Jɛrɛmiya 8:1-22
8 Jehowa kata ate: “L’etena kɛsɔ, weka wa nkumi ya dikanga ya Juda, weka w’ewandji ayɔ, weka w’ɛlɔmbɛdi, weka w’amvutshi ndo weka w’anto wadjasɛ la Jɛrusalɛma wayɔsama oma lo waombo awɔ.
2 Vɔ wayodianganyema la ntondo ka wonya, ka ngɔndɔ ndo la ntondo k’alembe tshɛ wa l’olongo wakawalangaka, wakawakambɛka, wakawayelaka, wakawayangaka ndo wakawakusamɛka.+ Vɔ hawootshumanyema kana kundɛma. Vɔ wayonga oko tumi laadiko dia nkɛtɛ.”+
3 “Ndo atshikadi wa lo nkumbo ka kɔlɔ kɛnɛ wanɛ wayohandɔ, wayɔsɔna nyɔi lo dihole dia lɔsɛnɔ lo ahole tshɛ wayomaadianganya,” mbata Jehowa kanga lolembelembe.
4 “Kowatee wate: ‘Jehowa kata ate:
“Onde vɔ wayɔkɔ ko hawotonɛ nto?
Naka ɔmɔtshi ambolanga nkalola, onde okina hatokalola nde la wɔ?
5 Lande na kele anto anɛ, ase Jɛrusalɛma wele bu la kɔlamelo tetemalaka monga aha la kɔlamelo?
Vɔ wekɔ lo ntetemala monga la lokeso;Vɔ wekɔ lo ntona nkalola.+
6 Dimi lakadje yimba ndo lakatetemala mpokamɛ, koko woho wakawatɛkɛtaka komonga dimɛna.
Ndooko onto lakayatshumoya lo kɔlɔ yande kana mimbola ɔnɛ: ‘Kakɔna kamomosala?’+
Onto l’onto tetemalaka nkalola lo mboka kayela anto efula oko mfalasa katakungusɔ otsha lo ta.
7 Oyadi kiombe ya l’olongo mbeyaka tena diayɔ;*Fudu k’enga, yɛngɛnga ndo lɔyɔngɛ mbeyaka etena ka vɔ nkalola.*
Koko anto ami hita hawoshihodia kilombo ka Jehowa.”’+
8 ‘Ngande wakokanyu mbuta nyate: “Tekɔ la lomba ndo tekɔ la ɛlɛmbɛ* wa Jehowa”?
Nɛ dia lo mɛtɛ, ofundɔ* wa kashi*+ w’afundji* wakakambema paka lo kashi.
9 Akanga wa tomba wamboshama nsɔnyi.+
Vɔ waya la wɔma ndo wayondama.
Eenda, vɔ wambotona ɔtɛkɛta wa Jehowa,Ko lomba lakɔna lele la wɔ?
10 Ɔnkɔnɛ, dimi layokimɔ wadiɛwɔ le apami akina,Dikambɔ diawɔ le anto akina;+Nɛ dia ntatɛ oma le ɔnɛ loleki tshitshɛ polo le ɔnɛ loleki woke, onto l’onto ekɔ lo nkondja diangɔ lo okadi;+Ntatɛ oma le omvutshi polo le ɔlɔmbɛdi, onto l’onto ekɔ lo nkesa.+
11 Ndo vɔ pembaka nkɔnɔla ɔkwɛlɔ* w’ɔna womoto la wodja ami yema* lo mbuta ɔnɛ:“Wɔladi wekɔ! Wɔladi wekɔ!”
Etena kele ndooko wɔladi.+
12 Onde vɔ wekɔ lo mboka nsɔnyi l’ɔtɛ w’akambo wa wɔnɔnyi wambowosala?
Vɔ hawoke ndooko nsɔnyi!
Vɔ haweye kaanga mboka nsɔnyi!+
Ɔnkɔnɛ, vɔ wayɔkɔ l’atei wa wanɛ wakɔ.
Etena kayomowaela dilanya, vɔ wayotakana,’+ mbata Jehowa.
13 ‘Etena kayomaatshumanya, dimi layowakonya l’ekomelo kawɔ,’ mbata Jehowa.
‘Ndooko elowa wayotshikala lo ɔkɔdi wa vinyɔ, ndooko fingo lo osongo wa fingo ndo akatshi wayɔlɛngɛ.
Ndo vɔ wayoshisha kɛnɛ kakamawasha.’”
14 “Lande na kadjasɛso lanɛ?
Nyɛsɔ totshumane kaamɛ ndo tɔtɔ lo osomba wodingami la mpele+ kele totovu lɛkɔ.
Nɛ dia Jehowa Nzambi kaso ayotodiaka,Ndo nde ambotosha ashi wa lɔlɛngɔ dia sho nnɔ,+Nɛ dia takasalɛ Jehowa pɛkato.
15 Elongamelo ka wɔladi kakikɔ, koko ndooko dui di’ɔlɔlɔ diakaye,Etena k’ɛkɔnwɛlɔ, koko wɔma wekɔ!+
16 Ndjawi ya mfalasa yande yekɔ lo mbokɛma oma la Danɛ.
La mindjo ya ndjawi ya mfalasa yande,Wodja w’otondo wekɔ lo nsaka lokomba.
Vɔ wambɔtɔ lɔkɔ ndo wambolanya wodja la ɛngɔ tshɛ kele lɔkɔ,Osomba ndo wanɛ wadjasɛ lɔkɔ.”
17 “Nɛ dia dimi layanga ntoma eloyi l’atei anyu,Eloyi wa lɔlɛngɔ wahakoke mbɔlanya,Ndo vɔ mɛtɛ wayonyolumata,” mbata Jehowa.
18 Lɔkɔnyɔ lami halotoshila;Otema ami wekɔ la hemɔ.
19 Okoko wa nyanga ekimanyielo wekɔ lo mbokɛma oma lo wodja w’etaleOma le ɔna womoto la wodja ami ɔnɛ:
“Onde Jehowa bu la Siɔna?
Kana onde nkumekanga kayɔ bu lɔkɔ?”
“Lande na kambotshawɔ nkɛlɛ la dikishi diawɔ,La tozambizambi tawɔ t’anyanya t’ase wedja ekina?”
20 “Dinela diambeta, ɔwɔ wambokomɛ,Koko sho hatoshimbame!”
21 Lekɔ la lonyangu l’efula l’ɔtɛ w’ɔkwɛlɔ w’ɔna womoto la wodja ami;+Dimi lekɔ la lɔkɔnyɔ.
Wɔma wambominda.
22 Onde balasama* bu la Ngiliyadɛ?+
Kana onde ndooko ɔkɔnɔdi* lɛkɔ?+
Lande na kahakɔnwɛ ɔna womoto la wodja ami?+
Nɔtɛ ka l'ɛse ka dikatshi
^ Kana “tena diakashikikɛma.”
^ Kana “ntshɔ lo dihole dimɔtshi.”
^ Kana “wetshelo.”
^ Kana “bikɛ.”
^ Kana “lokeso.”
^ Kana “sekeletɛlɛ.”
^ Kana “olanelo.”
^ Kana “laahahɛ.”
^ Kana “esɔ katutadia.”
^ Kana “onganga.”
