Jɛrɛmiya 6:1-30
6 Ana wa Bɛnjamina le, nyomɔ oma la Jɛrusalɛma dia ndjakokɛ.
Nyode wɔɔndjɔ+ la Tekoa;+Nyɔhɛtsha dja ya djembetelo la Bɛtɛ-Hakɛrɛma!
Nɛ dia mpokoso kekɔ lo ndjaye oma lo nɔrdɛ, elanyelo ka woke.+
2 Ɔna womoto la Siɔna fɔnaka la womoto l’olangala ndo la kɔmba.+
3 Alami w’ɛkɔkɔ la dongalonga diawɔ wayoya.
Vɔ wayohika mvudu yawɔ y’apɛma l’omamu ayɔ,+Onto l’onto ayoleshaka dongalonga dialamande.+
4 “Nyoyalɔngɔsɔlɛ* dia mbɔlɔsha!
Nyonee, nyɛsɔ tɔɔlɔsha la midi!”
“Mananu le so, nɛ dia wonya wotɔtɔ,Nɛ dia alɛdi wa dikɔlɔ waya etale!”
5 “Nyonee, nyɛsɔ tɔlɔsha l’otshoNdo tonyukole totshoto tayɔ todingami la mpele.”+
6 Nɛ dia Jehowa kanga lolembelembe kata ate:
“Nyɔkɔtɛ esongo ndo nyodinge lokombo dia ndɔsha Jɛrusalɛma.+
Yɔ yekɔ osomba wahomba mbikoya la wɔ;Ndooko ɛngɔ kele lɔkɔ paka asui.+
7 Oko watolamaka difuku ashi adiɔ tshitshi,*Mbalamawɔ kɔlɔ yawɔ dimɛna.
Awui wa ngala ndo elanyelo mbokɛmaka lɔkɔ;+Hemɔ ndo mpota tanemaka la ntondo kami wonya tshɛ.
8 Jɛrusalɛma le, etawɔ ɔhɛmwɛlɔ diaha dimi* ndjokooka ɔkɔngɔ la lohetsho;+Dimi layoketɛ tɔngɔ to, wodja wahadjasɛ anto lɔkɔ.”+
9 Jehowa kanga lolembelembe kata ate:
“Vɔ wayɔkɔdiakɔdia atshikadi w’Isariyɛlɛ oko elowa w’ekomelo wa lo ɔkɔdi wa vinyɔ.
Etsha lonya layɛ nto oko onto latshumanya elowa oma lo ɛkɔdi wa vinyɔ.”
10 “Akɔna ahombami mbutɛ ndo mpɛmɔla?
Akɔna ayohokamɛ?
Eenda, atoyi awɔ wekɔ ku* woho wele vɔ hawoyokoka mbidja yimba.+
Eenda, ɔtɛkɛta wa Jehowa waya ɛngɔ ka diɔnyɔ le wɔ;+Vɔ hawowɔngɛnangɛna.
11 Ɔnkɔnɛ, dimi lambolola tɔɔ la odudu wa Jehowa,Ndo dimi lambɔlɛmba dia mbolama.”+
“Hongolawɔ le ɔna dikɛnda lo shinga,+Le elui w’ɛlɔngɔ w’apami wotshumanyi kaamɛ.
Vɔ tshɛ wayondama, pami kaamɛ la wadɛnde,Epalanga kaamɛ la esombe wa lokosombe.*+
12 Wayosha anto akina mvudu yawɔ,Kaamɛ la dikambɔ diawɔ ndo wadiɛwɔ.+
Nɛ dia dimi layosembola lonya lami dia ndɔsha wanɛ wadjasɛ lo wodja,” mbata Jehowa.
13 “Nɛ dia ntatɛ oma le ɔnɛ loleki tshitshɛ polo le ɔnɛ loleki woke, onto l’onto ekɔ lo nkondja diangɔ lo okadi;+Ntatɛ oma le omvutshi polo le ɔlɔmbɛdi, onto l’onto ekɔ lo nkesa.+
14 Ndo vɔ pembaka nkɔnɔla ɔkwɛlɔ* w’anto ami yema* lo mbuta ɔnɛ:‘Wɔladi wekɔ! Wɔladi wekɔ!’
Etena kele ndooko wɔladi.+
15 Onde vɔ wekɔ lo mboka nsɔnyi l’ɔtɛ w’akambo wa wɔnɔnyi wambowosala?
Vɔ hawoke ndooko nsɔnyi!+
Vɔ haweye kaanga mboka nsɔnyi!
Ɔnkɔnɛ, vɔ wayɔkɔ l’atei wa wanɛ wakɔ.
Etena kayomowaela dilanya vɔ wayotakana,” mbata Jehowa.
16 Jehowa kata ate:
“Nyemale lo asanga wa mboka kele nyende.
