Rɔmɔ 3:1-31
3 Ko ɛlɔlɔ akɔna waya lo monga ose Juda, kana wahɔ akɔna waya lo wonyelo wa mpota?
2 Wahɔ wekɔ efula. Ntondotondo nɛ dia vɔ wakalongola ɛtɛkɛta w’ekila waki Nzambi.+
3 Ko kayotota naka ase Juda amɔtshi kɔmɛnya mbetawɔ kawɔ? Onde woho wakiwɔ komonga la mbetawɔ ayosala dia kɔlamelo yele la Nzambi nshisha nɛmɔ?
4 Keema! Koko Nzambi ongake nshi tshɛ onto lata mɛtɛ,+ oyadi kaanga onto tshɛ ayota kashi,+ oko wakadiafundama ɔnɛ: “Dia losembwe layɛ mɛnama lo ɛtɛkɛta ayɛ ndo dia wɛ nyindjama etena kalomboshamayɛ.”+
5 Ko ayotota naka akambo aso wa kɔlɔ tondjaka hwe losembwe laki Nzambi? Naka Nzambi mɛnya nkɛlɛ kande, onde laasɔ kete nde bu la losembwe? (Dimi lambɔtɛkɛta oko watɔtɛkɛtaka anto.)
6 Ndooko kaanga yema tshitshɛ! Naka aha ngasɔ, ngande wayolombosha Nzambi andja?+
7 Ko naka oma lo kashi kami, mɛtɛ kaki Nzambi kakaleke mɛnama dia lotombo lande, lande na kalomboshamami ndo dimi oko otshi wa pɛkato?
8 Ndo lande na kahatate oko wata anto amɔtshi kashi ɔnɛ sho mbata shate: “Nyɛsɔ tosale akambo wa kɔlɔ kele akambo w’ɛlɔlɔ kawoye”? Kilombo k’anto asɔ mbɔtɔnɛka la losembwe.+
9 Ko afɔnyaso, onde sho mboleki anto akina? Keema! Nɛ dia takatshi ntondo dia oyadi ase Juda kana ase Ngirika, vɔ tshɛ wekɔ l’ɛse ka pɛkato,+
10 oko wakadiafundama ɔnɛ: “Ndooko kaanga onto lele ɔlɔlɔ, ndooko kaanga ɔtɔi.+
11 Ndooko onto lele la shɛnɔdi, ndooko onto layanga Nzambi.
12 Anto tshɛ wambonganyiyama, vɔ tshɛ wakayala diangɔ di’anyanya. Ndooko onto lele la ɔlɔlɔ w’otema, ndooko kaanga ɔtɔi.”+
13 “Wodi awɔ wekɔ diombo dia hwe; vɔ kesaka la nemi yawɔ.”+ “Lɔlɛngɔ la tshuha lekɔ l’ɛlɔmɔ awɔ.”+
14 “Ndo enyɔ awɔ wambolola l’ɛtɛkɛta wa mananu ndo w’ololo.”+
15 “Ekolo awɔ samanyaka dia nkɛdia dikila.”+
16 “Elanyelo ndo mfɔnu kekɔ lo mboka yawɔ,
17 ndo vɔ haweye mboka ka wɔladi.”+
18 “Wɔma wa Nzambi keema la ntondo ka washo awɔ.”+
19 Sho mbeyaka dia akambo tshɛ wotami lo Ɛlɛmbɛ, wakatama dikambo dia anto wele l’ɛse ka Ɛlɛmbɛ dia enyɔ tshɛ ndjihama ndo dia andja w’otondo mbikoya la Nzambi dia nongola dilanya.+
20 Ɔnkɔnɛ, ndooko onto* layɔsama oko onto ɔlɔlɔ lo washo ande lo woho wasalande akambo wele lo ɛlɛmbɛ,+ nɛ dia oma lo ɛlɛmbɛ mbaya ewo k’oshika ka pɛkato.+
21 Koko kakianɛ, laadiko di’ɛlɛmbɛ, losembwe laki Nzambi lambɛnama,+ oko wadiɛnya+ Ɛlɛmbɛ la Amvutshi,
22 ɛɛ, losembwe laki Nzambi oma lo mbetawɔ le Yeso Kristo, le wanɛ tshɛ wele la mbetawɔ. Nɛ dia otshikitanu bu.+
23 Dikambo anto tshɛ wakasale pɛkato ndo hawokome lo lotombo la Nzambi,+
24 ndo woho wɔsamawɔ oko anto w’ɛlɔlɔ ekɔ oko woshasha+ oma l’ɔlɔlɔ ande waheyama mbɛdika+ lo tshimbo y’etshungwelo k’oma l’oshinga w’etshungwelo wakafute Kristo Yeso.+
25 Nzambi akookimɔ oko olambo wa nkomba pɛkato*+ diɛsɛ la mbetawɔ lo dikila diande.+ Dui sɔ diakasalema dia mɛnya losembwe lande hita, nɛ dia la solo dia lotutsha diande, Nzambi akadimanyiyaka anto pɛkato yakawasalaka lo nshi yakete.
26 Dui sɔ diakasalema dia mɛnya losembwe+ lande lo eleko kɛnɛ, dia nde monga la losembwe kaanga etena kɔsande onto lele la mbetawɔ le Yeso+ oko onto ɔlɔlɔ.
27 Ko laasɔ, lende ele ɔkɔkɔ wa ndjafuna? Ndooko ɔkɔkɔ. Lo ndjela ɔlɛmbɛ akɔna? Onde ɔlɛmbɛ w’etsha?+ Keema, koko lo ndjela ɔlɛmbɛ wa mbetawɔ.
28 Nɛ dia sho mbɔsaka dia onto mbɔsamaka oko onto ɔlɔlɔ oma lo mbetawɔ, koko aha oma lo etsha wɔtɔnɛ l’ɛlɛmbɛ.+
29 Kana onde nde ekɔ Nzambi k’ase Juda ato?+ Shi nde ekɔ ndo Nzambi k’ase wedja?+ Eelo, nde ekɔ ndo Nzambi k’ase wedja.+
30 Lam’ele Nzambi ekɔ ɔtɔi,+ nde ayɔsa anto wakanyɛma mpota oko anto w’ɛlɔlɔ+ oma lo mbetawɔ ndo anto waki kominyɛma mpota, nde ayowaɔsa oko anto w’ɛlɔlɔ+ oma lo mbetawɔ kawɔ.
31 Onde laasɔ tekɔ lo mɔnyɔla ɛlɛmbɛ oma lo mbetawɔ kaso? Keema! Lo dihole dia nsala ngasɔ, sho sukɛka ɛlɛmbɛ.+
