza,* anto*+ 832 wakɔsama oma la Jɛrusalɛma.
30 Lo ɔnɔnyi wa 23 w’ɛlɔmbwɛlɔ ka Nɛbukadinɛza,* Nɛbuzaradana owandji w’alami akatɔlɛ ase Juda lo lɔhɔmbɔ, anto* 745.+
Tshɛ tshɛ, anto* nunu nɛi la nkama shamalo (4 600) wakatɔlama lo lɔhɔmbɔ.
31 Oma laasɔ, lo ɔnɔnyi wa 37 waki Jɛhɔyakina+ nkumekanga ka Juda lo lɔhɔmbɔ, lo ngɔndɔ ka 12 nshi 25, Evilɛ-Mɛrɔdaka nkumekanga ka Babilɔna akatshungola* Jɛhɔyakina nkumekanga ka Juda ndo akootondja oma lo lokanu+ lo ɔnɔnyi wakandayala nkumekanga.
32 Nde akasawola la nde dimɛna ndo akakitsha kiti kande ka lowandji la diko oleki kiti ya lowandji ya nkumi ya dikanga nkina yaki kaamɛ la nde la Babilɔna.
33 Ko Jɛhɔyakina akakolola ahɔndɔ ande wa lokanu ndo nde akalɛka mbala la mbala la ntondo kande lo nshi tshɛ ya lɔsɛnɔ lande.
34 Nkumekanga ka Babilɔna akawoshaka mbo ya ndɛ mbala la mbala, lushi la lushi, polo lushi lakandavu, nshi tshɛ ya lɔsɛnɔ lande.
Nɔtɛ ka l'ɛse ka dikatshi
^ Tshɛk., “Nɛbukadrɛza,” yoho kina ya mfunda.
^ Tshɛk., “Nɛbukadrɛza,” yoho kina ya mfunda.
^ Kana “luudu l’owandji.”
^ Tshɛk., “Nɛbukadrɛza,” yoho kina ya mfunda.
^ Tshɛk., “Nɛbukadrɛza,” yoho kina ya mfunda.
^ Kana “anima.”
^ Tshɛk., “Nɛbukadrɛza,” yoho kina ya mfunda.
^ Kana “anima.”
^ Kana “anima.”
^ Tshɛk., “akonyiya ɔtɛ wa.”