Nyombole lo dikambo dia mboka y’edjedja,Nyombole lɛnɛ ele mboka k’ɔlɔlɔ kele nyɔkɛndɛkɛndɛ lɔkɔ,+Ko nyayoyakondjiyɛ* momuya.”
Koko vɔ mbutaka ɔnɛ: “Hatotɔkɛndakɛnda lɔkɔ.”+
17 “Ndo dimi lakasɔnɛ todjamu+ takate ɔnɛ:‘Nyodje yimba lo wondjo wa wɔɔndjɔ!’”+
Koko vɔ wakate vate: “Hatotodja yimba.”+
18 “Ɔnkɔnɛ nyu wedja, nyohokame!
Ndo nyu olui w’anto, nyeyeKɛnɛ kayowakomɛ.
19 Nkɛtɛ le, hokamɛ!
Dimi layanga mbela mpokoso le anto anɛ,+Oko elowa w’oma lo dikongelo diawɔ hita,Nɛ dia vɔ kombidja yimba lo ɛtɛkɛta amiNdo vɔ wakatone ɛlɛmbɛ ami.”*
20 “Wahɔ akɔna wele la mi naka wɛ mbela tshɔ ya wɛma oma la ShɛbaNdo kanɛ* y’amɛna oma lo wodja w’etale?
Elambo ayɛ w’etondo wa lotshumba,Ndo weshasha ayɛ hawɔngɛnyangɛnya.”+
21 Ɔnkɔnɛ, Jehowa kata ate:
“Dimi layanga kitshiyɛ anto anɛ etamba wa ntakanya,Ko vɔ wayotakana lɔkɔ,Ambutshi w’apami kaamɛ la ana w’apami,Osukanyi la osekande,Ndo vɔ tshɛ wayolanyema.”+
22 Jehowa kata ate:
“Eenda, anto amɔtshi wekɔ lo ndjaye oma lo wodja wa lo nɔrdɛ,Ndo wodja wa woke wayonɛ oma lo ahole wa tale wa la nkɛtɛ.+
23 Vɔ wayokimɛ ota la dikɔnga.
Vɔ wekɔ akanga w’esehe ndo hawotonga la kɛtshi.
Dui diawɔ diayodikita oko ndjale,Ndo vɔ mbahema lo mfalasa.+
Ɔna womoto la Siɔna le, vɔ wambɔlɔngama lo ta oko ɔndɔshi wa ta dia kɔlɔsha.”
24 Sho tamboka lokumu la dikambo sɔ.
Anya aso wambɔlɛmba;+Lɔkɔnyɔ lambotonda,Paa* kele oko ka womoto latata lɔɔnɔ.+
25 Tanyotombake otsha lo ekambɔ,Ndo tanyɔkɛndakɛndake lo otadimbo,Nɛ dia otunyi ekɔ la lokuwa la ta;Wɔma wekɔ lo ahole tshɛ.
26 Ɔna womoto la wodja ami le,Lɔta dikoto+ ndo ngitɔ lo otoko.
Lela oko onto lalela ɔna ɛtɔi, la delo di’ɔkɛyi,+Nɛ dia ondanyishi ayoya le so la shashimoya.+
27 “Dimi lakaketɛ* opembi wa mbolo l’atei wa wodja ami,Ɔnɛ lasala eyangelo dimɛna dimɛna;Wɛ pombaka mbeya ndo nsɛdingola mboka yawɔ.
28 Vɔ tshɛ wekɔ anto woleki ɛtɛ wolo,+Vɔ mbetetaka oko amamanyishi.+
Vɔ wekɔ oko nkonga ndo lowolo.Vɔ tshɛ salaka kɔlɔ.
29 Diangɔ diatowola dja diambotshumbama.
Lowolo lambotomba oma lo dja yawɔ.
Wɛdiɛdia mbatetemalawɔ mbɛdia la wolo;+Ndo nyɛ yele kɔlɔ kokakitɔma.+
30 Ko anto wayowaelɛ ɔnɛ mfɛsa yakakashema,Nɛ dia Jehowa akawakasha.”+
Nɔtɛ ka l'ɛse ka dikatshi
^ Tshɛk., “Nyoyakidia.”
^ Kana “dimɛna.”
^ Kana “anima ami.”
^ Tshɛk., “Toyi diawɔ kominyɛma mpota.”
^ Tshɛk., “wanɛ waya la nshi efula.”
^ Kana “laahahɛ.”
^ Kana “wɔkwɛlɔ.”
^ Kana “Dia anima anyu.”
^ Kana “wetshelo.”
^ Woho ɔmɔtshi wa sɔpɔ dia enyi.
^ Tshɛk. “Kandji ya diwutshi.”
^ Mbuta ate, Jɛrɛmiya.
