Makɔ 9:1-50

MPOKAMƐ LO

Ohilwelo wa Yeso (1-13)
Ɔna pami laki la ɔdiɛngɛ ambɔkɔnɔ (14-29)
- Akambo tshɛ kokaka salema le ɔnɛ lele la mbetawɔ (23)
Nyɔi ka Yeso kambewoyama nto (30-32)
Ambeki wambodjana taamu dia mbeya ɔnɛ loleki woke (33-37)
Onto tshɛ lahatɔlɔsha ekɔ lo wedi aso (38-41)
Akambo watakanya (42-48)
“Nyonge la lɛɛhɔ l’etei kanyu” (49, 50)

9 Nde akawatɛ nto ate: “Lo mɛtɛ kanyotɛmi nte, anto amɔtshi wemadi lanɛ hawotɔlɛta nyɔi paka wambotɛnyi Diolelo dia Nzambi diamboya la wolo.”+ ² Nshi 6 l’ɔkɔngɔ wa laasɔ, Yeso akɔshi Petero, Jakɔba la Joani ko akadɛ la wɔ vɔamɛ lo dikona di’otale, ndo nde akatohilɔ la ntondo kawɔ,+ ³ ko ahɔndɔ ande wa laadiko wakayala ngaingai ndo wɛma fifɔ woho wele ndooko onto la la nkɛtɛ lakoka mbɛdia ngasɔ. ⁴ Elidja la Mɔsɛ wakɛnama le wɔ ndo vɔ wakasawolaka la Yeso. ⁵ Ko Petero akatɛ Yeso ate: “Rabi,* ekɔ dui dia dimɛna dia sho ntshikala lanɛ. Ɔnkɔnɛ toke mvudu y’apɛma 3 lanɛ, 1 lakiyɛ, 1 laki Mɔsɛ ndo 1 laki Elidja.” ⁶ Lo mɛtɛ, Petero kombeya kɛnɛ ka nsala nto, nɛ dia vɔ wakandama la wɔma. ⁷ Ko dinge diakaye, diakaakombe ndo dui+ diakaye oma lo dinge diakɔ diata ɔnɛ: “Ɔnɛ ele Ɔnami, ɔnɛ lokami ngandji.+ Nyoohokamee.”+ ⁸ Ko mbala kakɔ ɔtɔi vɔ wakakadimɔ, ko vɔ kɔmɛna ndooko onto nto, paka Yeso. ⁹ Lam’akawayaholɔka oma lo dikona, nde akaakɔkɔmiya diaha vɔ mbutɛ ndooko onto kɛnɛ kakawɛnyi,+ polo ndo Ɔna onto ambolɔ oma lo nyɔi.+ ¹⁰ Vɔ wakalame ɔtɛkɛta ɔsɔ l’etema,* koko wakakɛtshanyaka lam’asawɔ dia kɛnɛ kalembetshiya eolwelo kɛsɔ k’oma lo nyɔi. ¹¹ Ko vɔ wakawombola vate: “Lande na kata afundji ɔnɛ Elidja+ pombaka taye ntondo?”+ ¹² Nde akawatɛ ate: “Elidja pombaka ndja ntondo ndo nɔngɔsɔla akambo tshɛ,+ ko lande na kele akafundama lo dikambo dia Ɔna onto dia nde pombaka soyama+ efula ndo pɛnyahɛnyama la diɔnyɔ tshɛ?+ ¹³ Dimi lambonyotɛ nte, Elidja+ amboshilaka ndja, koko vɔ wakoosalɛ akambo tshɛ wakawalange, oko wakadiafundama lo dikambo diande.”+ ¹⁴ Lam’akawayayaka oya le ambeki akina, vɔ wakɛnyi olui a woke w’anto suke la wɔ ndo afundji waama la wɔ.