Lembo la Sɔlɔmɔna 2:1-17
2 “Dimi lekɔ tsho dɛmbɔlɛmbɔ dia safra dia l’omamu w’ashi,Dɛmbɔlɛmbɔ dia l’ekidi.”+
2 “Oko dɛmbɔlɛmbɔ l’atei w’atɛndɛNgasɔ mbele olangemi ami l’atei w’ana wa wamato.”
3 “Oko osongo wa pɔmɛ l’atei w’esongo wa lo okonda,Ngasɔ mbele olangemi ami l’atei w’ana w’apami.
Dimi kombolaka la ngandji tshɛ dia mbidjasɛ lo dɛdi diande,Ndo elowa ande wekɔ mpɛ lo lolemi lami.
4 Nde akantɔlɛ lo luudu la difɛstɔ,*Ndo ngandji mbaki dalapo diande la diko diami.
5 Onkeketsha la ekate+ w’elowa wa vinyɔ;Onsuke la elowa wa pɔmɛ,Nɛ dia lekɔ la hemɔ ka ngandji.
6 Lonya lande la lɔmɔsɔ lekɔ l’ɛse k’ɔtɛ ami,Ndo lonya lande l’omi kumbatɛmi.+
7 Ana wa wamato wa Jɛrusalɛma le, dimi lambonyotshibia,Le mboloko+ ndo le mfumbɔ ya l’oswe nte:
Tanyoyangake dia memula kana nomialomia ngandji le mi polo lam’ayotonyiyama+ tɔamɛ.
8 Dui di’olangemi ami diɔ sɔ!
Eenda, nde ongo ayaye,Ayadɛ akona, ayafumbɔfumbɔ lo tokonakona.
9 Olangemi ami ekɔ oko mboloko, oko ɔsɔngɔ wa mpele.+
Lɛnɛ kende, emadi l’otshimba wa ehele kaso,Eenda lo adidishi,Alengɛ lo toyongɔ ta lo adidishi.
10 Olangemi ami ambɔtɛkɛta la mi lo mbutɛmi ate:
‘Olangemi ami emala,Olangemi ami w’olangala le, yete totshu.
11 Eenda, eleko k’avula kambeta.
Mvula yaya bu nto.
12 Alɛmbɔlɛmbɔ wambotomba la nkɛtɛ,+Etena ka nkɔndjɔla esongo kambokoka,+Ndo osambo wa fudu k’enga wambokɛma lo wodja+ aso.
13 Osongo wa fingo+ wambɛdia elowa awɔ wa ntondo;Ɛkɔdi wa vinyɔ wambotondja alɛmbɔlɛmbɔ ndo wopola nsolo kawɔ.
Olangemi ami le, onɛɛ, yaka.
Olangemi ami w’olangala le, yete totshu.
14 Fudu kami k’enga le, wɛ latoyashɛka lo wooko wa ave,+Lo afuku w’eshamelo wa l’oholola,Etawɔ dia dimi kɛna ndo mboka dui diayɛ,+Nɛ dia dui diayɛ diekɔ dimɛna ndo ɛnamelo kayɛ kekɔ olangala.’”+
15 “Nyototondee ɛkɛngɛ,Ana w’ɛkɛngɛ walanya dikambɔ dia vinyɔ,Nɛ dia dikambɔ diaso dia vinyɔ diambotondja alɛmbɔlɛmbɔ.”
16 “Olangemi ami ekɔ lakimi ndo dimi lekɔ lakinde.+
Nde ekɔ lo nama ɛkɔkɔ+ l’atei w’alɛmbɔlɛmbɔ.+
17 Polo wonya watofufaka lɔpɛpɛ* ndo watoshishɔka alɛdi,Olangemi ami le, kalola esadi,Oko mboloko+ kana ɔsɔngɔ wa mpele+ lo akona w’okakitɔnelo.*
Nɔtɛ ka l'ɛse ka dikatshi
^ Tshɛk., “luudu la wanu.”
^ Tshɛk., “watɔhɛngaka lushi.”
^ Kana ondo “ɔlɔngɛ wa l’akona.” Kana “akona wa Bɛtɛrɛ.”
