Lembo la Sɔlɔmɔna 5:1-16
5 “Ko dimi lakɔtɔ lo ekambɔ+ kami,Kadiyɛmi, omambedi ami le.
Dimi lakasɔnɛ mirɛ kami la diangɔ diami di’opumu.+
Dimi lakale ehehe kami k’osanga ndo osanga ami;Dimi lakanɔ wanu ami ndo abɛlɛ+ ami.”
“Angɛnyi ami wa ngandji le, nyole!
Nyɔnɔ ndo nyodjɔ wɛnyɛlɔ wa ngandji!”+
2 “Dimi lekɔ lo djɔ, koko otema ami wekɔ lo nsɛna.+
Lamboka olangemi ami akɔkɔla!”
“Kadiyɛmi, olangemi ami le, ondjihole,Fudu kami k’enga, wɛ laha l’ɛkɔmɔ!
Nɛ dia ɔtɛ ami wambɔlɔwa la lɔpɔpɔ,Ndo divo diami la loonge l’otsho.”+
3 “‘Dimi lakakolodi okutu ami.
Onde dimi pombaka mbɔlɔta nto?
Dimi lakasodi ekolo ami.
Onde dimi pombaka mbadja mindo nto?’
4 Olangemi ami akanya lonya lande oma lo wosho wa lokuke,Ko nsaki yami y’otsha le nde yakonyiyama.
5 Dimi lakemɔ dia todihola olangemi ami;Anya ami wakasana la mirɛ,Ndo mpita yami la mirɛ k’ɔkɛlɛngɔ,Lo nsapi kadihama lokuke.
6 Dimi lakadihola olangemi ami,Koko olangemi ami akakadimɔ, akatshu.
Dimi lakashisha elongamelo* lam’akandatshu.*
Dimi lakooyange, koko dimi kombɛna.+
Dimi lakawelɛ, koko nde kombetawɔmi.
7 Todjamu tatetetaka l’osomba wakantane.
Vɔ wakankɔmɔla, wakampomuya.
Todjamu ta mpele wakampɔtɔla dihɔndɔ diatomokombaka.
8 Ana wa wamato wa la Jɛrusalɛma le, dimi lambonyotshibia nte:
Naka nyambɛna olangemi ami,Kanyowote dia lekɔ la hemɔ ka ngandji.”
9 “Ngande woleki olangemi ayɛ olangemi okina tshɛ,Wɛ womoto loleki olangala le?
Ngande woleki olangemi ayɛ olangemi okina tshɛ,Katoyototshibia etshibelo ka ngasɔ?”
10 “Olangemi ami ekɔ olangala wahɛtahɛta ndo wɛma;Nde kaleka mɛnama l’atei wa nunu dikumi (10000).
11 Ɔtɛ ande wekɔ paonyi, ɛɛ, paonyi koleki dimɛna.
Divo diande diekɔ oko waanga w’atoko* wasukasuka,Odima oko dingwangwa.
12 Washo ande wekɔ oko benga l’omamu w’ɛkɛdi w’ashi,Diɔka lo abɛlɛ,Diodjashi l’omamu wa difuku di’ashi.*
13 Atama ande wekɔ oko mbeto ka diangɔ di’opumu,+Atota w’adiyo w’opumu.
Ɛlɔmɔ ande wekɔ alɛmbɔlɛmbɔ, watɔngatɔnga la mirɛ+ k’ɔkɛlɛngɔ.
14 Mpita ya lo anya ande yekɔ paonyi kodjami krizɔlitɛ.
Dikundju diande diekɔ owanga wa lɔsɛla wokombami la safirɛ.
15 Ekolo ande wekɔ dikundji dia marbrɛ diemɛmi lo dikitshelo dia paonyi koleki dimɛna.
Ɛnamelo kande kekɔ oko Lɛbanɔna, kahakoke mbɛdikama oko wele elondo.+
16 Onyɔ* ande wekɔ mpɛ keto,Ndo ɛngɔ tshɛ kendana la nde kekɔ dimɛna.+
Ana wa wamato wa Jɛrusalɛma le, ngasɔ mbele olangemi ami, ɔnɛ lalangami.”
Nɔtɛ ka l'ɛse ka dikatshi
^ Kana “Anima ami wakakɔmɔ.”
^ Kana ondo “Anima ami wakantshike etena kakandatɛkɛta.”
^ Kana ondo “oko sandji dia mba ya datɛ.”
^ Kana ondo “ehembo wa ɛtɛkɔ.”
^ Tshɛk., “lolemi.”
