Rɔmɔ 4:1-25
4 Lam’ele ekɔ ngasɔ, ayotota, Abrahama tshɛso ka lo dikila akandakondja?
2 Ɛnyɛlɔ, otondonga Abrahama akɔsama oko onto ɔlɔlɔ l’ɔtɛ w’etsha ande, tshike nde otonga l’ɔkɔkɔ wa ndjafuna, koko aha lo washo wa Nzambi.
3 Ko kakɔna kata Afundelo? “Abrahama aki la mbetawɔ le Jehowa* ko nde akɔsama oko onto ɔlɔlɔ.”+
4 Le onto lakamba olimu, difuto diande hɔsama oko ɔlɔlɔ waheyama mbɛdika, koko oko ɛngɔ kahombande nongola.*
5 Lo wedi okina, le onto lahakambe koko ekɔ la mbetawɔ le Ɔnɛ lɔsa onto a kɔlɔ oko onto ɔlɔlɔ, l’ɔtɛ wa mbetawɔ kande, nde mbɔsamaka oko onto ɔlɔlɔ.+
6 Oko wakate Davidɛ nde lawɔ dikambo dia ɔngɛnɔngɛnɔ wele l’onto lele Nzambi mbɔɔsaka oko onto ɔlɔlɔ aha l’ɔtɛ w’etsha ande ɔnɛ:
7 “Ɔngɛnɔngɛnɔ le wanɛ wele etsha awɔ wa kɔlɔ wambodimanyiyama ndo pɛkato yawɔ yambokombama.*
8 Ɔngɛnɔngɛnɔ le onto lele Jehowa* hatodja yimba+ lo pɛkato kande.”
9 Ko onde wanɛ wakanya mpota kana waki kominya mpota+ ato mbele la ɔngɛnɔngɛnɔ ɔsɔ? Nɛ dia sho mbutaka ɔnɛ: “L’ɔtɛ wa mbetawɔ kande, Abrahama akɔsama oko onto ɔlɔlɔ.”+
10 Ko l’etena kakɔna kakandɔsama oko onto ɔlɔlɔ? Onde etena kakinde ambonya mpota kana atanya mpota? Aha l’etena kakinde ambonya mpota, koko l’etena kakinde atanya mpota.
11 Ndo nde akalongola djembetelo,+ mbuta ate wonyelo wa mpota oko ohomɔ* wa losembwe oma lo mbetawɔ kaki la nde etena kakinde atanya mpota, dia nde monga she anto tshɛ wele la mbetawɔ+ kaanga mbewɔ watanya mpota dia vɔ mbɔsama oko anto w’ɛlɔlɔ,
12 ndo dia nde monga she ana wakanya mpota, aha tsho le wanɛ wayela wonyelo wa mpota, koko ndo le wanɛ wakɛndakɛnda lo yoho ya dimɛna lo wanya wa mbetawɔ kaki la shɛso Abrahama+ etena kakinde atanya mpota.
13 Nɛ dia aha l’ekimanyielo k’ɛlɛmbɛ mbakalongola Abrahama kana kanula* yande daka dia nde ayonga okitɔ wa andja,+ koko diɛsɛ la losembwe l’oma lo mbetawɔ.+
14 Nɛ dia naka wanɛ wayela ɛlɛmbɛ wekɔ ekitɔ, kete mbetawɔ kakayala anyanya ndo daka diakɔ diakatɔ.
15 Lo mɛtɛ, Ɛlɛmbɛ mbelaka nkɛlɛ,+ koko lɛnɛ ele bu ɛlɛmbɛ, kɔlɔ keema lɛkɔ.+
16 Diakɔ diele dui sɔ diakaye oma lo mbetawɔ, dia diɔ salema lo ndjela ɔlɔlɔ waheyama mbɛdika+ waki Nzambi, dia daka diakɔ shikimala le kanula*+ yande tshɛ, aha tsho le wanɛ wayela Ɛlɛmbɛ, koko ndo le wanɛ wayela mbetawɔ ka Abrahama lele shɛso sho tshɛ.+
17 (Oko wakadiafundama ɔnɛ: “Dimi lakakɔsɔnɛ dia monga she wedja efula.”)+ Dui sɔ diakasalema lo washo wa Nzambi, lele Abrahama aki la mbetawɔ le nde, latɔsɛnyaka wanɛ wakavu ndo latɔsaka diangɔ diele bu oko diekɔ.*
18 Kaanga mbakinde ndooko la ɔkɔkɔ wa monga la elongamelo, l’ɔtɛ wa elongamelo nde aki la mbetawɔ dia nde ayonga she wedja efula lo ndjela kɛnɛ kakatama ɔnɛ: “Ngango mbayonga tokanula* tayɛ.”+
19 Ndo kaanga mbele mbetawɔ kande kokitakita, l’etena kɛsɔ nde akɔsaka demba diande oko diamboshila mvɔ, (nɛ dia nde aki l’ɛnɔnyi oko 100),+ ndo woho waki dikundju dia Sara+ diambovɔ.*
20 Koko l’ɔtɛ wa daka diakawosha Nzambi, nde komengenga oko onto laya bu la mbetawɔ, koko akakeketala oma lo mbetawɔ kande, ndo asha Nzambi lotombo,
21 ele l’eshikikelo tshɛ dia Nzambi ekɔ l’akoka+ wa nkotsha kɛnɛ kakandalake.
22 Diakɔ diele “nde akɔsama oko onto ɔlɔlɔ.”+
23 Koko ɛtɛkɛta w’ɔnɛ “nde akɔsama oko” kofundama lo dikambo diande to,+
24 koko ndo lo dikambo diaso sho wanɛ wayɔsama ngasɔ, nɛ dia tekɔ la mbetawɔ le Ɔnɛ lakolola Yeso Nkumɛso oma lo nyɔi.+
25 Nde akakimɔma dikambo dia kɔlɔ yaso+ ndo akolɔma dia sho mbɔsama oko anto w’ɛlɔlɔ.+
Nɔtɛ ka l'ɛse ka dikatshi
^ Kana “oko dibasa.”
^ Kana “yambodimanyiyama.”
^ Kana “eshikikelo.”
^ Tshɛk., “lɔtɔngɔ.”
^ Tshɛk., “lɔtɔngɔ.”
^ Kana ondo “lasala dia kɛnɛ kele bu monga.”
^ Tshɛk., “lɔtɔngɔ.”
^ Kana “ekomba.”