+ ¹⁵ Koko kam’akɛnyi olui w’anto ɔsɔ tshɛ Yeso, vɔ wakaambe ndo wakalawɔ otsha le nde dia towosha mɔyɔ. ¹⁶ Ko nde akawambola ate: “Awananyu la wɔ?” ¹⁷ Ko onto ɔmɔtshi la l’atei w’olui w’anto ɔsɔ akookadimola ate: “Ombetsha, dimi lakakela ɔnami nɛ dia nde ekɔ la ɔdiɛngɛ+ wa lomi. ¹⁸ Mbala tshɛ kawondawɔ, vɔ mbɔkɔshaka la nkɛtɛ ndo nde kɛlaka ndɔdu oma l’onyɔ, nde kakatanyaka wanyu ndo nɛmbaka. Dimi lakalɔmbi ambeki ayɛ dia vɔ mbotondja, koko vɔ hawokoki nsala dikambo sɔ.” ¹⁹ Yeso akaakadimola ate: “Nyu lɔlɔnga+ lele bu la mbetawɔ, polo ndo l’etena kakɔna kayomotetemala monga la nyu? Polo ndo l’etena kakɔna kayomokikɛ lɔkɛwɔ lanyu? Ombelande.”+ ²⁰ Ko vɔ wakawela ɔna pami akɔ. Koko lam’akɛnyi ɔdiɛngɛ akɔ Yeso, mbala kakɔ ɔtɔi vɔ wakahahanya ɔnakɔ oko onto lafumboya fudu. Wakɔɔkɔsha lo nkɛtɛ ko nde akangitɔ ndo akakɛlɛ ndɔdu oma l’onyɔ. ²¹ Ko Yeso akambola she ɔnakɔ ate: “Oma l’etena kakɔna kakookomɛ dikambo nɛ?” Nde akawotɛ ate: “Oma ko dikɛnda diande. ²² Ndo mbala efula, vɔ mbɔkɔshaka lo dja ndo l’ashi dia mbosalɛ kɔlɔ. Ko naka wɛ kokaka nsala dikambo dimɔtshi, otoke kɛtshi ndo otokimanyiya.” ²³ Yeso akawotɛ ate: “Lande na katayɛ wate: ‘Naka wɛ kokaka?’ Akambo tshɛ kokaka salema le onto lele la mbetawɔ.”+ ²⁴ Mbala kakɔ ɔtɔi, she ɔnakɔ akate la dui dia wolo ate: “Dimi lekɔ la mbetawɔ! Okimanyiya lɛnɛ eemi l’ohomba wa mbetawɔ!”+ ²⁵ Lam’akɛnyi Yeso dia olui w’anto woyalawɔ oya le wɔ, nde akahangwɛ ɔdiɛngɛ ate: “Wɛ ɔdiɛngɛ wa lomi ndo ehoke, lambokotɛ nte, tomba oma le nde ndo tɔtɔke nto+ le nde.” ²⁶ L’ɔkɔngɔ w’ɔdiɛngɛ mpangɔhangɔ ndo mbohahanya mbala efula oko onto lafumboya fudu, vɔ wakatombe, ko ɔnakɔ akayala oko onto lambovɔ, ndo efula k’anto waki laawɔ wakate vate: “Nde ambovɔ!” ²⁷ Koko Yeso akookimɛ lo lonya, akawonyiya ko nde akemala. ²⁸ L’ɔkɔngɔ wa nde mbɔtɔ lo luudu lɔmɔtshi, ambeki ande wakawombola lo shɔpɔ vate: “Lande na kahatakoki ntondja ɔdiɛngɛ akɔ?”+ ²⁹ Nde akawatɛ ate: “Woho w’ɔdiɛngɛ ongo kokaka ntomba paka la dɔmbɛlɔ.” ³⁰ Vɔ wakonɛɛ oma lɛkɔ, ko wakete la Ngalileya, koko nde konanga dia kaanga onto mbeya dikambo sɔ. ³¹ Nde aketshaka ambeki ande ndo akawatɛka ate: “Ɔna onto ayanga tokimɔma lo anya w’anto ndo vɔ wayowodiaka,+ koko kaanga mbayondodiakema, nde ayolɔ l’ɔkɔngɔ wa nshi 3.”