Rɔmɔ 1:1-32
1 Dimi Pɔɔlɔ, okambi wa Kristo Yeso lakelamɛ dia monga ɔpɔstɔlɔ ndo lakasɔnama dia mbewoya lokumu l’ɔlɔlɔ+ laki Nzambi.
2 Nde akalake la ntondo lo tshimbo y’amvutshi ande lo Afundelo w’ekila
3 lo kɛnɛ kendana la Ɔnande lakaye oma le kanula* ya Davidɛ+ ya lo dikila,
4 koko lele oma lo wolo, akelamɛ Ɔna Nzambi.+ Dui sɔ diakasalema lo ndjela nyuma k’ekila l’ekimanyielo ka eolwelo k’oma lo nyɔi,+ (ɛɛ, Yeso Kristo Nkumɛso.
5 Oma lo tshimbo yande mbakatalongola ɔlɔlɔ waheyama mbɛdika ndo olimu w’ɔpɔstɔlɔ+ dia okitanyiya w’oma lo mbetawɔ monga l’atei wa wedja+ tshɛ lo dikambo dia lokombo lande.
6 Oma l’atei wa wedja ɛsɔ mbakanyelamɛ ndo nyu lawɔ dia monga anto waki Yeso Kristo.)
7 Nyu wanɛ tshɛ wele la Rɔmɔ wokama ngandji oma le Nzambi ndo welamɛ ekilami mbafundɛmi nte:
Ɔlɔlɔ waheyama mbɛdika ndo wɔladi w’oma le Nzambi Shɛso ndo w’oma le Nkumadiɔndjɔ Yeso Kristo wayale la nyu!
8 Ntondotondo, lambosha Nzambi kami losaka lo tshimbo ya Yeso Kristo lo dikambo dianyu nyu tshɛ, nɛ dia andja w’otondo wekɔ lo ntɛkɛta dikambo dia mbetawɔ kanyu.
9 Dikambo Nzambi kakambɛmi olimu w’ekila la tshondo yami tshɛ* lo dikambo dia lokumu l’ɔlɔlɔ lendana la Ɔnande ekɔ ɔmɛnyi ami dia dimi nyodimolaka nshi tshɛ lo alɔmbɛlɔ ami,+
10 ndo dimi mbɔsɛngasɛngaka dia naka kokaka kankondja diaaso dia ndja le nyu, naka Nzambi alanga.
11 Nɛ dia lekɔ lo nomɔlomɔ nyɛɛna dia nyosha woshasha ɔmɔtshi wa lo nyuma dia nyu keketshama,
12 kana dia sho ndjokeketshana,+ onto l’onto oma lo mbetawɔ k’osekande, oyadi kakinyu kana kakimi.
13 Analengo le, dimi nangaka nyu mbeya dia lakasangoyaka mbala efula dia ndja le nyu dia dimi ndjokondja elowa ɛmɔtshi ndo l’atei anyu oko wediɔ ndo lo wedja ekina, koko waakambidjɛ wekamu edja ndo kakianɛ.
14 Dimi lekɔ la dibasa le ase Ngirika ndo le angɛndangɛnda,* le akanga wa tomba ndo le akanga wa dinginya.
15 Ɔnkɔnɛ, dimi lekɔ la mposa k’efula ka nyewoya ndo nyu lawɔ lokumu l’ɔlɔlɔ lengo la Rɔmɔ,+
16 nɛ dia dimi haloke lokumu l’ɔlɔlɔ+ nsɔnyi. Lo mɛtɛ, lɔ lekɔ wolo wa Nzambi washa onto tshɛ lele la mbetawɔ+ panda, ntondo+ le ase Juda ko ndo le ase Ngirika.+
17 Nɛ dia oma lɔkɔ mbɛnama losembwe laki Nzambi lo tshimbo ya mbetawɔ+ ndo dikambo dia mbetawɔ kawɔ, oko wakadiafundama ɔnɛ: “Koko onto ɔlɔlɔ ayɔsɛna oma lo mbetawɔ.”+
18 Nɛ dia nkɛlɛ+ ka Nzambi kekɔ lo mbishɔma oma l’olongo le anto tshɛ wahawoke wɔma ndo wele bu la losembwe, wadinyadinya akambo wa mɛtɛ+ lo yoho ya kɔlɔ,
19 nɛ dia kɛnɛ kakoka mbeyama lo dikambo dia Nzambi mɛnamaka hwe l’atei awɔ lam’ele Nzambi akawaɛnyatɔ.+
20 Dikambo waonga ande wahɛnama wekɔ lo mɛnama dimɛna oma lo etongelo k’andja, nɛ dia vɔ wekɔ lo mɛnama oma lo diangɔ diakatongama,+ kaanga wolo+ ande wa pondjo ndo woho wende Nzambi,+ lo yoho yahawakoke mbisha tɛkɛ nɛndɛ.