+ ³² Vɔ koshihodia kɛnɛ kakandawatɛ, koko wakoke wɔma dia mbombola. ³³ Ko vɔ wakakome la Kapɛrnauma. Lam’akinde lo luudu, nde akawambola ate: “Kakɔna kakanyayakakatanaka lo mboka?”+ ³⁴ Vɔ wakɔlama ki nɛ dia lo mboka, vɔ wakayakakatanaka dia mbeya ɔnɛ loleki woke l’atei awɔ. ³⁵ Ɔnkɔnɛ nde akadjasɛ, akelɛ apɔstɔlɔ ande 12 ko akawatɛ ate: “Naka onto nangaka monga lo dihole dia ntondo, nde onge l’ɔkɔngɔ w’anto tshɛ ndo onge okambi w’anto tshɛ.”+ ³⁶ Ko nde akɔshi ɔna dikɛnda, akawemadia l’atei awɔ ndo akawahɛ anya ko akawatɛ ate: ³⁷ “Onto tshɛ lalongola ɔtɔi ɔmɔtshi lele oko ɔna dikɛnda+ ɔnɛ lo lokombo lami, ambonongola ndo dimi; ndo onto tshɛ lanongola, aha dimɛ oto mbalongolande, koko ndo Ɔnɛ lakantome.”+ ³⁸ Joani akawotɛ ate: “Ombetsha, takɛnyi onto ɔmɔtshi atondja ɛdiɛngɛ lo nkamba la lokombo layɛ ko takahembe mboshimba, nɛ dia nde hakoyele kaamɛ la so.”+ ³⁹ Ko Yeso akate ate: “Tanyohembake mboshimba, nɛ dia ndooko onto layosala ahindo lo lokombo lami layoyokadimɔ esadi eto ko ntɛkɛta kɔlɔ lo dikambo diami. ⁴⁰ Nɛ dia onto tshɛ lahatɔlɔsha ekɔ lo wedi aso.+ ⁴¹ Onto tshɛ lanyosha dikɔhɔ di’ashi wa nnɔ l’ɔtɛ wenyu ambeki wa Kristo,+ lo mɛtɛ kanyotɛmi nte: Lo weho akɔ tshɛ nde hatoshisha difuto+ diande. ⁴² Koko, onto tshɛ latakanya 1 ɔmɔtshi l’atei w’anto wa totshitshɛ anɛ wele la mbetawɔ, ndeka dimɛna mbokeleka dive di’ɔhɛlɔ diatshindjama oma le mponda lo nkingo, ko mbotambiya lo ndjale.+ ⁴³ “Naka lonya layɛ kotakanyaka, kete hembolalɔ. Nɛ dia ndeka dimɛna wɛ nkondja lɔsɛnɔ la lonya 1 lo dihole dia wɛ mbikashema la anya 2 lo Ngɛhɛna,* lo dja yahakoke nimala.+ ⁴⁴ * —— ⁴⁵ Naka lokolo layɛ kotakanyaka, kete hembolalɔ. Nɛ dia ndeka dimɛna wɛ nkondja lɔsɛnɔ la lokolo 1 lo dihole dia wɛ mbikashema la ekolo 2 lo Ngɛhɛna.*+ ⁴⁶ * —— ⁴⁷ Ndo naka sso diayɛ kotakanyaka, kete kashadiɔ.+ Nɛ dia ndeka dimɛna wɛ mbɔtɔ la sso 1 lo Diolelo dia Nzambi lo dihole dia wɛ mbikashema la washo 2 lo Ngɛhɛna,*+ ⁴⁸ lɛnɛ ahavu nkuso ndo lɛnɛ ahadimala dja.+ ⁴⁹ “Nɛ dia onto tshɛ pombaka mbidjama lɛɛhɔ la dja.+ ⁵⁰ Lɛɛhɔ lekɔ ɛngɔ ka dimɛna, koko naka lɛɛhɔ lambosuwɔ, la na ayonyolietɛ mpɛ nto?+ Nyonge la lɛɛhɔ l’etei kanyu+ ndo nyonge la wɔladi lam’asanyu.”+