21 Nɛ dia kaanga mbakaweye Nzambi, vɔ kombotombola ndo kombosha losaka, koko vɔ waya dinginya lo ekanelo ka yimba ndo etema awɔ wele bu la yimba waya wodjima tshududu.+
22 Kaanga mbatawɔ dia wekɔ la lomba, vɔ wekɔ dinginya
23 ndo vɔ wambokadimola lotombo la Nzambi kahavu dia lɔ monga ɛngɔ kɛmɔtshi kele oko efanelo k’onto lavɔ, ka tofudu, ka dikɛndakɛnda diele l’ekolo 4 ndo ka dikɛndakɛnda diayakotola.+
24 Diakɔ diele, lo ndjela nsaki y’etema awɔ, Nzambi akaakimɔ lo akambo wa mindo dia alemba awɔ mbishama nsɔnyi l’atei awɔ.
25 Vɔ wakengɔnya akambo wa mɛtɛ waki Nzambi la kashi ndo wakatɛmɔla diangɔ diakatongama ndo wakadikambɛ olimu w’ekila lo dihole dia ntɛmɔla Otungi, ɔnɛ latombɔma pondjo pondjo. Aamɛɛ.
26 Diakɔ diele Nzambi akaakimɔ lo nsɔngu ka dieyanelo+ kambotamba elelo, nɛ dia wamato awɔ wakatshike okambelo wa dimɛna wa la alemba awɔ ndo wakatatɛ nkamba la wɔ lo yoho yele Nzambi kɔnɔngɔsɔla,+
27 woho akɔ waamɛ mbele ndo apami wakatshike mbeyana* la wamato, ko wakalole la nsaki ka nsala dieyanelo lam’asawɔ, pami la pami+ wasala akambo wa nsɔnyi, ndo vɔ wekɔ lo nongola dilanya dia wolo l’ɔtɛ wa kɔlɔ kawɔ.+
28 Oko wakiwɔ kɔmɛna ohomba wa mbeya Nzambi,* Nzambi akaakimɔ lo ekanelo ka yimba ka kɔlɔ efula dia vɔ nsala akambo wahasungana.+
29 Ndo vɔ wakalole la weho tshɛ w’akambo wele bu la losembwe,+ wa kɔlɔ, wa lokaki,*+ w’esehe, woludi la kandjema,+ wa diakatanelo,+ w’ewanu, wa lokeso+ ndo wa mayɛlɛ,+ watasanya akambo a kana,*
30 wele atɛndanyi,+ atunyi wa Nzambi, asɛndji, akanga wa lotamanya, akanga w’etako, wanɛ wakongɛ dia nsala kɛnɛ kele kɔlɔ,* wahakitanyiya ambutshi,+
31 waha la timba,+ wahakotsha alaka awɔ, waha la ngandji ka wanyawɔ anto ndo waha la kɛtshi.
32 Kaanga mbeya anto asɔ dimɛna didjango diosembwe diaki Nzambi diata ɔnɛ wanɛ watosalaka akambo asɔ sunganaka ndjakema,+ aha tsho vɔ tetemalaka mbasala, koko ndo vɔ sukɛka wanɛ waasala.
Nɔtɛ ka l'ɛse ka dikatshi
^ Tshɛk., “lɔtɔngɔ.”
^ Tshɛk., “la nyuma kami.”
^ Kana “wanɛ wele bu ase Ngirika.” Tshɛk., “wanɛ wahatashidimikɔ.”
^ Kana “okambelo wakalɔngɔsɔla Nzambi.”
^ Kana “konanga mbeya Nzambi dimɛna.”
^ Kana “wele akanga wa vate vate.”
^ Kana “ɔkɔmiya.”
^ Kana “apɔhɔdi w’akambo wa kɔlɔ.”
